وسكەمەن پوليتسەيلەرى الاياقتىقتىڭ الدىن الۋ ءۇشىن جاڭا ءادىس ويلاپ تاپتى - فوتو
قالالىق پوليتسيا باسقارماسى باسپا ءسوز قىزمەتىنىڭ مالىمەتىنە سۇيەنسەك، ءتارتىپ ساقشىلارى الاياقتىقتىڭ، ونىڭ ىشىندە اسىرەسە ينتەرنەت- الاياقتىقتىڭ جولىن كەسۋ ماقساتىندا ءتۇرلى پروفيلاكتيكالىق شارالار جۇرگىزىپ جاتىر.
قازىرگى ۋاقىتتا پوليتسيا قىزمەتكەرلەرى كوشەلەردە الاياقتار تۋرالى ەسكەرتۋ ترافارەتتەرىن جاسادى.
«جەرگە جازىلعان وسىنداي ەسكەرتۋلەردى جول قيىلىستارىندا، جاياۋ جۇرگىنشىلەر وتكەلدەرىنىڭ الدىندا، بانكتەردىڭ ماڭىندا جانە باسقا دا قوعامدىق ورىنداردان كورۋگە بولادى. سونداي- اق ادام كوپ جينالاتىن ورىنداردا الاياقتاردان اباي بولۋ قاجەتتىگى تۋرالى جادىنامالار ورنالاستىرىلدى»، - دەلىنگەن اقپاراتتا.
وسى رەتتە پوليتسيا باسقارماسى تۇرعىندارعا وزدەرىن ينتەرنەت- الاياقتاردان قورعاۋ ءۇشىن كەلەسى ەرەجەلەردى ەستە ساقتاۋ كەرەكتىگىن ەسكەرتەدى:
- الەۋمەتتىك جەلىدەگى كۇماندى ۇسىنىستاردان باس تارتىڭىز؛
- تاۋاردى ساتىپ الۋ (ساتۋ) كەزىندە الدىن الا تولەم جاساۋعا ەش ۋاقىتتا كەلىسپەڭىز؛
- تانىمايتىن ادامدارعا اقشا اۋدارماڭىز؛
- ءۇشىنشى تۇلعالارعا بانك كارتالارىنىڭ نومىرلەرىن، پين- كودتاردى، ۇيالى تەلەفونعا كەلىپ تۇسكەن كىلت سوزدەردى جىبەرمەڭىز.
