بيىلعى «قازاقستان بارىسى» ءتۋرنيرىنىڭ ەرەكشەلىگى نەدە

«بيىل تۋرنير جىلداعىدان قاراعاندا وزگەشە وتكەلى وتىر. جاڭا وبلىستاردىڭ اشىلۋىنا بايلانىستى جارىسقا قاتىسۋشىلاردىڭ سانى ارتتى. بيىل 41 پالۋان باق سىنايدى. ونىڭ ىشىندە 33 پالۋان وبلىستاردان، 2 سپورتشى «اسكەر بارىسىنان» جانە 3 قالادان تاعى 6 سپورتشى قاتىسادى»، - دەدى «قازاق كۇرەسى» قاۋىمداستىعى تورەشىلەر القاسىنىڭ ءتوراعاسى قايرات پازىلبەك «قازاقستان بارىسى» تۋرنيرىنە وراي ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، ىرىكتەۋ كەزەڭى بارلىق وبلىستا ءوتتى.

«ىرىكتەۋ الدىمەن اۋدان ورتالىعىنان باستالادى. ودان وتكەندەر وبلىستىق سىناققا جولداما الادى. «قازاقستان بارىسى» ءتۋرنيرى - قازاق كۇرەسىن دامىتا تۇسۋگە سەرپىن بەرگەن جوبا. پالۋاندار بۇل شارانى اسىعا كۇتەدى»، - دەدى ول.

ەرتەڭ ساعات 19:00 دە «حانشاتىر» ويىن- ساۋىق ورتالىعىندا پالۋانداردىڭ سالماق ولشەۋ ءراسىمى وتەدى.

تۋرنير 2-شىلدە كۇنى «بارىس ارەنا» سپورت كەشەنىندە ساعات 12:00 دە باستالادى. كىرۋ تەگىن.

ۇيىمداستىرۋشىلاردىڭ مالىمەتىنشە، ءتۋرنيردىڭ جالپى جۇلدە قورى - 40 ميلليون تەڭگە، ونىڭ ىشىندە جارىس جەڭىمپازىنا 25 ميلليون تەڭگە سىياقى بەرىلەدى.

بۇعان دەيىن تۋرنير ۇيىمداستىرۋشىلارى جارىستى وتكىزۋگە بولىنگەن قارجىنىڭ جۇمسالۋ زاڭدىلىعىنا قاتىستى تۇسىنىك بەرگەن ەدى.

سونىمەن قاتار، بريفينگ بارىسىندا باتىسقازاقستاندىق پالۋانداردىڭ بيىلعى تۋرنيردەن شەتتەتىلگەنى ايتىلدى.

ودان بولەك، قازاق كۇرەسىن وليمپيادا باعدارلاماسىنا ەنگىزۋ جۇمىسى ءجۇرىپ جاتقانى حابارلاندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى