الەمنىڭ تۇكپىر- تۇكپىرىنەن كەلەدى - الماتى تۋريستەردى قىزىقتىراتىن ورىنعا اينالدى
نەگىزىنەن رەسەي، ءۇندىستان، قىتاي، تۇركيا، گەرمانيا، ا ق ش ازاماتتارى الماتىنى كورۋگە نيەتتى.
قازاقپارات ءتىلشىسى شەتەلدىك مەيمانداردىڭ قازاقستان تۋرالى پىكىرىن تىڭداپ كوردى.
وسى جىلدىڭ التى ايىندا e-Qonaq تۋريستەردى تىركەۋ جۇيەسىنە 557 مىڭ شەتەلدىك تىركەلگەن.
بىلتىر وسى كەزەڭدە قازاقستانعا باسقا ەلدەردەن 144 مىڭ تۋريست كەلگەن.
«KazakhTourism» ۇ ك» ا ق تۋريستەر قازاقستانعا ءجيى كەلەتىن 10 ەلدىڭ ءتىزىمىن اتادى: رەسەيدەن - 218 مىڭ ادام، وزبەكستاننان - 142 مىڭ، قىتايدان - 31 مىڭ، ءۇندىستاننان - 16 مىڭ، قىرعىزستاننان - 15,8 مىڭ، تاجىكستان - 14 مىڭ، تۇركيادان - 12,5 مىڭ، گەرمانيادان - 10 مىڭ، ا ق ش- تان - 8 مىڭ، وڭتۇستىك كورەيادان - 6 مىڭ.
سونداي- اق ولاردىڭ قازاقستاننىڭ قاي وڭىرىنە كوبىرەك كەلەتىنى بەلگىلى بولدى. ماسەلەن، العاشقى وندىققا: الماتى - 199 مىڭ تۋريست، استانا- 105 مىڭ، اتىراۋ وبلىسى - 32,6 مىڭ، الماتى وبلىسى - 29,5 مىڭ، ماڭعىستاۋ وبلىسى - 25,6 مىڭ، اقتوبە وبلىسى - 23,2 مىڭ، شىمكەنت - 15,6 مىڭ، اقمولا وبلىسى كىردى.
قازاقپارات تىلشىلەرى «مەدەۋ» سپورت كەشەنى مەن «شىمبۇلاق» دەمالىس ورنىندا بولدى. ءدال وسى جەردە جازدا جۇمىس كۇندەرى كوپتەگەن شەتەل ازاماتتارىن كەزدەستىرۋگە بولادى.
«دوحادان الماتىعا دوستارىممەن بىرگە وسى ەلدىڭ تاريحى مەن مادەنيەتىمەن تانىسۋ ءۇشىن ادەيى ۇشىپ كەلدىك. توپتا التاۋمىز، بەس كۇن وسىندا بولامىز. كوكتوبەنى ارالاپ، قالانى جوعارىدان كوردىك، بىزگە قاتتى ۇنادى. قازاقستاندىقتاردىڭ قوناقجاي، مەيىرىمدى ەكەنىن بايقادىق. ۇلتتىق تاعامداردىڭ ءدامىن تاتىپ كوردىك، وتە ءدامدى. ەندى شارىن، كولساي كولدەرى، ەسىك كولى سياقتى ۇلتتىق ساياباقتارعا بارۋدى جوسپارلاپ وتىرىمز» ، - دەپ ءوز اسەرىمەن ءبولىستى مونيكا ەسىمدى تۋريست.
كاتاردان كەلگەن قوناقتارمەن بىرگە كەلگەن تۋريزم مەنەدجەرى ۆالەنتينا بالكەبايەۆا قازاقستان نەلىكتەن ولار ءۇشىن تارتىمدى ەكەنىنە جاۋاپ بەردى.
«قازاقستان قازىرگى ۋاقىتتا پارسى شىعاناعى تۋريستەرى اراسىندا وتە تانىمال. ولاردا جازدا وتە ىستىق بولادى. سوندىقتان ءبىزدىڭ تاۋلاردى كورۋگە، تازا اۋامەن دەمالۋعا، تاعامدارىمىزدان ءدام تاتۋعا، مادەنيەتىمىزبەن تانىسۋعا كەلەدى. ولاردىڭ باسىم بولىگى الماتىنى تاڭدايدى، ويتكەنى مۇنداعى كليمات وتە قولايلى. قازىر قازاقستانعا كاتار، بىرىككەن اراب امىرلىكتەرى، ءۇندىستان، رەسەي جانە ەۋروپا ەلدەرىنەن تۋريستەر كوبىرەك كەلەدى. مۇنىڭ ءبارى جاقسى جارنامانىڭ ارقاسىندا» ، - دەدى ول.
بىرىككەن اراب امىرلىكتەرى مەن فيليپپيننەن كەلگەن شاعىن توپتى دا كەزدەستىردىك.
«ءبارىمىز دۋبايدان كەلدىك. قازاقستاندا العاش رەت كورۋىمىز. وتە قىزىقتى جانە ادەمى ەل. كوكتوبە، شىمبۇلاقتا بولدىق، باسقا دا كورىكتى جەرلەردى ارالايتىن بولامىز. بىزگە اۋا رايى ۇنادى»، - دەدى دۋبايدان كەلگەن كيەۆين.
فيليپپيندىك تۋريستەر شىمبۇلاقتىڭ سۇلۋلىعىنا ءتانتى بولدى. ولار كۋۆەيتتە دارىگەر، ەسەپشى، زاڭگەر، ينجەنەر بولىپ جۇمىس ىستەيتىندەرىن ايتتى.
«ءبىز ساياحاتتاعاندى جاقسى كورەمىز. ءبىز الەمنىڭ ءارتۇرلى ەلدەرىندە بولدىق: ءۇندىستان، كولۋمبيا، گرۋزيا، ازەربايجان، ەۋروپا ەلدەرى. قازاقستان وتە تارتىمدى مەملەكەت، بىزگە الماتى قالاسى قاتتى ۇنادى. ءبىز تاۋلاردى، تابيعاتتى جاقسى كورەمىز، سوندىقتان شىمبۇلاققا بارۋدى ءجون كوردىك. ءبىز 3200 مەتر بيىكتىككە كوتەرىلدىك، ول جاقتاعى كورىنىس شىنىمەن تاڭ قالدىرادى. جالپى، قالا وتە قاۋىپسىز، تازا، ادامدارى مەيىرىمدى. ونىڭ ۇستىنە مۇنداعى تاعامدار وتە ءدامدى. ءبىز باقىتتىمىز» ، - دەپ جاۋاپ بەردى تۋريستەر.
تاجىربيەلى ەكسكۋرسيا جەتەكشىسى سۆەتلانا الفەروۆا قازاقستانعا الەمنىڭ تۇكپىر- تۇكپىرىنەن تۋريستەر كەلەتىنىن اتاپ ءوتتى.
ونىڭ پايىمداۋىنشا، تۋريستەر اعىنىنىڭ قارقىندى ءوسۋى كوروناۆيرۋسقا قارسى كارانتيندىك شارالار السىرەگەننەن كەيىن بايقالادى.
«شەتەلدىكتەردىڭ لەگى، اتاپ ايتقاندا، الماتىدا بايقالادى. مۇندا تۋريستەر الەمنىڭ تۇكپىر- تۇكپىرىنەن، ەڭ الدىمەن قىتايدان، كۋۆەيتتەن، بىرىككەن اراب امىرلىكتەرىنەن، اۆستراليادان، جاڭا زەلانديادان جانە ەۋروپا ەلدەرىنەن كەلەدى. قوناقتاردىڭ كوپشىلىگى قازاقستانعا العاش رەت كەلىپ جاتىر. ولاردى قازاق حالقىنىڭ مادەنيتەتى، سالت- ءداستۇرى، ادەت- عۇرپى، تاريحى مەن تابيعاتى قىزىقتىرادى. شەتەلدىكتەر قازاق حالقىنىڭ قوناقجايلىعىنا ءتانتى»، - دەيدى ول.
ونىڭ ايتۋىنشا، مەملەكەت باسشىسى ەلدەگى ءتۋريزمدى دامىتۋعا ەرەكشە كوڭىل ءبولىپ وتىر. سونىڭ ارقاسىندا قازاقستاندى وزگە ەلدەر كوبىرەك بىلە باستادى.
«قازىر تۋريستىك كومپانيالار دا الەۋمەتتىك جەلىلەردە بەلسەندى جۇمىس ىستەپ، ءوز قىزمەتتەرىن ۇسىنىپ، تۋريستەردى ءتۇرلى اكسيالار مەن باعدارلامالارمەن تارتا باستادى. كەيبىرەۋلەر اۆتورلىق تۋرلاردى ۇيىمداستىرادى. مىسالى، مەن دە سولاي ىستەيمىن - تۋريستەردى تاۋعا اپارامىن، ال ارىپتەسىم اقتاۋعا تۋرلار جاسايدى. ياعني، نارىقتا جاڭا ونىمدەر پايدا بولادى، تۋريستەردى تارتۋ ءۇشىن سىزگە جاڭا چيپتەر ويلاپ تابۋ كەرەك. سونىمەن بىرگە تابيعاتتى بۇرىنعى قالپىندا ساقتاۋ وتە ماڭىزدى»، - دەپ قوستى ول.
ساراپشىلاردىڭ پىكىرىنشە، شەتەلدىكتەردى باعا مەن ۆيزاسىز رەجيم قىزىقتىرادى. قازىر قازاقستان 26 مەملەكەتپەن ءوزارا ۆيزاسىز رەجيم ەنگىزۋ تۋرالى كەلىسسوزدەر جۇرگىزىلۋدە. ولاردىڭ قاتارىندا اۆستريا، ساۋد ارابياسى، سان- مارينو، باحرەين بار.
