اتىراۋ مۋزەيىندە تانىمال كۇيشىلەردىڭ دومبىراسى ساقتاۋلى تۇر

مۋزەي ديرەكتورى مۇحانبەتقالي كيپيەۆتىڭ ايتۋىنشا، مۋزەي قورىندا كۇيدى كەيىنگى ۇرپاققا جەتكىزۋگە ۇلەس قوسقان تانىمال ونەر ادامدارىنىڭ دومبىرالارى ساقتالعان. بىلتىردان بەرى قوس ىشەكتى اسپاپتىڭ قاتارى بىرنەشە دومبىرامەن تولىققان.

ماسەلەن، مەملەكەت جانە قوعام قايراتكەرى، ۇلتتىڭ ونەردىڭ جاناشىرى يمانعالي تاسماعامبەتوۆ ءۇش دومبىرا تاپسىرعان. ونىڭ ءبىرىنشىسى - كۇيشى، كومپوزيتور، قازاقستاننىڭ ەڭبەك سىڭىرگەن ءارتىسى سەكەن تۇرىسبەكوۆتىڭ دومبىراسى.

ۇلتتىق اسپاپتىڭ شاناعى - بۇيرا قايىڭ، بەتى - ەۋروپالىق شىرشا، مويىنى - قاراعاي، تيەگى - بۋبينگا، ويۋى سۇيەك ۇنتاعىمەن كومكەرىلگەن. دومبىرانى شەبەر قۋانىش تولەبايەۆ جاساعان.

ەكىنشىسى - كۇيشى- دومبىراشى، قازاقستاننىڭ ەڭبەك سىڭىرگەن ءارتىسى ايگۇل ۇلكەنبايەۆانىڭ دومبىراسى. شەبەر نۇربەك ادىلبەكوۆتىڭ قولىنان شىققان دومبىرانىڭ شاناعى، مويىنى جانە باسىنا - كانادالىق ۇيەڭكى، بەتىنە شىرشا اعاشى قولدانىلعان.

ءۇشىنشىسى - كۇيشى- دومبىراشى، قازاقستاننىڭ ەڭبەك سىڭىرگەن قايراتكەرى اسىلبەك ەڭسەپوۆتىڭ دومبىراسى. بۇل دومبىرانى جاساعان كەزدە شەبەر جولاۋشى تۇردىعۇلوۆ اسپاپتىڭ شاناعى مەن تيەگىنە قارا اعاشتى، بەتىنە تيان- شان شىرشاسىن، موينىنا ماي قاراعايدى پايدالانعان. ال، مويىن بەتىنە قىزىل اعاشتى باسى مەن قۇلاعىنا ۇيەڭكىنى قيۋلاستىرعان.

مۇندا قازاقستاننىڭ ەڭبەك سىڭىرگەن قايراتكەرى، پروفەسسور كاريما ساحاربايەۆانىڭ ءوزى تاپسىرعان دومبىرا ساقتاۋلى تۇر. ەكى ىشەكتى، ون سەگىز پەرنەلى دومبىرانىڭ بەت تاقتايى ورنەكتەلگەن. تۇبىنە ىشەك بايلاناتىن كىندىك اعاش ورناتىلعان. دومبىرا ساز اسپاپتارىن جاساۋشى شەبەر بيسەنعالي مىرزاعاليەۆتىڭ قولىنان شىققان.

تاعى ءبىر اسپاپ - «اسىل دومبىرا-2022» اقىندار ايتىسىنىڭ اقتىق سايىسىندا ونەر كورسەتكەن جەرگىلىكتى اقىندار شىناربەك قابيەۆ، سىرىمبەك سارسەمبايەۆ جانە شالقارباي ءىزباساروۆ يەلەنگەن دومبىرا. مۋزەي قورىنا «حابار» اگەنتتىگى» ا ق باسقارما ءتوراعاسى بەرىك ءۋالي مەن «Assyltas» قوعامدىق قورىنىڭ ديرەكتورى دۋلات تاستەكەيەۆ تاپسىرعان.

ال، بيىلعى 17-مامىردا ۇرپاقتان- ۇرپاققا جەتكەن دومبىرانىڭ ءبىرىن ق. قايسەنوۆ اتىنداعى №33 ورتا مەكتەپ مۋزەيىنىڭ جەتەكشىسى ت. جيەناليەۆا اكەلگەن. دومبىرانى ب. دوسباي ۇلى ۇرپاعىنا اماناتتاپ، بىرنەشە بۋىنعا جەتكىزگەن. كەيىن كونەنىڭ كوزىندەي ساقتالعان ۇلتتىق اسپاپتى كەلىنى ك. نابييەۆا 2011 -جىلى مەكتەپ جانىنداعى مۋزەيگە بەرگەن. بۇل دومبىرا بيىل وبلىستىق تاريحي- ولكەتانۋ مۋزەيىندە وتكىزىلگەن «قوعامدىق مۋزەيلەر قازىناسى» وبلىستىق كورمە- بايقاۋىندا ۇزدىك تۋىندى رەتىندە تانىلعان.

فوتو: اتىراۋ وبلىستىق تاريحي- ولكەتانۋ مۋزەيىنىڭ قورىنان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى