الماتىدا زاڭسىز ورناتىلعان تاعى ءۇش دۇڭگىرشەك بۇزىلدى
قالانىڭ كەلبەتىنە نۇقسان كەلتىرەتىن، جان- جاعى اباتتاندىرىلماعان جانە تروتۋارلار مەن جول ۋچاسكەلەرىنە قوقىس تاستايتىن زاڭسىز سالىنعان ستاتسيونارلىق ەمەس ساۋدا وبەكتىلەرىنە شارا قابىلدانىپ جاتىر. الماتى قالاسى اكىمدىگىنىڭ حابارلاۋىنشا، «وربيتا-4» شاعىن اۋدانىنداعى مۇستافين مەن ءبىرجان كوشەلەرىنىڭ قيىلىسىندا زاڭسىز ورناتىلعان ءۇش دۇڭگىرشەك ءسۇرىلدى.
«الماتى قالاسى كاسىپكەرلىك جانە ينۆەستيتسيالار باسقارماسىنىڭ قىزمەتكەرلەرى دۇڭگىرشىكتەردىڭ ساۋدا جاساۋعا رۇقسات قۇجاتتارىنىڭ جوق ەكەنىن انىقتادى. زاڭسىز ورناتىلعان ساۋدا نىساندارىنىڭ يەلەرىمەن ءتۇسىندىرۋ جۇمىستارى جۇرگىزىلدى، سودان كەيىن كاسىپكەرلەر وبەكتىلەردى وزدەرى سۇرە باستادى. مەنشىك يەلەرى وزدەرى بۇزباسا، زاڭسىز ورناتىلعان ستاتسيونارلىق ەمەس ساۋدا نىساندارى ءماجبۇرلى تۇردە بۇزىلاتىن بولادى»، - دەپ حابارلادى اكىمدىكتەن.
ەسكە سالساق، الماتى اكىمى ەربولات دوسايەۆتىڭ تاپسىرماسى بويىنشا بيىل العاش رەت «الماتى قالاسىنىڭ اۋماعىندا جانە قالا ماڭىنداعى ايماقتا ستاتسيونارلىق ەمەس ساۋدا نىساندارىن ورناتۋ ەرەجەلەرى» قابىلداندى. وندا ستاتسيونارلىق ەمەس ساۋدا نىساندارىن ورناتۋ ءتارتىبى ناقتى ايقىندالعان. ەرەجەلەرمەن تولىعىراق مىنا سىلتەمە ارقىلى تانىسۋعا بولادى.
بۇعان دەيىن مەگاپوليستە دۇڭگىرشەكتەرى بار جازعى ءدامحانانىن بۇزىلىپ جاتقانى تۋرالى جازعان بولاتىنبىز.
