كۇرىش تاپشىلىعى مەن باعانىڭ قىمباتتاۋى بولا ما
«وڭىردەگى توپىراقتىڭ تۇزدىلىعى اسەرىنەن كۇرىش پەن جوڭىشقادان باسقا داقىلدار وسە قويمايدى. وبلىس حالقىنىڭ 60 پايىزى اۋىلداردا تۇراتىندىقتان، ولاردىڭ نەگىزگى تابىس كوزى - كۇرىش ەگۋ. تابيعي كليماتتىڭ جاعدايىنا قاراي كۇرىش ءوسىرۋ باعىتى تاڭدالعان. سىرداريا وزەنى باسسەينىندەگى سۋ تاپشىلىعىن ەسكەرىپ، كەيىنگى 2 جىلدا سۋدى از قاجەت ەتەتىن مال ازىعى جانە باقشا ونىمدەرىنىڭ ەگىس كولەمىن ۇلعايتىپ، كۇرىش كولەمىن 11 مىڭ گەكتارعا ازايتتىق. وسىنىڭ سالدارىنان وڭىردە وندىرىلەتىن ءونىمنىڭ كولەمى مەن حالىقتىڭ تابىسى ءبىرشاما تومەندەپ، شارۋاشىلىقتاردىڭ بەرەشەك قارىزىنىڭ ءوسۋى جانە تۇزدانعان ەگىستىڭ جەر كولەمىنىڭ ۇلعايۋى بولدى. رەسپۋبليكادا كۇرىشتىڭ باعاسى 25,8 پايىزعا ءوستى.
ساراپشىلار وڭتۇستىك- شىعىس ازيا ەلدەرىندە جانە رەسەيدىڭ كراسنودار ولكەسىندە كۇرىش ەگىستىگىنىڭ كولەمى ازايىپ، ءونىم تاپشىلىعى 8,7 ميلليون توننا بولاتىنىن، سونداي- اق دۇنيەجۇزىلىك بانكتىڭ ساراپشىلارى 2024 -جىلى كۇرىشكە سۇرانىس ارتىپ، باعانىڭ وسەتىنىن مالىمدەپ جاتىر»، - دەدى قىزىلوردا وبلىسىنىڭ اكىمى.
ۇكىمەت وتىرىسىنان كەيىن تىلشىلەر سۇراعىنا جاۋاپ بەرگەن اۋىل شارۋاشىلىعى ءمينيسترى ەربول قاراشوكەيەۆ كۇرىش ءونىمىنىڭ كولەمى تۋرالى ايتتى.
«جالپى، ەلىمىزدىڭ ىشكى نارىعى كۇرىشپەن تولىقتاي قامتاماسىز ەتىلگەن. سونىمەن قاتار ونىڭ ءبىر بولىگىن شەتەلگە ەكسپورتتاپ جاتىرمىز. سوندىقتان كۇرىش تاپشىلىعى مەن باعانىڭ كۇرت شارىقتاۋى بولمايدى. فەرمەرلەر كۇرىشتى ۋاقىتىلى ەكتى. وسى ورايدا بيىل جاقسى ءونىم بولادى دەپ سانايمىز. ءونىم جاقسى بولسا، كۇرىش باعاسىنىڭ 2-3 ەسەگە وسۋىنە اسەر ەتەتىن فاكتورلار جوق»، - دەدى مينيستر.
