قىتايدان استاناعا جاياۋ جەتكەن مارافونشىنى ەلوردا جۇرتى كۇتىپ الدى
ەسبول اسقار ۇلى 2023 -جىلدىڭ 1-مامىر كۇنى ءوزىنىڭ تۋعان جەرى شىڭجاڭنىڭ ماناس اۋدانىنان اتاجۇرتقا بەت الىپ، استاناعا دەيىن جاياۋ مارافونىن باستاعان ەدى. مارافونشى 3 مىڭ شاقىرىمنان استام جولدى ارتتا قالدىرىپ، بۇگىن استاناعا كەلىپ جەتتى.
«مەن - الەمگە تارىداي شاشىلعان قاراكوز قازاقتىڭ ءبىر ۇلىمىن. 2019 -جىلى قازاقستان پرەزيدەنتى قاسىم- جومارت كەمەل ۇلى قىتايعا بارعان ساپارىندا تەلەارنادان سۇحباتىن كوردىم. ول كىسىنىڭ قازاق تىلىندە ايتقان قانداستار تۋرالى ءسوزى مەنى قاتتى تەبىرەنتتى. سول كەزدە مەن وسى ساپاردى ارمانداعان ەدىم. بۇگىن مىنە ارمانىم اقيقاتقا اينالىپ وتىر. ءوز جوسپارىمنان 3 كۇن بۇرىن جەتتىم. مىنە، استانا توپىراعىن باسىپ تۇرمىن، ەرەكشە تەبىرەنىستەمىن. قيىندىقتىڭ ءبارى ارتتا قالدى. باتىر بابالارىمىز قالدىرعان ۇلان- بايتاق جەردى تابانىممەن باسىپ كەلدىم. قازاعىمنىڭ عاجايىپ تابيعاتىن كوردىم. «الىستان ءبىر ۇلىمىز ەلىن اڭساپ كەلە جاتىر» دەپ مەنى قارسى الىپ جاتقان بارشاڭىزعا، اق جاۋلىقتى انالارعا، استانا قالاسى اكىمدىگىنە العىسىمدى ايتامىن»، - دەيدى ەسبول اسقار ۇلى.
ول ءوزىنىڭ الداعى جوسپارى تۋرالى دا ايتىپ ءوتتى.
«ساپارداعى باستى ماقساتىم - ەكى ەلدىڭ دوستىعىن ناسيحاتتاپ، استاناعا الىستاعى قانداستاردىڭ اق سالەمىن جەتكىزۋ ەدى، سول ءۇشىن دە استانانىڭ مەرەيتويىنا وراي جەتۋدى ماقسات ەتكەنمىن. بۇل ساپارىم مەنىڭ جالىندى جاستىق شاعىمنىڭ ۇمىتىلماس ءبىر بەلەسى بولىپ قالادى دەپ ويلايمىن. الداعى جوسپارىم وسى ەلدە قالىپ، قازاق ەلى ءۇشىن ازاماتتىق ۇلەسىمدى قوسقىم كەلەدى»، - دەدى ەسبول اسقار ۇلى.
ەسبولعا استانا قالاسى اكىمىنىڭ ورىنباسارى ەسەت بايكەننىڭ العىس حاتى تابىستالدى. «بولات تۇياق» قوعامدىق بىرلەسىگىنىڭ ورىنباسارى نۇباراك نۇرداۋلەت ەسبولعا جەرلەستەرى اتىنان ات مىنگىزىپ، شاپان جاپتى.
ەسبول اسقار ۇلى 1997 -جىلى 1-مامىر كۇنى قىتاي حالىق رەسپۋبليكاسىنىڭ شىڭجاڭ- ۇيعىر اۆتونوميالىق ولكەسىنىڭ سانجى ايماعى ماناس اۋدانىندا تۋعان. اتا- اناسى ەرتە قايتىس بولىپ، ناعاشى جۇرتىنىڭ قولىندا ەرجەتىپتى.
بۇعان دەيىن مارافونشى ەسبول اسقار ۇلى استاناعا جاقىنداپ قالعانى تۋرالى جازعان ەدىك.
اۆتور:
ريزابەك نۇسىپبەك ۇلى
