ەۋروپادا تاعى دا قۇران ورتەلدى، بۇل جولى مۇسىلمان جىگىت وسىنداي ارەكەتكە باردى
ستوكگولمدە ۇلكەن مەشىتتىڭ الدىندا قۇران ورتەۋگە پوليتسيا رۇقسات بەرگەن.
ونى ۇيىمداستىرۋشى بىرنەشە اپتا بۇرىن قۇقىق قورعاۋ ورگاندارىنا ارىز جازعان. سوڭىندا وعان اقىرى مۇمكىندىك بەرىلدى.
ونىڭ ۇستىنە بۇل جولعى اكسيانى وتكىزگەن ۋلتراوڭشىل اعىمداردىڭ وكىلى ەمەس، يراكتان كەلگەن 37 جاستاعى بوسقىن مۇسىلمان سالۆان موميكا.
ول ءبىر توپ ءتارتىپ ساقشىلارىنىڭ جانە جولاي ءوتىپ بارا جاتقان 200 گە جۋىق ادامنىڭ كوزىنشە مۇسىلماننىڭ قاسيەتتى كىتابىنىڭ ءبىر داناسىن ورتەپ جىبەردى.
جالپى كوپشىلىك ونىڭ ارەكەتىن قولدامادى.
«ءبىز مۇنداي نارسەلەرگە كوز جۇمىپ قاراپ، توزىمدىلىك كورسەتپەۋىمىز كەرەك، وسىندايلارعا توقتاۋ سالاتىن كەز جەتتى. بىرەۋدى قورلاۋ جاقسى ەمەس»، «ءسوز بوستاندىعى، ارينە، وتە ماڭىزدى، ءبىراق ءدىني كىتاپتى ورتەۋ - ءسوز بوستاندىعى ەمەس، بۇل مۇلدەم باسقا نارسە، ونىڭ ارەكەتىن ارانداتۋشىلىق دەپ ەسەپتەيمىن» دەپ جاتتى تۇرعىندار.
اكتسيانى ۇيىمداستىرۋشى ءوزىنىڭ ەكىنشى وتانى شۆەتسيانىڭ يميدجىنە نۇقسان كەلتىرگىسى كەلمەيتىنىن قايتا-قايتا قاداپ ايتىپ، قۇراندى ءوزىنىڭ جەكە سەبەپتەرىمەن ورتەپ جاتقانىن جەتكىزدى.
كەيبىر مالىمەتتەرگە قاراعاندا ول ءتىپتى شۆەتسيانىڭ ناتو-عا كىرۋ پروتسەسى اياقتالعانشا كۇتە تۇرعىسى كەلگەن.
بۇل پروتسەدۋرانى تۇركيا كەشىكتىرىپ وتىر.
وسى جىلدىڭ قاڭتارىندا دانيالىق راسمۋس پالۋدان ستوكگولمدەگى تۇرىك ەلشىلىگىنىڭ الدىندا قۇران ورتەگەن كەزدە تۇركيا ءوز ۇستانىمىن ودان ءارى قاتايتقان ەدى.
اۆتور:
جانات قاپالبايەۆا
