داۋلەت مۇقايەۆ باسپانا الاتىن مۇگەدەك جاندارعا تالاپتاردى جەڭىلدەتۋدى ۇسىندى

بۇل تۋرالى ءماجىلىستىڭ جالپى وتىرىسىندا دەپۋتات داۋلەت مۇقايەۆ ايتتى، دەپ حابارلايدى قازاقپارات ءتىلشىسى.

«قازىرگى كەزدە قازاقستاندا تۇراتىن 711 مىڭنان استام مۇمكىندىگى شەكتەۋلى ادامنىڭ 420 مىڭى ەڭبەككە قابىلەتتى بولسا (%58)، 187,5 مىڭى - زەينەت جاستا (%26,3) جانە 104,3 مىڭى 18 جاسقا تولماعان (%14,6). بۇل ازاماتتارعا مەملەكەت جاعىنان قاجەت دەڭگەيدە قولداۋ كورسەتىلمەي كەلەدى. اشىعىن ايتقاندا، جەكە باسپاناسىن اڭساپ جۇرگەن مۇمكىندىگى شەكتەۋلى جانداردىڭ سانى جەتەرلىك. مەملەكەتتەن باسپانا الۋعا ارنالعان ارنايى باعدارلامالار قابىلدانعانىمەن، ءىس جۇزىندە مۇمكىندىگى شەكتەۋلى جاندار ءۇشىن پاتەر الۋ قيىن بولىپ تۇر. نەگىزگى ماسەلە - مۇمكىندىگى شەكتەۋلى جانداردىڭ جۇمىسپەن قامتىلماۋى. ەكىنشى دەڭگەيلى بانكتە ولار تولەم قابىلەتتىلىگىن راستاي الماي جاتىر. بۇل مۇمكىندىگى شەكتەۋلى جانداردىڭ باسپانا يپوتەكاسىن راسىمدەۋگە قول بايلاۋ بولىپ وتىر»، - دەدى داۋلەت مۇقايەۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.

ونىڭ ايتۋىنشا، ولاردىڭ باسىم بولىگى ۇيدەن بولسا دا جۇمىس ىستەپ ءناپاقاسىن تاۋىپ وتىر. ەلىمىزدەگى ءاربىر 5 مۇمكىندىگى شەكتەۋلى جان رەسمي تۇردە جۇمىس ىستەيدى. ءبىراق كوبى زەينەتاقى جارناسىن اۋدارا المايدى.

«بىرىنشىدەن، مۇمكىندىگى شەكتەۋلى جاندار ءۇشىن مەملەكەتتىك باعدارلاما تالاپتارىن قايتا قاراۋ قاجەت. ياعني، يپوتەكا راسىمدەۋدە جەڭىلدەتىلگەن ۇسىنىمدار ەنگىزىلۋى كەرەك. تابىس كوزىن راستاعاندا زەينەتاقى اۋدارىمدارى ەمەس، ەكىنشى دەڭگەيلى بانكتەردەگى كەيىنگى 6 ايداعى تۇسىمدەردىڭ جيىنتىعىن كورسەتسە جەتكىلىكتى دەپ سانايمىن. ەكىنشىدەن، بانكتەردىڭ مۇمكىندىگى شەكتەۋلى ازاماتتارىمىزعا تاۋەكەلى جوعارى توپ رەتىندە قاراماۋى ماسەلەسىنە ەرەكشە نازار اۋدارۋ قاجەت»، - دەدى دەپۋتات.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى