داۋلەت تۇرلىحانوۆ ۇلىنا قاتىستى جاعداي تۋرالى: وسى جەردەن دوعارعانىمىز دۇرىس
دەپۋتات، سپورت ارداگەرى داۋلەت تۇرلىحانوۆ اسكەري بولىمنەن قاشىپ كەتكەن جانە قىلمىستىق ءىس بويىنشا كۇدىكتى رەتىندە تانىلعان ۇلى نۇراسىل بولاتتىڭ ارەكەتتەرىنە قاتىستى Facebook-پاراقشاسىندا وسىلاي جازدى، دەپ حابارلايدى قازاقپارات.
«سوڭعى كەزدە مەنىڭ ۇلىما قاتىستى اقپارات كەڭىستىگىندە تاراپ جاتقان حابارلارعا بايلانىستى وزدەرىڭىزگە ۇندەۋىمدى جاريالاپ وتىرمىن.
سوڭعى بەس ايدا الەۋمەتتىك جەلىلەردە ۇلىما قاتىستى جاعداي بويىنشا وتە كوپ اقپارات شىعىپ جاتىر. يا، بۇل جاعدايدىڭ بولعانى راس، الايدا ونى قوعامدىق ورتاعا قايتا-قايتا سالا بەرۋدىڭ ءجونى جوق دەپ ەسەپتەيمىن. جاعداي ورىن العاندا، مەن ءوز پىكىرىمدى اشىق ايتقانمىن. بارلىق جاعداي زاڭ جۇزىندە شەشىلۋى كەرەك دەگەنمىن.
قازىرگى كەزدە قوعامدىق ورتادا مەنىڭ ۇلىمنىڭ ءبىر قاتەلىگىنەن باسقا، قانشاما ايتىلاتىن وزەكتى ماسەلەلەر بار ەمەس پە!؟ وسى ورايدا، ۇلىما بايلانىستى جاعدايدىڭ قوعامدا ۇلكەن اقپاراتقا اينالعانى تۇسىنىكسىز. جارايدى، اقپاراتتار شىعىپ جاتىر، وسى ارقىلى حايپ جيناپ، قوعامدا رەيتينگىن وسىرەمىن دەگەندەر ءوز ماقساتىنا جەتكەن شىعار. ەندى مەنىڭ ويىمشا بۇل ماسەلەنى وسى جەردەن دوعارعانىمىز دۇرىس»، - دەپ جازدى د. تۇرلىحانوۆ.
دەپۋتات الەۋمەتتىك جەلىدەگى اقپاراتتار ونىڭ ۇلىنا ۇلكەن پسيحولوگيالىق اۋىرتپالىق ءتۇسىرىپ جۇرگەنىن سەزىنەتىنىن ايتتى.
«ول ءالى جاپ-جاس جىگىت. ونىڭ جاساعانى ديزەرتيرلىك ەمەس، بىلايشا ايتقاندا، بالالىققا سالىنىپ «ساموۆولكاعا» شىعىپ كەتكەنى. مەن ۇلىمنىڭ قازاقستان قارۋلى كۇشتەرىنىڭ ساپىندا جاۋىنگەر بولىپ جۇرگەنىن ماقتان ەتەمىن. ول جاستىقتىڭ جالىنىمەن قاتەلىك جاساعانى تۇسىنىكتى. عاشىق بولىپ جۇرگەن بالا، سۇيگەن قىزى كەلگەن ەكەن، سوعان شىعىپ كەتكەن. بۇل ەندى جاستىق سەزىم، ماحاببات سەزىمى. ارينە، مەن ونى اقتامايمىن. قاي اتا- انا ءوزىنىڭ بالاسىن جامان بولسىن دەيدى!؟
وسى جاعدايعا بايلانىستى اقپاراتتاردان حاباردار بولىپ وتىرعان بالامنىڭ قازىرگى پسيحولوگيالىق جاعدايى مەنى قاتتى الاڭداتادى. قۇداي ساقتاسىن، وسى جاعداي بالامنىڭ تاعدىرىن تالكەككە سالىپ، قانداي دا ءبىر وقىس ارەكەتكە بارۋىنا سەبەپ بولسا، مەن دە ءوز تاراپىمنان قاراپ قالمايمىن، قولدانىستاعى زاڭ شەڭبەرىندە ارەكەت ەتەمىن.
مەن ءومىرىمنىڭ باسىم بولىگىن ۇلكەن سپورتقا ارناعان اداممىن. ون جىل س س س ر قۇراماسىندا كۇرەستىم، تاۋەلسىز قازاقستاننىڭ تۋىن تۇڭعىش رەت وليمپيادا ويىندارىندا كوتەرىپ شىقتىم. ءوزىم سپورتتى قويعاننان كەيىن، باپكەر رەتىندە ازيا، ازيا ويىندارى، الەم جانە وليمپيادا چەمپيوندارىن تاربيەلەپ شىعاردىم. مەن قازاقتىڭ ۇلى بولعانىما ماقتانامىن! قازاق ءۇشىن توگىلگەن قارا تەرىم مەن ولشەۋسىز ەڭبەگىمدى حالقىم باعالاعان، ءالى دە باعالاپ، قۇرمەتتەپ كەلەدى.
بۇگىنگى كۇندەگى ابىرويىم - وراسان ەڭبەكتىڭ ارقاسىندا كەلگەن. ال مەنىڭ ۇلىممەن بولعان ءبىر عانا جاعداي - حالىق الدىنداعى ابىرويىمدى تۇسىرە المايدى. قوعامدى دۇرلىكتىرىپ، اقپارات تاراتىپ جۇرگەندەر وسىنى تۇسىنسە ەكەن دەيمىن.
قۇرمەتتى دوستار! تاعى دا قايتالاپ ايتقىم كەلەدى، ۇلىما قاتىستى تەرگەۋ امالدارى جۇرگىزىلىپ جاتىر. ءبارى زاڭ شەڭبەرىندە شەشىلەتىن بولادى. تۇسىنىستىكپەن قاراۋدى سۇرايمىن»، - دەپ تۇيىندەدى سپورت ارداگەرى.
ەسكە سالايىق، 2-شىلدە كۇنى داۋلەت تۇرلىحانوۆتىڭ قونايەۆ گارنيزونىنىڭ اسكەري بولىمدەرىنىڭ بىرىندە مەرزىمدى اسكەري بورىشىن وتەپ جۇرگەن ۇلى نۇراسىل بولات اسكەري نىساننان قاشىپ كەتكەن بولاتىن. كەيىن ول تابىلىپ، قىزمەت اتقاراتىن ورنىنا جەتكىزىلدى.
نۇراسىل بولات الماتى قالاسىندا زاڭگەر اننا دميتريەۆيچ پەن ونىڭ كۇيەۋى ولەگ چەرنوۆتى سوققىعا جىقتى دەپ ايىپتالۋدا.
الماتى قالالىق پوليتسيا دەپارتامەنتى اتالعان دەرەكتى ق ر قىلمىستىق كودەكسىنىڭ 293-بابى («بۇزاقىلىق» ) بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەدى.
كەيىن سپورت قايراتكەرى داۋلەت تۇرلىحانوۆ بالاسىنىڭ بۇزاقىلىق ارەكەتىنە بايلانىستى تۇسىنىك بەرگەن ەدى.
