قوستانايلىقتاردى رەسەي مەن ۋكراينا اراسىنداعى قاقتىعىسقا بارىپ سوعىسۋعا شاقىرعان - پروكۋراتۋرا
كەي حابارلامادا قازاقستان ازاماتتارىن قاقتىعىسقا شاقىرۋ، قاساقانا ارانداتۋشى سوزدەر جانە قوس تاراپ ازاماتتارىنىڭ ۇلتتىق ار- نامىسى مەن قادىر- قاسيەتىن قورلايتىن كورىنەۋ جالعان اقپارات بار.
«الەۋمەتتىك جەلى پايدالانۋشىلارى، ىشىندە قازاقستان ازاماتتارى دا بار، بولىپ جاتقان وقيعالارعا كوپشىلىك الدىندا پىكىر بىلدىرە وتىرىپ، ەل اۋماعىنىڭ تۇتاستىعىنا قاتىستى سەپاراتيستىك ۇندەۋلەر جاريالاپ جاتىر. سونىمەن قاتار، ءبىزدىڭ وبلىس اۋماعىندا ۋكرايناداعى قارۋلى قاقتىعىسقا قاتىسۋ ءۇشىن رەسەي اۋماعىنا جەرگىلىكتى تۇرعىنداردى ىرىكتەۋ فاكتىلەرى تىركەلدى. بۇل ارەكەتكە قازاقستان كونستيتۋتسياسىمەن، ءبىزدىڭ ەل قاتىساتىن جالپىعا بىردەي تانىلعان حالىقارالىق- قۇقىقتىق قۇجاتتارمەن تىيىم سالىنعان. قوعامدىق قاۋىپسىزدىكتى قامتاماسىز ەتۋ، ازاماتتاردىڭ قۇقىقتارى مەن بوستاندىقتارىن قورعاۋ، قوعامدىق- ساياسي جاعدايدى تۇراقسىزداندىرۋعا جول بەرمەۋ ماقساتىندا بۇقارالىق اقپارات قۇرالدارىندا جانە الەۋمەتتىك جەلىلەردە وسىنداي ارانداتۋشىلىق سوزدەر مەن ۇندەۋلەرگە بەرىلمەۋگە شاقىرامىز» دەلىنگەن پروكۋراتۋرا حابارلاماسىندا.
ۆەدومستۆو قازاقستان ازاماتىنىڭ شەت مەملەكەت اۋماعىنداعى اسكەري ءىس- قيمىلدارعا قاساقانا زاڭسىز قاتىسۋى، سول سياقتى ۇلتتىق ارازدىقتى قوزدىرۋعا باعىتتالعان قاساقانا ءىس- ارەكەتتەر، بۇقارالىق اقپارات قۇرالدارىن نەمەسە تەلەكوممۋنيكاتسيا جەلىلەرىن پايدالانا وتىرىپ، قازاقستاننىڭ تۇتاستىعىن، ونىڭ اۋماعىنا قول سۇعىلماۋشىلىق پەن بولىنبەۋشىلىكتى بۇزۋعا جاريا تۇردە شاقىرۋ قىلمىستىق- جازالاناتىن ءىس- ارەكەت (ق ر ق ك 172, 174, 180-باپتارى) سانالاتىنىن جانە 10 جىلعا دەيىن باس بوستاندىعىنان ايىرۋعا اكەپ سوعاتىنىن ەسكەرتەدى.
سونىمەن قاتار، قىلمىستىق كودەكستىڭ 274-بابىنا سايكەس، قوعامدىق ءتارتىپتى بۇزۋ نەمەسە ازاماتتاردىڭ نەمەسە ۇيىمداردىڭ قۇقىقتارى مەن زاڭدى مۇددەلەرىنە نە قوعامنىڭ نەمەسە مەملەكەتتىڭ زاڭمەن قورعالاتىن مۇددەلەرىنە ەلەۋلى زيان كەلتىرۋ قاۋپىن تۋعىزاتىن كورىنەۋ جالعان اقپارات تاراتۋ ءۇشىن، ونىڭ ىشىندە بۇقارالىق اقپارات قۇرالدارىن نەمەسە تەلەكوممۋنيكاتسيا جەلىلەرىن پايدالانا وتىرىپ جاسالعان ءدال سول ارەكەتتەر ءۇشىن جەتى جىلعا دەيىن باس بوستاندىعىنان ايىرۋ كوزدەلگەن.
«جوعارىدا ايتىلعاندار نەگىزىندە، ازاماتتار مەن بۇقارالىق اقپارات قۇرالدارىن، الەۋمەتتىك جەلىلەردى پايدالانۋشىلاردى جوعارىدا اتالعان كەز كەلگەن قۇقىق بۇزۋشىلىقتاردى جاساۋدان باس تارتۋعا، وسىنداي ارانداتۋشىلىق سوزدەر مەن ۇندەۋلەرگە جول بەرمەۋگە جانە ولاردىڭ الدىن الۋعا شاقىرامىز» دەيدى پروكۋراتۋرا.
