شۋ اۋدانىندا رادياتسيا بار ما؟
«قازاقمىس كورپوراتسياسى» ج ش س باسپا ءسوز قىزمەتىنىڭ بەرگەن مالىمەتتەرىنە سۇيەنسەك، ساراپشىلار شۋ اۋدانىنىڭ توپىراق، سۋ جانە اۋاسىن تەكسەرگەن.
ناتيجەسىندە رادياتسيالىق فوننىڭ ارتۋى جوق، ال بارلىق كورسەتكىشتەر نورما شەگىندە نەمەسە نورمادان الدەقايدا تومەن ەكەنى انىقتالعان. سوندىقتان «رەسپۋبليكالىق راديولوگيالىق ورتالىق» ج ش س ماماندارى «قازاقمىس» جەرگىلىكتى تۇرعىندارعا رادياتسيالىق زيان كەلتىرمەيدى دەگەن قورىتىندى جاساعان.
راديولوگيالىق تەكسەرۋدىڭ جۇرگىزىلۋىنە «قازاقمىس» كومپانياسى باستاماشى بولعان. بۇعان دەيىن شۋ اۋدانىنداعى مىس الپاۋىتىنىڭ كاسىپورىندارىندا رادياتسيالىق فون شامادان اسىپ كەتكەندىگى جانە زياندى ساۋلەلەر جاقىن ماڭداعى ەلدى مەكەندەرگە تارالۋى مۇمكىن ەكەندىگى تۋرالى اقپارات پايدا بولعان. مۇنىڭ قانشالىقتى شىندىققا جاناساتىنىن تاۋەلسىز ساراپشىلار انىقتاۋى ءتيىس ەدى.
ايتا كەتەيىك، تەكسەرۋ كەزىندە ولاردىڭ جانىندا اكىمدىكتىڭ، «قازاقمىستىڭ» وكىلدەرى، اۋدان دەپۋتاتتارى مەن اۋىل اقساقالدارى بولعان.
بۇعان دەيىن جامبىل وبلىسىندا 21 توننادان اسا جابايى قاراسورا جويىلعانىن جازعان بولاتىنبىز.
