پارانى تالاپ ەتكەنى ءۇشىن جازا: قىلمىستىق كودەكسكە جاڭا باپ ەنگىزىلمەك
اشىق ن ق ا پورتالىندا جاريالانعان كودەكستىڭ جاڭا رەداكسياسىندا سىبايلاس جەمقورلىققا قارسى ءىس- قيمىل اگەنتتىگى وسىنداي باستاما كوتەرگەن، دەپ حابارلايدى قازاقپارات ءتىلشىسى.
«مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن ادامنىڭ نە وعان تەڭەستىرىلگەن ادامنىڭ نەمەسە جاۋاپتى مەملەكەتتىك لاۋازىمدى اتقاراتىن ادامنىڭ نە لاۋازىمدى ادامنىڭ، سول سياقتى شەت مەملەكەتتىڭ نەمەسە حالىقارالىق ۇيىمنىڭ لاۋازىمدى ادامىنىڭ پارا بەرۋشىنىڭ نەمەسە ول وكىلدىك ەتەتىن ادامداردىڭ پايداسىنا جاساعان ارەكەتتەرى (ارەكەتسىزدىگى) ءۇشىن وزىنە نەمەسە باسقا ادامدارعا پارانى سۇراۋى نەمەسە تالاپ ەتۋى - بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، 2000 ا ە ك- كە (6900000 مىڭ تەڭگە) دەيىن ايىپپۇل سالۋعا نە سول مولشەردە 600 ساعاتقا دەيىن قوعامدىق جۇمىستارعا تارتۋعا نە 2 جىلعا دەيىن باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى»، - دەلىنگەن اشىق ن ق ا پورتالىندا جاريالانعان كودەكستىڭ جاڭا رەداكسياسىندا.
الايدا، پارا تالاپ ەتكەن ادام ءوزىنىڭ ارەكەتى تۋرالى قۇقىق قورعاۋ ورگاندارى مۇنى اشكەرەلەمەي تۇرىپ حابارلاسا، جازاعا تارتىلمايدى.
«پارا بەرۋ ءوتىنىشىن نەمەسە تالابىن بىلدىرگەن ادام، ەگەر ول قۇقىق قورعاۋ ورگانىنا نەمەسە ارناۋلى مەملەكەتتىك ورگانعا وسى فاكتى تۋرالى اتالعان ورگاندارعا ءمالىم بولعانعا دەيىن پارانى سۇراعانى نەمەسە تالاپ ەتكەنى تۋرالى ءوز ەركىمەن حابارلاسا، قىلمىستىق جاۋاپتىلىقتان بوساتىلادى»، - دەلىنگەن قۇجاتتا.
ايتا كەتەيىك، قولدانىستاعى قىلمىستىق كودەكستە مۇنداي باپ جوق.
«ءبىزدىڭ ويىمىزشا، «پارا سۇراۋ» جانە «پارا تالاپ ەتۋ» بىردەي ۇعىم ەمەس، ءبىراق ەكەۋى دە قوعامدىق تەرىس سيپاتقا يە. سوندىقتان پارا سۇراعانى ءۇشىن دە، تالاپ ءۇشىن دە قىلمىستىق جاۋاپكەرشىلىك بەلگىلەۋ ۇسىنىلادى. ايتپەسە، كىنالى ادام پارا سۇراعانىن، ءبىراق تالاپ ەتپەگەنىن نەمەسە كەرىسىنشە، دالەلدەپ جازادان قۇتىلا الادى دەپ ويلايمىز»، - دەپ وزگەرىسكە تۇسىندىرمە بەرگەن سىبايلاس جەمقورلىققا قارسى ءىس- قيمىل اگەنتتىگى.
قۇجات 17-شىلدەگە دەيىن كوپشىلىك تالقىلاۋدا بولادى.
