قۇراندى ورتەۋ وقيعاسى شۆەتسيانىڭ ناتو-عا مۇشەلىككە ءوتۋىن قيىنداتا ما؟

تۇركيانىڭ بۇل رەتتە شۆەتسياعا قويعان تالاپتارى وزگەرە مە؟

ستوكگولمدە قاسيەتى قۇران كىتابى وسىمەن ەكىنشى رەت ورتەلىپ وتىر. بۇل وقيعا شۆەتسيانىڭ ناتو-عا مۇشەلىككە وتۋىنە كەرى اسەرىن تيگىزۋى ىقتيمال. ماماندار وسىنداي بولجام ايتادى. بۇعان ا ق ش - تىڭ مەملەكەتتىك دەپارتامەنت وكىلدەرى دە الاڭداۋشىلىق تانىتىپ وتىر.

ۆەدانت پاتەل، ا ق ش مەملەكەتتىك دەپارتامەنتى باسپا ءسوز حاتشىسىنىڭ ورىنباسارى:

- ءدىني ءماتىندى ورتەۋ - مەنسىنبەۋ، قۇرمەتتەمەۋ جانە ورىنسىز ارەكەت. بۇل تۋرالى ءبىز بىرنەشە رەت ايتتىق. دەگەنمەن ۆاشينگتون ۆەنگريا مەن تۇركيانى شۆەتسيانىڭ ناتو-عا كىرۋى تۋرالى حاتتامانى راتيفيكاتسيالاۋعا شاقىرۋدى جالعاستىرادى. شۆەتسيا وتكەن جىلى مادريد سامميتىنىڭ اياسىندا فينليانديا جانە تۇركيامەن كەلىسىلگەن ءۇشجاقتى مەموراندۋم بويىنشا ءوز مىندەتتەمەلەرىن ورىندادى دەپ سانايمىز.

11-شىلدەدە ۆيلنيۋستە شەشۋشى سامميت وتەدى. ونىڭ قارساڭىندا ناتو- نىڭ باس حاتشىسى يەنس ستولتەنبەرگ فرانسيا پرەزيدەنتىمەن رەسمي كەزدەستى. ەممانۋەل ماكرون تۇركيا مەن ۆەنگريانى شۆەتسيانىڭ وداققا كىرۋىن قولداۋعا شاقىرادى. ال شۆەتسيانىڭ سىرتقى ىستەر ءمينيسترى ناتو-عا كىرۋ ءۇشىن تۇركيا قويعان بارلىق تالاپتى ورىندادىق دەيدى.

توبياس بيللسترەم، شۆەتسيانىڭ سىرتقى ىستەر ءمينيسترى:

- ءۇشجاقتى مەموراندۋم بويىنشا، تەرروريزمگە قارسى كۇرەس - ماڭىزدى تالاپتىڭ ءبىرى. تەرروريستىك ۇيىمدى ناسيحاتتايتىن، نىعايتاتىن نەمەسە قولدايتىن ارەكەتتەرگە قارسى جاڭا زاڭ كۇشىنە ەندى. وسىلايشا، ءبىز كەلىسىمنىڭ سوڭعى تارماقتارىن ورىندادىق. ال تۇركيا ءالى رەسمي مالىمدەمە جاساعان جوق.

ەسكە سالايىق، شۆەتسيا 2022 -جىلدىڭ 18-مامىرىندا فينليانديامەن ءبىر ۋاقىتتا ناتو-عا مۇشەلىككە ءوتىنىش بەردى. بيىل 4-ساۋىردە رەسمي حەلسينكي مۇشەلىككە ءوتتى. ال شۆەتسيانىڭ سولتۇستىك اتلانتيكالىق كەلىسىم ۇيىمىنا قوسىلۋى تىكەلەي تۇركيا مەن ۆەنگريا قولداۋىنا بايلانىستى.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى