ارمانجان بايتاسوۆ ازيا داۋىسى فەستيۆالى تۋرالى: كونسەرت ءۇش كۇن وتەدى

بۇل تۋرالى Jibek Joly تەلەارناسىنداعى «جاڭا تۇنگى ستۋديا» باعدارلاماسىندا فەستيۆالدىڭ باس پروديۋسەرى ارمانجان بايتاسوۆ ايتتى، دەپ حابارلايدى قازاقپارات ءتىلشىسى.

اراعا 19 جىل سالىپ اتالمىش جوبا ۇلكەن ساحناعا قايتا ورالدى.

«وسىنىڭ الدىندا «ازيا داۋىسى» 2004 -جىلى ۇيىمداستىرىلعان ەدى. بۇل كونكۋرستى قايتا جاڭعىرتۋعا كوپ ادام ۇلەس قوسقىسى كەلدى. «ازيا داۋىسىن» ، الماتىنى، «مەدەۋ» مۇز ايدىنىن ءوزارا اجىراتۋعا بولمايدى، بۇل قۇندىلىقتارىمىز ءبىر-بىرىمەن تىعىز بايلانىستى. وسىنداي اۋقىمدى مادەني ءىس- شارالاردى ۇيىمداستىرۋ تۋريستەردى تارتۋعا، قالانىڭ تانىمالدىعىن كوتەرۋگە ەلەۋلى ۇلەس قوسادى. قازاقستان ءۇشىن «ازيا داۋىسى» ماڭىزدى جوبا دەپ سانايمىن»، - دەدى ا. بايتاسوۆ.

وسى ورايدا ول «ازيا داۋىسى» جوباسى ونەر سۇيەر قاۋىم ءۇشىن تارتىمدى ەكەنىن ايتتى.

«فەستيۆال ءبىرازدان بەرى وتكىزىلمەسە دە، بۇل برەندتى كوپشىلىك ۇمىتا قويعان جوق. «ازيا داۋىسىنا» قاتىستى كوپتەگەن جاقسى ەستەلىكتەر، ناتيجەلى يدەيالار بار. اتاپ ايتقاندا، 28-شىلدەدەن باستاپ ءۇش كۇن قاتارىنان كونسەرت بولادى. 30-شىلدەدە تانىمال توپتار، انشىلەر ونەر كورسەتەدى»، - دەدى ارمانجان بايتاسوۆ.

بۇدان بۇرىن حابارلانعانداي، بىلتىر قازان ايىنىڭ باسىندا الماتى اكىمى ەربولات دوسايەۆ «ازيا داۋىسى» فەستيۆالىن قايتا جاڭعىرتۋدى جوسپارلاپ وتىرعانىن ايتتى.

كەيىن فەستيۆال 2023 -جىلدىڭ شىلدە ايىنىڭ سوڭىنا جوسپارلانعانى بەلگىلى بولدى.

«ازيا داۋىسى» حالىقارالىق فەستيۆالىنە شەتەلدەگى قانداستارىمىز دا قاتىسپاق.

1990 -جىلى «ازيا داۋىسى» حالىقارالىق مۋزىكالىق فەستيۆالىندە العاش رەت 15 مەملەكەتتەن كەلگەن قاتىسۋشى «مەدەۋ» مۇز ايدىنىندا ونەر كورسەتكەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى