استانادا الەمنىڭ اسكەري وركەسترلەرى ونەر كورسەتەدى
6 -شىلدەدەن باستاپ، ءۇش كۇن قاتارىنان، قالانىڭ ءارتۇرلى الاڭدارىندا ازەربايجان، ءۇندىستان، قىتاي، رەسەي، تۇركيا، وزبەكستان جانە جاپونيا قارۋلى كۇشتەرىنىڭ مۋزىكالىق ۇجىمدارى ونەر كورسەتەتىن بولادى. پاكىستان دەلەگاتسياسى بايقاۋشى رەتىندە كەلمەك.
قازاقستان اتىنان مەملەكەتتىك كۇزەت قىزمەتىنىڭ پرەزيدەنتتىك وركەسترى، قارۋلى كۇشتەر ۇلتتىق اسكەري- پاتريوتتىق ورتالىعىنىڭ ورتالىق اسكەري وركەسترى جانە ۇلتتىق ۇلاننىڭ ۇلگىلى- كورسەتىلىمدى وركەسترى قاتىسادى.
5 -شىلدە كۇنى ساعات 12.00-دە ورتالىق كوممۋنيكاتسيالار قىزمەتىندە قورعانىس مينيسترلىگىنىڭ وكىلدەرى وتكىزىلەتىن ءىس- شارانىڭ ەرەكشەلىكتەرى مەن ماقساتتارى تۋرالى ەگجەي- تەگجەيلى ايتىپ بەرەدى.
كورسەتىلىمدەردى Band Marathon باستايدى. ول 6 -شىلدەدە ساعات 19.30-دا ەسىل وزەنىنىڭ جاعاسىنداعى جازعى امفيتەاتردا وتەدى.
7 -شىلدە ساعات 20.00-دە ەلوردانىڭ ءتۇرلى الاڭدارىندا وتەتىن شوۋدىڭ قويىلىمى قالا تۇرعىندارى ءۇشىن ەرەكشە سىيلىق بولماق. ورتالىق ساياباقتا قازاقستان پرەزيدەنتتىك وركەسترى مەن ءۇندىستان، وزبەكستان جانە جاپونيانىڭ اسكەري ۇجىمدارى ونەر كورسەتەدى. «بايتەرەك» مونۋمەنتىندە قازاقستان، رەسەي جانە تۇركيا قورعانىس مينيسترلىكتەرىنىڭ وركەسترلەرى ءوز باعدارلامالارىن ۇسىنادى. ال «حان شاتىر» ساۋدا- ويىن- ساۋىق ورتالىعىندا ازەربايجان، قىتاي جانە قازاقستان ۇلتتىق ۇلانىنىڭ وكەسترلەرى ونەر كورسەتپەك.
ءىس- شارالار 8- شىلدەدە «بارىس ارەنا» مۇز سارايىندا وتەتىن گالا- كونسەرتپەن اياقتالادى. باستالۋى ساعات 12.00-دە. وندا كورەرمەندەر وركەسترلەر دەفيلەسى، ولاردىڭ بىرلەسكەن قويىلىمدارى جانە مۋزىكالىق توسىنسىيلارى بار قىزىقتى مۋزىكالىق- تەاترلاندىرىلعان قويىلىمنىڭ كۋاسى بولادى.
ازەربايجان رەسپۋبليكاسى گەيدار اليەۆ اتىنداعى اسكەري ينستيتۋتى وركەسترىنىڭ رەپەرتۋارىندا زۋرنا مەن بالاباننىڭ سيقىرلى دىبىستارى بار ارميا شەرۋلەرى مەن ۇلتتىق اۋەندەر بار. XIV عاسىرعا دەيىن ازەربايجان ونەرى تاياۋ شىعىس حالىقتارىنىڭ مۋزىكالىق داستۇرلەرىمەن تىعىز بايلانىستى بولدى. مۇنى شىعىس مۋزىكاسىنان حابارى بار سەزىمتال كورەرمەن بىردەن اڭعارماق.
ءۇندىستان اسكەري- اۋە كۇشتەرى وركەسترىنىڭ مۋزىكانتتارى كورەرمەندى ءتۇرلى ءتۇستى، ەرەكشە فورماسىمەن جانە كومپوزيتسيالارىنىڭ ەرەكشەلىگىمەن تاڭعالدىراتىن بولادى. وندا ءداستۇرلى ەۋروپالىق اسپاپتاردىڭ دىبىسى ءۇندى سيتارى مەن سارودىنا باسا نازار اۋدارىلادى.
حالىقتىڭ باي مادەني تاجىريبەسىن مۇرا ەتكەن قىتاي حالىق- ازاتتىق ارمياسى اسكەري وركەسترىنىڭ قويىلىمىندا تىڭداۋشىلار ەجەلگى مۋزىكالىق داستۇرلەردى دە، وركەستر ونەرىنىڭ قازىرگى تەندەنسيالارىن دا تۇسىنە الادى.
ساپتىق، كلاسسيكالىق جانە دجاز اۋەندەرىمەن رەسەي قورعانىس مينيسترلىگى باتىس اسكەري وكرۋگىنىڭ 23- اسكەري وركەسترى ونەر كورسەتەدى. ورىس مۋزىكانتتارىنىڭ ورىنداۋ ءتاسىلى شەبەرلىكپەن، ينتوناتسيانىڭ تازالىعىمەن جانە نازىك نيۋانستارىمەن ەرەكشەلەنەدى.
تۇركيانىڭ سان عاسىرلىق مۋزىكالىق داستۇرلەرى «مەحتەران» اسكەري وركەسترىنىڭ ورىنداۋشىلىق مادەنيەتىنەن بايقالدى. تۇرىك اسكەري مۋزىكاسى ەۋروپالىق اسكەرلەردىڭ براۆۋر مارشىنا استە ۇقسامايدى. اتاقتى موتسارتتىڭ «تۇرىك مارشى» دا حالىقارالىق فەستيۆال باعدارلاماسىندا مىندەتتى تۇردە ورىندالاتىنى كوڭىل قۋانتادى.
وزبەك كەرنەيىنىڭ دىبىسى دا قازاققا جاقىن. بۇل باۋىرلاس حالىقتاردىڭ مۋزىكالىق داستۇرلەرىنىڭ جاقىندىعىن كورسەتەدى.
تايكو باراباندارى - جاپون اسكەري وركەسترىن تانىمال ەتىپ كەلە جاتقان ءداستۇرلى اسپاپ. ەجەلگى نانىم بويىنشا، ولار شايقاستا جاۋدىڭ ۇرەيىن ۇشىرىپ، كوماندالاردى جەتكىزىپ، جاۋىنگەرلىك مانيەۆرلەردى ۇيلەستىرگەن. فەستيۆالدە جاپونيانىڭ ءوزىن- ءوزى قورعاۋ تەڭىز كۇشتەرىنىڭ «توكيو بەند» وركەسترى استانالىقتارعا ەجەلگى اسكەري مۋزىكا مەن زاماناۋي مارشتاردىڭ ۇلگىلەرىن ۇسىنباق.
استانا كۇنىنە وراي ۇيىمداستىرىلعان حالىقارالىق اسكەري وركەسترلەر فەستيۆالى قازاقستاننىڭ ىنتىماقتاستىق پەن تاتۋ كورشىلىككە دەگەن ۇمتىلىسىن كورسەتەدى. مۋزىكا مەن ونەر ءتىلى قۋاتتى بىرىكتىرۋشى كۇش رەتىندە قىزمەت ەتەدى.
