انتيكور جەمقورلىقتان تۋىنداعان الماتى قۇرىلىسىنداعى قاتەلىكتەردى اتادى
ءبىرىنشىسى - قالا قۇرىلىسىن جۇيەلى جوسپارلاۋدىڭ بولماۋى. تالداۋ الماتىنىڭ باس جوسپارى 2011 -جىلدان بەرى جاڭارتىلماعانىن كورسەتتى. وسىعان بايلانىستى 63 مىڭ گەكتاردان استام جەردىڭ فۋنكتسيونالدىق ايماقتارى ەكولوگتاردىڭ، سەس جانە ت ج ورگاندارىنىڭ قاتىسۋىنسىز وزگەرتىلىپ كەلگەن.
بۇل تابيعاتتى قورعاۋ ايماقتارىندا جانە وزەندەر ماڭىندا قۇرىلىستىڭ باقىلاۋسىز جۇرگىزىلۋىنە اكەلدى.
بۇدان بولەك، «تاۋ الىبى» شاعىناۋدانىندا تۇينەمە انىقتالعان مال كومىلگەن جەرگە جاقىن ماڭدا تۇرعىن ءۇي كەشەندەرى قارقىندى سالىنۋدا.
ەكىنشىسى - جەردى پايدالانۋ ماقساتىنىڭ وزگەرتىلۋى. اكىمدىكتىڭ لاۋازىمدى تۇلعالارى جەردىڭ نىسانالى ماقساتىن ءوز قالاۋىنشا وزگەرتىپ وتىرعان. مىسالى، ساياجاي ۋچاسكەلەرىنىڭ ورنىنا كوپقاباتتى تۇرعىن ءۇي كەشەندەرى سالىنعان. بۇل رەتتە، مۇنداي جاعداي كاداسترلىق قۇن ايىرماشىلىعىن تولەمەۋگە مۇمكىندىك بەرگەن.
مىسالى، 2021 -جىلى قالا تۇرعىندارىنىڭ ءبىرى 2 گەكتار جەر ۋچاسكەسىنىڭ نىسانالى ماقساتىن «جەكە شارۋاشىلىق قۇرىلىسىنان» «جەكە تۇرعىن ءۇي قۇرىلىسىنا» وزگەرتكەن. الايدا كاداسترلىق قۇننىڭ 126 ملن تەڭگە مولشەرىندەگى ايىرماسى ولارعا تولەنبەگەن.
مۇنداي پراكتيكاعا جول بەرىلۋدىڭ سەبەبى - قۇرىلىس سالۋدىڭ قالا قۇرىلىسى رەگلامەنتتەرىن ىسكە اسىرۋدىڭ وڭىرلىك جوسپارى. بۇل جوسپار جەر كودەكسىنىڭ نورمالارىنا قايشى كەلەدى.
ءۇشىنشىسى - ينۆەستيتسيالىق جوبالارعا قاتىسۋ ارقىلى جەكەمەنشىككە جەر الۋ. اكىمدىكتىڭ لاۋازىمدى تۇلعالارى ساۋدا- ساتتىق وتكىزبەستەن ينۆەستيتسيالىق جوبالار ءۇشىن كاسىپكەرلەرگە ۋچاسكەلەردى جالعا بەرگەن. ينۆەستجوبالاردى پايدالانۋعا بەرۋ تۋرالى جالعان مالىمەت ارقىلى جەرلەر جەكەمەنشىككە ساتىپ الىنعان. مەملەكەت جوعالتقان پايدا شامامەن 400 ميلليون تەڭگەنى قۇرايدى.
ءتورتىنشى - قۇرىلىس پروتسەستەرى جەمقورلىق فاكتورلارىنا تولى. زاڭنامالىق رەگلامەنتتىڭ بولماۋى اكىمدىك قىزمەتكەرلەرىنە جوسىقسىز قۇرىلىس سالۋشىلاردىڭ پايداسىنا قۇقىقتىق بازا نورمالارىن بۇرمالاۋعا مۇمكىندىك بەرگەن. وسىلايشا، قالا تۇرعىندارىنىڭ ءبىرى ءبىر- بىرىنە ىرگەلەس ورنالاسقان ءتورت ۋچاسكەدە ءۇش باقشا ءۇيىن سالۋعا رۇقسات العان. قۇرىلىس اياقتالعاننان كەيىن نىساندار باقشا ۇيلەرى رەتىندە ىسكە قوسىلدى، ءبىراق كەيىننەن «Baganashil» تۇرعىن ءۇي كەشەنى رەتىندە پايدالانۋعا بەرىلدى.
تالداۋ جەكە تۇرعىن ءۇي نەمەسە باقشا ۇيلەرىنە ارنالعان جەرلەردە كوپپاتەرلى كەشەندەر مەن كوممەرتسيالىق نىساندار سالىنعان 11 فاكتىنى انىقتادى.
قۇرىلىستا تاعى ءبىر كەڭ تارالعان بۇزۋشىلىق - ەسكيزدىك جوبادان جانە جوبالاۋ- سمەتالىق قۇجاتتامادان اۋىتقۋ. ءال- فارابي داڭعىلىنىڭ جوعارى بولىگىنە بيىكتىگى 12 مەتردەن جانە 3 قاباتتان اسپايتىن نىساندار سالماۋ شەكتەۋىنە قاراماستان، بيىكتىگى 15 مەتر «دومينو» كلۋب ءۇيى ءىشىنارا پايدالانۋعا بەرىلگەن. وسىنداي 18 نىسان انىقتالدى.
تالداۋ اياسىندا 84 گەكتار اۋماقتا 10 كوپپاتەرلى كەشەن بويىنشا قۇرىلىس تىعىزدىعىنىڭ ارتۋى انىقتالدى.
بەسىنشى - مەملەكەتتىڭ قۇرىلىستى باقىلاۋداعى السىزدىگى. قالا قۇرىلىسىن باقىلاۋ بيزنەستى جۇرگىزۋدى جەڭىلدەتۋ جانە جەمقورلىقتى ازايتۋ ماقساتىندا جەكە وبەكتىلەردى قابىلداپ الۋدان الىنىپ تاستالعان بولاتىن. الايدا جەمقورلىق تاۋەكەلدەرى ساقتالىپ وتىر، ونىڭ ۇستىنە ۋاكىلەتتى ورگاننىڭ جاۋاپكەرشىلىگى تومەندەتىلگەن. مەملەكەتتىك ساۋلەت- قۇرىلىس باقىلاۋىنىڭ شەنەۋنىكتەرى ەكى قۇرىلىس سالۋشىعا قاتىستى رۇقساتسىز قۇرىلىس ءۇشىن تەك اكىمشىلىك جازا قولدانعان. ۋاكىلەتتى ورگان ءوز اكتىلەرىنىڭ ورىندالۋىنا باقىلاۋ جۇرگىزبەيدى، ونىمەن قوسا سوتقا ءاردايىم جۇگىنە بەرمەيدى. بۇزۋشىلىقتارعا ارەكەت ەتۋدىڭ قۇقىقتىق تەتىگىنىڭ بولماۋى زاڭسىز قۇرىلىستى زاڭداستىرۋعا اكەلدى.
التىنشى - قۇرىلىس سالاسىنداعى مەملەكەتتىك قىزمەتتەردى ءۇستىرتىن تسيفرلاندىرۋ. قۇجاتتاردى قابىلداۋ پروتسەسى عانا ەلەكتروندى فورماتپەن قامتىلعان. پروتسەدۋرالاردىڭ اشىق بولماۋىنان «كومەكشىلەر» نارىعى پايدا بولعان.
انتيكور تالداۋ بارىسىندا تۇرعىن ايماقتان 229 گەكتار جەردى رەكرەاتسيالىق ايماققا قايتارۋ بويىنشا ۇسىنىستار بەردى. بۇل تارماق اعىمداعى جىلدىڭ مامىر ايىندا ۇكىمەت بەكىتكەن الماتى قالاسىنىڭ 2040 -جىلعا دەيىنگى جاڭا باس جوسپارىندا ەسكەرىلدى.
سونىمەن قاتار جەردى رەكرەاتسيالىق ايماقتان تۇرعىن ۇيگە اۋىستىرۋدىڭ ەرەكشە ءتارتىبىن بەلگىلەۋ ۇسىنىلدى. بەيىندى مينيسترلىكپەن ەگجەي- تەگجەيلى جوسپارلاۋ جوبالارى بويىنشا مىندەتتى تۇردە كەلىسىم بولۋعا ءتيىس.
جالپى، سىبايلاس جەمقورلىققا قارسى قىزمەت تالداۋ ناتيجەلەرىنە سۇيەنىپ، انىقتالعان جەمقورلىق تاۋەكەلدەرىن جويۋ بويىنشا كەشەندى جوسپار دايىنداعان. 58 تارماقتان تۇراتىن قۇجات ودان ءارى ىسكە اسىرۋ ءۇشىن ۋاكىلەتتى ورگاندارعا بەرىلەدى. بارلىق سىبايلاس جەمقورلىق فاكتىلەرى بويىنشا اگەنتتىك 8 قىلمىستىق ءىستى تەرگەپ جاتىر.
ەسكە سالايىق، بۇگىن انتيكور سونداي- اق الماتىدا جەر قاتىناستارى باسقارماسى باسشىسىنىڭ ورىنباسارى مىندەتىن اتقارۋشىعا قاتىستى سوتقا دەيىنگى تەرگەۋ باستالعانىن، شەنەۋنىك سوت سانكسياسىمەن قاماۋعا الىنعانىن مالىمدەگەن بولاتىن. ول 45 ميلليون تەڭگە پارا الدى دەپ كۇتىكتەلۋدە.
