تۇركىستان وبلىسىنان قاڭلى داۋىرىنە تيەسىلى قۇندى جادىگەرلەر تابىلدى

وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ ارحەولوگيالىق جاساعى «ورداباسى» مەملەكەتتىك تاريحي- مادەني قورىعىنىڭ قىزمەتكەرلەرىمەن بىرلەسە وتىرىپ، قاڭلى داۋىرىنە تيەسىلى كونە قورىم ورنىن تاپتى. اشىق اسپان استىنداعى نىسان ورداباسى اۋدانىنا قاراستى قاراسپان اۋىلى ماڭىنداعى ورنالاسقان.

قورىمداعى ءدالىزدىڭ ۇزىندىعى 8,5 مەتر بولسا، تەرەڭدىگى - 4 مەتر قۇرايدى. جەرلەۋ كامەراسىنىڭ تەرەڭدىگى - 5,2 مەتر. مامانداردىڭ ايتۋىنشا، مۇنداي تەرەڭدىكتەگى قورىمدار بۇرىن- سوڭدى بۇل ايماقتا كەزدەسپەگەن.

سونداي- اق، ارحەولوگ عالىمدار جۇرگىزگەن قازبا جۇمىستارىنىڭ بارىسىندا سارىارىق اۋىلى ماڭىنداعى ۇڭگىردەن 2 مىڭ جىل بۇرىنعى التىن سىرعا تاۋىپ العان. بۇل قۇندى اشەكەيدىڭ جەر استىندا جاتقانىنا قانشا جىل وتسە دە سىنىن جوعالتپاپتى. سونداي- اق، كونە قورىمنان 400 مونشاقتان تۇراتىن القا مەن كۇمىس ساقينا جانە كىرپىك بوياۋعا ارنالعان بۇيىمدار شىققان. ودان بولەك، قازبا جۇمىستارىنىڭ بارىسىندا كەراميكالىق زاتتار دا تابىلدى.

«جۇرگىزىلگەن عىلىمي زەرتتەۋلەر قورىمداعى ەر ازاماتتىڭ، ايەلدىڭ جانە جاس وسكىننىڭ سۇيەگى وسىدان 2 مىڭ جىل بۇرىن جەرلەنگەن دەگەن دايەكتى دالەلدەردى كورسەتتى. قورىمنان تابىلعان زاتتار - سول داۋىردەگى قاڭلى تايپاسىنىڭ اۋقاتتى ءومىر سۇرگەندىگىن ايعاقتايدى»- دەيدى ارحەولوگ الەكساندر پودۋشكين.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى