ادامنىڭ جىنىسى ءومىر بويى وزگەرمەيدى دەگەن پىكىرى ءۇشىن جۇمىستان قۋىلعان ايەل سوتتا جەڭىپ شىقتى
2019 -جىلى مايا جاھاندىق دامۋ ساراپتامالىق ورتالىعىندا (CGD) سالىق ساراپشىسى بولىپ جۇمىس ىستەپ جۇرگەن.
سول جىلى ناۋرىز ايىندا ول ءوزىنىڭ Twitter پاراقشاسىندا ادام نە ىستەسە دە، بيولوگيالىق جىنىسىن وزگەرتە المايتىنى تۋرالى پوست جازادى.
سول تۆيتتەن كەيىن جۇمىس ورنى مايامەن كەلىسىمشارتتى ءارى قاراي سوزباي قويعان.
ەڭبەك داۋلارىن رەتتەۋ تريبۋنالى ونىڭ كەلىسىمشارتىن ۇزارتپاۋ تۋرالى شەشىم كىسىنى كەمسىتۋگە جاتادى دەگەن قورىتىندىعا كەلدى.
سوت وتەماقى رەتىندە بۇرىنعى جۇمىس ورنىن ايەلگە 91,5 مىڭ فۋنت ستەرلينگ جانە ونى كەشىكتىرگەنى ءۇشىن تاعى 15 مىڭعا جۋىق فۋنت ستەرلينگ ءوسىمپۇل تولەۋدى مىندەتتەدى.
Sex Matters («جىنىس ماڭىزدى») اقپارات ناۋقانىن باستاعان فورستەيتەر كەز كەلگەن ادامنىڭ بيولوگيالىق جىنىسى ءومىر بويى وزگەرىسسىز قالادى جانە ونى گەندەرلىك سايكەستىكپەن شاتاستىرۋدىڭ قاجەتى جوق دەپ سانايدى.
ونىڭ ايتۋىنشا، سوت شەشىمى جۇمىس بەرۋشىلەرگە «مۇنىڭ ناعىز كەمسىتۋ» ەكەنىن انىق كورسەتىپ وتىر.
فورستەيتەردى جەڭىسىمەن ءبىرىنشى بولىپ قۇتتىقتاعاندار قاتارىندا گارري پوتتەر تۋرالى كىتاپتاردىڭ اۆتورى، جازۋشى دجوان روۋلينگ بار.
ول دا كەزىندە گەندەرلىك ماسەلەدەگى ۇستانىمى ءۇشىن بىرنەشە رەت الەۋمەتتىك جەلىدە جەككورىنىشكە ۇشىراپ، مازاققا اينالعان بولاتىن.
سۋديالاردىڭ پىكىرى دە ەكىگە ءبولىندى.
فورستەيتەر 2019 -جىلى جۇگىنگەن ءبىرىنشى ساتىداعى سوت ونىڭ شاعىمىن قاناعاتتاندىرۋدان باس تارتتى. سۋديا تالاپكەردىڭ كوزقاراسى «دەموكراتيالىق قوعامدا قۇرمەتكە لايىق ەمەس» دەپ مالىمدەدى.
سودان كەيىن مايا اپەللياتسيالىق شاعىم ءتۇسىردى جانە ەكى جىلدان سوڭ جوعارعى سوتتىڭ سۋدياسى ونى قولدادى.
ول فورستاتەردىڭ بۇل ماسەلە بويىنشا جەكە پىكىرگە قۇقىعى بار ەكەنىن جانە ول 2010 -جىلى پارلامەنت قابىلداعان تەڭدىك تۋرالى زاڭمەن قورعالعانىن ايتتى.
ءىس قايتا قاراۋعا جىبەرىلدى.
ءسويتىپ وتكەن جىلى شىلدەدە اپەللياتسيا سوتى مايانى جەكە كوزقاراسى ءۇشىن «تىكەلەي ديسكريميناتسياعا» ۇشىراعان دەپ شەشتى.
وتەماقى تاعايىنداۋ تۋرالى سوڭعى سوت شەشىمىنە جاۋاپ بەرگەن CGD وكىلى ورتالىقتىڭ ءارقاشان ءوز قىزمەتكەرلەرىنە قاۋىپسىز جانە ينكليۋزيۆتى اتموسفەرا قامتاماسىز ەتۋگە تىرىساتىنىن اتاپ ءوتتى.
