كۇرەس: پاريج وليمپياداسىنا جولداما قاي قالالاردا ساراپقا سالىنادى

حالىقارالىق كۇرەس فەدەراتسياسى (UWW) 2024 -جىلى فرانسيا استاناسى پاريج قالاسىندا وتەتىن جازعى وليمپيادا ويىندارىنىڭ جولداماسى ساراپقا سالىناتىن قالالاردى اتادى.

العاشقىسى 16-24-قىركۇيەك ارالىعىندا سەربيا استاناسى بەلگرادتاعى الەم چەمپيوناتىندا وليمپيادا باعدارلاماسىنا كىرەتىن ءاربىر سالماق بويىنشا 5 جولداما يەسى انىقتالادى.

مۇندا قولا مەدال جولىندا جەڭىلگەن ەكى پالۋان ءوزارا كۇرەسىپ، بەسىنشى جولداماعا يە بولادى.

ىرىكتەۋ ساتىسىنداعى قالعان ەكى كەزەڭ 2024 -جىلعا جوسپارلانعان. ازيا قۇرلىعىنىڭ بالۋاندارى 9-21 -ءساۋىر ارالىعىندا قىرعىزستان استاناسى بىشكەك قالاسىنداعى ىرىكتەۋ تۋرنيرىندە سىنعا تۇسەدى.

وندا ءار سالماقتا فينالعا شىققان 2 بالۋان جازدا پاريجگە بارادى.

ال پانامەريكا چەمپيوناتى مەن وسى قۇرلىقتاعى ىرىكتەۋ دوداسىندا بالۋاندار مەكسيكانىڭ اكاپۋلكو قالاسىندا جينالسا، افريكا مەن تىنىق مۇحيتى ايماعىنىڭ ەلدەرى مىسىر استاناسى كايردە بوز كىلەمگە شىعادى.

سونداي- اق، ەۋروپالىق بوزكىلەم شەبەرلەرى ءازىربايجان استاناسى باكۋدە جينالادى. ءار قۇرلىقتاعى تۋرنيرگە 36 كۆوتادان بولىنگەن. بارلىعى 144 جولدامانى قۇرايدى.

ال 9-12-مامىر ارالىعىندا تۇركيانىڭ ىستانبۇل قالاسىندا وتەتىن شەشۋشى كەزەڭدە الەم بالۋاندارى ءار سالماقتا قالعان 3 جولداما ءۇشىن تالاسادى. ناتيجەسىندە 54 جولداما يەسى انىقتالادى.

ايتا كەتسەك، وليمپيادا باعدارلاماسىنا 18 سالماق كىرەدى. ولاردىڭ قاتارىندا گرەك- ريم كۇرەسىنەن 60،67،77،87،97 كەلىگە دەيىن جانە 130 كەلىدەن جوعارى، ەركىن كۇرەستەن 57,65,74,86,97 جانە 125 كەلى سالماقتاعى بالۋاندار سىنعا تۇسەدى. ايەلدەر كۇرەسىندە 50, 53, 57, 62, 68, 76 كەلى سالماقتاعى سپورتشىلار جۇلدەلەردى ساراپقا سالادى.

ەسكە سالساق، بۇدان بۇرىن كۇرەس تۇرلەرىنەن رەيتينگىلىك تۋرنيرگە كىمدەر باراتىنى انىقتالعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى