قاجىلىققا بارعان قازاقستاندىقتاردىڭ جالعان ۆيزامەن ۇستالىپ، قاماۋعا الىنعانى راس پا
«ZamZam Qazaqstan قاجىلىق كومپانياسى ارقىلى ۇلكەن قاجىلىققا اتتانعان قازاقستاننىڭ 380 ازاماتىنا بەرىلگەن ۆيزا قۇجاتى جالعان بولىپ شىقتى. جالعان قۇجاتپەن بارعان ازاماتتار قاماۋعا الىنعان». الەۋمەتتىك جەلىدە وسىنداي اقپارات تارادى.
قازاقستان مۇسىلماندارى ءدىني باسقارماسى وسى اقپاراتقا قاتىستى تۇسىنىكتەمە بەردى.
«بۇعان دەيىن «Zam-Zam Qazaqstan» (زاڭدى اتاۋى - Zam Zam store) كومپانياسىنىڭ قاجىلارعا قىزمەت كورسەتۋگە قاتىستى ءتيىستى ليتسەنزياسى، وسى جىلى رەسمي قاجىلىق ورىندارىن العان تۋروپەراتورلار تىزىمىندە جوق ەكەنىن، سوندىقتان اتالعان فيرمانىڭ قىزمەتىنە مۇلدە جۇگىنبەۋ تۋرالى بىرنەشە رەت دابىل قاعىپ، مالىمدەمە جاريالانعان بولاتىن. سونىمەن قاتار، ءمۇفتيات قاجىلاردى وسىعان دەيىن الداپ، دالادا قالدىرعان اتالعان كومپانيانىڭ زاڭسىز ارەكەتتەرى تۋرالى قۇقىق قورعاۋ ورگاندارىنا شاعىم تۇسىرگەن»، - دەلىنگەن حابارلامادا.
اقپاراتتا ايتىلعانداي، قولدان جاسالعان قاجىلىق ۆيزالارىن پايدالانعان كومپانيا وكىلدەرى شاريعات پەن زاڭعا قايشى ارەكەتتەرىن تىيماي كەلەدى.
«قازاقستان ازاماتتارىن زاڭسىز جولمەن قاجىلىققا جونەلتكەن «Zam-Zam Qazaqstan» كومپانياسىنىڭ جەتەكشىسى دانيار يليەۆ زاڭ الدىندا جاۋاپ بەرۋى ءتيىس دەپ سانايمىز. ولار شاريعات پەن زاڭدى بەلدەن باسۋمەن قاتار، «ءمۇفتيات قاجىلىق كۆوتاسىن ساتادى، پارا الادى» دەپ جالا جابۋىن دوعارماي، ەندى ق م د ب «جالعان قاجىلىق كۆوتالارىن» جاسادى دەپ شىندىققا جاناسپايتىن اقپارات تاراتتى. ءدىني باسقارماعا ءجابىر كورگەن قاجىلار مەن ونىڭ تۋىستارىنان «جالعان قۇجات جاساپ، ازاماتتارىمىزدى زاڭسىز جولمەن قاجىلىققا اپارعان «Zam-Zam Qazaqstan» ديرەكتورى مەن باسقا دا جاۋاپتى وكىلدەرىن قۇقىقتىق جاۋاپكەرشىلىككە تارتۋ بويىنشا ءتيىستى شارا نەگە قولدانىلمايدى؟» دەگەن سۇراقتار مەن شاعىمدار تولاسسىز كەلىپ ءتۇسىپ جاتىر. قۇقىق قورعاۋ ورگاندارى وسى ماسەلەگە تەز ارادا نازار اۋدارىپ، زاڭ بۇزۋشىلاردى قۇقىقتىق جاۋاپكەرشىلىككە تارتۋ بويىنشا ءتيىستى شارالار قولدانادى دەپ سەنەمىز»، - دەيدى ءدىني باسقارمادان.
وسى ورايدا، قازاقستان مۇسىلماندارى ءدىني باسقارماسى سەنىمدى، رەسمي رۇقساتى بار كومپانيالارعا جۇگىنۋدى سۇرايدى.
«قاجىلىق كونكۋرسىنان وتكەن، ياعني قاجىلىق ساپارىن ۇيىمداستىرۋعا قابىلەتتى دەپ تانىلعان، ءمۇفتيات جاريالاعان تىزىمگە ساي تۋروپەراتورلار قىزمەتىنە جۇگىنۋ قاجەتتىگىن تاعى دا قاپەرگە بەرەمىز. سونىمەن قاتار، «ق م د ب جالعان قاجىلىق ۆيزالارىن دايىندادى» دەپ جالا جاپقان «Zam-Zam Qazaqstan» (Zam Zam store) كومپانياسىنىڭ ديرەكتورى دانيار يلييەۆتىڭ ۇستىنەن سوتقا شاعىم تۇسىرەتىنىمىزدى جەتكىزەمىز. ولار اللا الدىنداعى پارىزىن وتەيمىن دەپ كەلگەن قاجىلارعا قيانات جاسادى»، - دەلىنگەن مالىمدەمەدە.
