لوندون قازاقتارى بيگ- بەن الدىنا كۇي تارتتى
فلەشموبقا جەرگىلىكتى حالىق پەن شەتەلدىك تۋريستەر كۋا بولىپ، قازاق ونەرىنىڭ قۇدىرەتىنە ءتانتى بولدى، دەپ حابارلايدى قازاقپارات مەنشىكتى ءتىلشىسى.
ەركىن بەكبايەۆ - قازاقستاندا دۇنيەگە كەلىپ، ۇلىبريتانيادا وسكەن وتانداسىمىز. 16 جاسىندا ءبىلىم قۋىپ، تۇماندى البيونعا كەتكەن ول تىلدىك ورتانىڭ جوقتىعىنان قازاقشانى ءسال ۇمىتىڭقىراپ قالعان. ءبىراق اتاسى ۇيرەتكەن دومبىرا تارتۋ ونەرىن ەستەن شىعارماعان. شارالارعا ۇنەمى اسپابىن وزىمەن بىرگە الىپ جۇرەتىن ەركىن بۇل جولى دا داستۇرىنەن جاڭىلمادى.
«مەن بۇگىن «اداي»، «اتا تولعاۋ» كۇيلەرىن ورىندادىم. سونداي- اق «قارا جورعا»، «دومبىرا» اندەرىن دە ايتتىم. جاھاندانۋ داۋرىندە، شەتەلدە وسكەن قازاق بالالارى ءۇشىن كىم ەكەنىڭدى ۇمىتىپ قالۋ قاۋپى وتە جوعارى. دومبىرا ماعان ءتول مادەنيەتىمدى ەستەن شىعارماۋعا مول مۇمكىندىك بەرەدى»، - دەدى ەركىن بەكبايەۆ.
شارانىڭ ۇيىمداستىرۋشىسى قازاقستاننىڭ ۇلىبريتانياداعى ەلشىلىگى. ماقسات - دومبىرا كۇنىنە وراي لوندوندا جۇمىس نەمەسە وقۋ بابىمەن ۋاقىتشا تۇرىپ جاتقان وتانداستىرىمىزدىڭ باسىن بىرىكتىرىپ، شەتەلدىكتەرگە ۇلتتىق ونەرىمىز بەن مادەنيەتىمىزدى پاش ەتۋ. فلەشموبقا كورشى قالالاردان كەلگەن قازاق ستۋدەنتتەرى دە قاتىستى.
«سوناۋ كوۆەنتريدەن، ەكى ساعاتتىق جەردەن تاڭعى التىدا تۇرىپ، وسى جەرگە كەلدىك. دومبىرامىزدىڭ ءۇنىن ەستىرتىپ جاتقانىمىز وتە- وتە جاقسى. سولاي ءبىزدى تاني باستايدى، ەلىمىزدىڭ اتى شىعادى»، - دەيدى «بولاشاق» باعدارلاماسىمەن دوكتورانتۋرادا وقىپ جاتقان ستۋدەنت اسەم ايماعانوۆا.
بيگ- بەن جانىندا جۇرگەن شەتەلدىك تۋريستەردىڭ ۇلتتىق اسپابىمىزعا دەگەن قىزىعۋشىلىعى وتە جوعارى بولدى. ا ق ش، اۆستريا، ءۇندىستان ازاماتتارى اۋەلەگەن اسەم اندەردى ۇيىپ تىڭداپ، تاڭدانىستارىن جاسىرمادى. ۇلتتىق كيىم كيگەن جاستارمەن فوتوعا ءتۇسىپ، دومبىرا تۋرالى اقپارات الدى. كەيبىرى، ءتىپتى، مۋزىكالىق اسپاپتا ويناپ تا كوردى.
«قىزىم مۋزىكا جاقسى كورەدى. اسپاپتىڭ داۋىسىن ەستىپ، ۇيىپ تىڭداي جونەلدى. ءبىز دە دومبىرانىڭ اسەم ۇنىنە ءتانتى بولدىق. قوس ىشەكتەن عانا تۇرسا دا اۋەزدى ءۇنى كەرەمەت اسەرگە بولەيدى ەكەن»، - دەيدى اۆستريا ازاماتى دجۋداس ۋولتەر.
«مەن بۇرىن گەوگرافيانى جاقسى كورەتىنمىن. ول مەنىڭ حوببيىم بولدى. قازاقستان ورتالىق ازيادا ورنالاسقان ەل ەكەنىن بىلەمىن. رەسەي، وزبەكستان، قىرعىزستانمەن شەكارالاسادى. سىزدەردە جىلقى ءوسىرۋ مادەنيەتى جاقسى دامىعان»، - دەيدى ا ق ش ازاماتى كەيسي دجەيمس.
الداعى ۋاقىتتا اباي قۇنانباي ۇلى كوزى تىرىسىندە پايدالانعان دومبىراسىنىڭ كوشىرمەسىن بريتان مۇراجايىنا تابىستاۋ جوسپاردا بار. قازىرگى ۋاقىتتا دايىندىق جۇمىستارى ءجۇرىپ جاتىر. جۋىق ارادا ۇلى اقىننىڭ عيبراتتى عۇمىرى مەن شىنايى شىعارماشىلىعىنان حاباردار الەم حالقى ەندى وعان تيەسىلى قۇندى جادىگەردى دە تاماشالاي الاتىن بولادى.
