پرەمەر- مينيستر سۋدى ۇنەمدەيتىن فەرمەرلەرگە عانا سۋبسيديا بەرۋدى ۇسىندى
ەگىس القاپتارىنا جىبەرىلەتىن سۋدىڭ ءبىراز بولىگى ەسكىرگەن كانالداردىڭ سالدارىنان ىسىراپ بولىپ جاتقانىنا توقتالعان ۇكىمەت باسشىسى: «نەگىزىندە، جاز ايلارىندا سۋدىڭ شىعىنى 10-15 پايىزدان اسپاۋى ءتيىس. ول ءۇشىن بارلىق سۋارۋ كانالدارى مەن سۋ قويمالارىن جونگە كەلتىرۋ قاجەت. ونداعى بارلىق پروتسەستەردى مىندەتتى تۇردە اۆتوماتتاندىرىپ، سيفرلاندىرۋ كەرەك. اسىرەسە، سۋدى بارىنشا ۇتىمدى پايدالانۋ ماسەلەسى باستى نازاردا بولۋى ءتيىس. ول ءۇشىن اۋىل شارۋاشىلىعى مينيسترلىگى اكىمدىكتەرمەن بىرلەسىپ، داقىلداردى ءارتاراپتاندىرۋ جۇمىستارىن كۇشەيتۋى قاجەت»، - دەدى.
ونىڭ ايتۋىنشا، سۋارمالى ەگىس القاپتارىنداعى سۋ تاريفتەرىنە قاتىستى ماسەلە كوپ.
«مەملەكەت باسشىسى قولدانىستاعى تاريفتەر سۋدى ۇنەمدەپ جۇمساۋعا ىنتالاندىرماي وتىرعانىن باسا ايتتى. سوندىقتان بۇل سالاداعى تاريفتىك ساياساتتى قايتا قاراپ، ادامداردىڭ سۋعا دەگەن كوزقاراسىن دۇرىس قالىپتاستىرۋ قاجەت. جالپى ەكولوگيا جانە تابيعي رەسۋرستار، اۋىل شارۋاشىلىعى مينيسترلىكتەرى مەن ءوڭىر اكىمدىكتەرى ۆەگەتاتسيالىق كەزەڭدە بەلگىلەنگەن بارلىق جوسپارلاردى ورىنداۋ بويىنشا جۇمىستى كۇشەيتۋى ءتيىس»، - دەدى پرەمەر- مينيستر.
وسى ورايدا ول مينيسترلىكتەرگە ءبىرقاتار تاپسىرما بەردى.
«بىرىنشىدەن، ەكولوگيا، سىرتقى ىستەر مينيسترلىكتەرى مۇددەلى مەملەكەتتىك ورگاندارمەن بىرلەسىپ، سۋ ديپلوماتياسى بويىنشا ناقتى پوزيتسيانى ايقىنداپ، ونى ۇكىمەتارالىق كوميسسيالار اياسىندا ءبىزدىڭ مۇددەلەرىمىزدى ەسكەرە وتىرىپ قورعاۋدى قامتاماسىز ەتۋى قاجەت. ەكولوگيا مينيسترلىگى مەن اكىمدىكتەر سۋ شارۋاشىلىعى وبەكتىلەرىن سالۋ جانە كۇردەلى جوندەۋ جوبالارىن، سونداي- اق سۋدى ەسەپكە الۋدىڭ تسيفرلىق جۇيەلەرىن ەنگىزۋ جۇمىستارىن جالعاستىرۋى كەرەك. ەكىنشىدەن، اۋىل شارۋاشىلىعى مينيسترلىگى سۋارۋ تاسىلدەرىنە بايلانىستى سۋبسيديالاردى سارالاۋ ەرەجەلەرىنىڭ تەز ارادا قابىلدانۋىن قامتاماسىز ەتۋى قاجەت. ياعني، سۋدى ۇنەمدەۋ تەحنولوگيالارىن قولدانعان فەرمەرلەرگە عانا سۋبسيديا بەرىلۋى ءتيىس. سۋدى ءتيىمدى پايدالانۋعا ىنتالاندىرۋ، ونىڭ ىشىندە ۇنەمدەۋ جانە تامشىلاتىپ سۋارۋ تەحنولوگيالارىن ەنگىزۋ مەن جاڭبىرلاتىپ سۋارۋ قوندىرعىلارىن پايدالانۋ بويىنشا جۇمىستى كۇشەيتۋ قاجەت»، - دەدى ءاليحان سمايىلوۆ.
مۇنىمەن قوسا وبلىس اكىمدىكتەرىنە «قازسۋشار» فيليالدارىمەن بىرلەسىپ، اۋىل شارۋاشىلىعى داقىلدارىن كەزەكپەن سۋارۋدى ۇيىمداستىرىپ، قايتارىمدى سۋلاردى قايتا پايداعا جاراتۋى جۇكتەلدى. بۇل كانالدارداعى سۋ شىعىنىن ازايتۋعا جانە سۋدى ۇنەمدەپ تۇتىنۋعا مۇمكىندىك بەرەدى.
اۆتور:
رۋسلان عابباسوۆ
