ديماش قۇدايبەرگەن وزبەكستانداعى تولە بي كەسەنەسىنە باردى
Dimashnews.com سايتىندا جازىلعانداي، ديماش قۇدايبەرگەن اكەسى قانات ايتبايەۆپەن بىرگە وزبەكستان رەسپۋبليكاسىنىڭ مادەنيەت جانە تۋريزم ءمينيسترى وزودبەك نازاربەكوۆپەن كەزدەستى.
وزبەكستان استاناسى تاشكەنتتە وتكەن كەزدەسۋدە دوستىق قارىم- قاتىناس پەن مادەني قۇندىلىقتارمەن الماسۋدىڭ ماڭىزدىلىعى، سونداي- اق بىرلەسكەن شىعارماشىلىق جوبالاردىڭ بولاشاق جوسپارلارى تالقىلاندى.
تاشكەنتتەگى ءىس- ساپار كەزىندە قازاقستاندىق ءارتىس الىشەر ناۋاي اتىنداعى قولدانبالى ونەر مۇراجايى مەن وپەرا جانە بالەت تەاترى سياقتى كورىكتى جەرلەرگە باردى.
سونداي- اق، ءانشى ينستاگرام پاراقشاسىندا جازعانىنداي، تاشكەنتكە بارعان ساپارىندا مادەنيەت جانە تۋريزم ءمينيسترى وزودبەك احمادوۆيچپەن بىرگە شەيح حوۆاندي توحۋر مەن تولە بي كەسەنەلەرىن ارالاعان.
«شەيح حوۆاندي توحۋر 14- عاسىردا ءومىر سۇرگەن عۇلاما ءارى سوپى، احمەت ياساۋي ءىلىمىن ۇستانۋشى بولعان. ول حالىقتى بىلىمگە شاقىرعان اۋليە، ەل باسشىلارىن تاتۋلىق پەن كەلىسىمگە شاقىرعان تۇلعا رەتىندە ەستە قالدى.
تولە بي XVI عاسىردا شەيح كەسەنەسى توڭىرەگىندە جەرلەنگەن. قارلىعاش اۋليە دەگەن اتقا يە بولعان بۇل كىسى قازاق حالقىنىڭ باس بيلەرىنىڭ ءبىرى جانە «جەتى جارعى» زاڭدار جيناعىنىڭ اۆتورلارىنىڭ ءبىرى بولعان.
ەسكى تاشكەنتتەگى سەبزور ماسسيۆىندەگى حازىرەت يمامنىڭ (حاستيمام) بەيىتىنە دە زيارات ەتتىك. «مۋيي مۋبوراك» مەدرەسەسىندە ساقتاۋلى تۇرعان حازىرەت ۋسمان مۇشافي قۇران كارىمىنىڭ ەڭ كونە داناسىن كورۋ باقىتىنا يە بولدىم. بۇل مۇباراك قۇران اففانداعى ءۇشىنشى حاليفا وسماننىڭ (اللا وعان رازى بولسىن) بۇيرىعىمەن 7 -عاسىردا (ب. ز. د. 644-648) بۇعى تەرىسىنە كوشىرىلگەن. ساپارىمىزدا وزبەك قولونەرىنىڭ ۇلگىلەرىن تاماشالاۋدىڭ ءساتى ءتۇستى»، - دەپ جازادى ديماش.
