داۋلەت تۇرلىحانوۆتىڭ اسكەري بولىمنەن قاشقان ۇلى جازالانا ما

«ول (نۇراسىل بولات - رەد. ) اسكەري ءبولىمنىڭ باقىلاۋىندا بولعان. ءبىراق ءوز ەركىمەن كەتىپ قالعان. اتاپ ايتقاندا، اسكەر - جاسوسپىرىم قىلمىسكەرلەردى ۇستايتىن كولونيا ەمەس. اتالعان ماسەلەگە قاتىستى تاربيەدەن بولعان كەمشىلىك دەپ سانايمىن»، - دەدى رۋسلان جاقسىلىقوۆ ۇكىمەت وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

بۇل تۇرعىدا ول وتباسىندا جاستاردىڭ تاربيەسىندەگى كەمشىلىكتەردى اسكەر قاتارىندا بىردەن ەڭسەرۋ مۇمكىن ەمەس ەكەنىن ايتتى.

«ونىڭ اسكەري بولىمنەن كەتىپ قالۋىنا جول بەرگەن وفيتسەرلەر تارتىپتىك جازاعا تارتىلادى. ال اسكەري قىزمەتشىگە قاتىستى جازانى سوت انىقتايدى. گاۋپتۆاحتاعا قامالۋى مۇمكىن»، - دەدى مينيستر.

بۇدان بۇرىن حابارلانعانداي، دەپۋتات، سپورت ارداگەرى داۋلەت تۇرلىحانوۆتىڭ ۇلى قونايەۆ گارنيزونىنىڭ اسكەري بولىمدەرىنىڭ بىرىنەن قاشىپ كەتكەن بولاتىن. كەيىن ول تابىلىپ، قىزمەت اتقاراتىن ورنىنا جەتكىزىلدى.

نۇراسىل بولات الماتى قالاسىندا زاڭگەر اننا دميترييەۆيچ پەن ونىڭ كۇيەۋى ولەگ چەرنوۆتى سوققىعا جىقتى دەپ كۇدىككە ءىلىندى.

الماتى قالالىق پوليتسيا دەپارتامەنتى اتالعان دەرەكتى ق ر قىلمىستىق كودەكسىنىڭ 293-بابى («بۇزاقىلىق» ) بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەدى.

كەيىن سپورت قايراتكەرى داۋلەت تۇرلىحانوۆ بالاسىنىڭ بۇزاقىلىق ارەكەتىنە بايلانىستى تۇسىنىك بەردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى