ۇكىمەت باسشىسى: ماڭعىستاۋ اتوم ەنەرگەتيكا كومبيناتىنداعى اپاتقا كىنالىلەر جاۋاپقا تارتىلادى

«مەملەكەت باسشىسىنىڭ تاپسىرماسىنا سايكەس، پرەمەر- ءمينيستردىڭ توراعالىعىمەن اپاتتىڭ سەبەپتەرىن تەكسەرۋ ءۇشىن ارنايى مەملەكەتتىك كوميسسيا قۇرىلدى. كىنالىلەر جاۋاپقا تارتىلادى.

قازىرگى تاڭدا ەڭ باستىسى - بارلىق كاسىپورىنداردىڭ جۇمىسىن قالپىنا كەلتىرىپ، تۇتىنۋشىلاردى ەلەكتر ەنەرگياسىمەن تولىعىمەن قامتاماسىز ەتۋ»، - دەگەن ءاليحان سمايىلوۆ، جاعدايدى رەتتەۋگە باعىتتالعان بىرنەشە تاپسىرما بەردى.

«ءبىرىنشى. ماڭعىستاۋ وبلىسىنىڭ اكىمدىگى ەنەرگەتيكالىق كومبيناتتىڭ قولدانىستاعى جابدىقتارىن ىسكە قوسۋ جانە جاڭعىرتۋ بويىنشا شارالار قابىلداۋى ءتيىس.

ەكىنشى. ەنەرگەتيكا مينيسترلىگى «KEGOC» كومپانياسىمەن بىرلەسىپ، باتىس ەنەرگەتيكالىق تورابىنىڭ قالىپتى جۇمىسىن قامتاماسىز ەتۋى كەرەك.

ءۇشىنشى. ەنەرگەتيكا مينيسترلىگى ىشكى ىستەر مينيسترلىگىمەن، باسەكەلەستىكتى قورعاۋ اگەنتتىگىمەن بىرگە الىپ- ساتۋ جانە جانار- جاعارمايدىڭ جاساندى تاپشىلىعىن تۋعىزۋ فاكتىلەرىنە توسقاۋىل قويۋى قاجەت»، - دەدى پرەمەر- مينيستر.

ەسكە سالايىق، كەشە كەشكە اتىراۋدا بىرنەشە شاعىناۋداندا جارىق ءسونىپ قالعان بولاتىن.

ارتىنشا جەرگىلىكتى ەنەرگەتيكالىق كەشەننىڭ باسپا ءسوز قىزمەتى ەلەكتر قۋاتىنىڭ ءوشۋ سەبەبىن ايتتى.

ساعات 21.30-دا اتىراۋ وبلىسى اكىمدىگى جارىقتىڭ جانعانىن حابارلادى.

پرەزيدەنت قاسىم- جومارت توقايەۆ اتىراۋ مۇناي وڭدەۋ زاۋىتى مەن ماڭعىستاۋ اتوم ەنەرگەتيكا كومبيناتىندا تۋىنداعان جاعداي بويىنشا مەملەكەتتىك كوميسسيا قۇرۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى