قىزىلوردا وبلىسىندا ەگىستىككە بەرىلەتىن سۋ ليميتى قىسقارتىلدى
بۇل تۋرالى ەكولوگيا جانە تابيعي رەسۋرستار مينيسترلىگى سۋ رەسۋرستارى كوميتەتى ءتوراعاسىنىڭ ورىنباسارى سەيىلبەك نۇرىمبەتوۆ ءمالىم ەتتى، دەپ حابارلايدى قازاقپارات ءتىلشىسى.
«قىزىلوردا وبلىسىنداعى شاردارا قويماسىندا سۋدىڭ ازدىعىنا بايلانىستى شىلدەدە سۋارمالى جەرلەردى، اسىرەسە كۇرىش داقىلدارىن سۋمەن قامتاماسىز ەتۋ بويىنشا شيەلەنىستى جاعدايدىڭ تۋىنداۋى مۇمكىندىگىن جوققا شىعارمايمىز. بيىل اتالعان وڭىردە 83,9 مىڭ گا جەرگە كۇرىش ەگۋ جوسپارلانىپ، ءىس جۇزىندە 88,107 مىڭ گەكتار جەرگە ەگىلدى. بۇل - وتكەن جىلمەن سالىستىرعاندا 9,8 مىڭ گ ا ارتىق. ايتا كەتەيىن، مينيسترلىك وبلىستا كۇرىش القابىن قىسقارتۋ قاجەتتىگى تۋرالى بۇعان دەيىن بىرنەشە رەت ەسكەرتكەن بولاتىن»، - دەدى سەيىلبەك نۇرىمبەتوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ودان بولەك، مينيسترلىك وكىلى جامبىل جانە تۇركىستان وبلىسىنداعى ەگىستىكتى سۋمەن قامتۋ ماسەلەلەرىنە توقتالىپ ءوتتى.
«قىزىلوردا وبلىسىندا سۋ تاپشىلىعىنا بايلانىستى باسسەيندىك ينسپەكتسيامەن تۇراقتى سۋارۋ ءۇشىن سۋدى پايدالانۋ ليميتى قىسقارتىلدى. ال، الماتى جانە جەتىسۋ وبلىسى بويىنشا سۋ شارۋاشىلىعى جاعدايى تۇراقتى. اتالعان وبلىستارداعى بارلىق سۋ قويمالارى ۆەگەتاتسيالىق كەزەڭگە بەكىتىلگەن كەستەگە سايكەس جۇمىس ىستەيدى»، - دەيدى ول.
