قازاقستاندا «ەل بىرلىگى» وردەنى بەكىتىلۋى مۇمكىن
بۇل تۋرالى كوپشىلىك تالقىعا شىققان ۇكىمەت وكىمىندە جازىلعان، دەپ حابارلايدى قازاقپارات ءتىلشىسى.
«ق ر مەملەكەتتىك ناگرادالارىمەن ناگرادتاۋعا ۇسىنۋدىڭ جانە ولاردى تاپسىرۋدىڭ ءتارتىبى تۋرالى نۇسقاۋلىقتى، ق ر مەملەكەتتىك ناگرادالارى قۇجاتىنىڭ ۇلگىلەرىن جانە ق ر مەملەكەتتىك ناگرادالارى بەلگىلەرىنىڭ سيپاتتاماسىن بەكىتۋ تۋرالى» ق ر پرەزيدەنتىنىڭ 1999 -جىلعى 8-قاراشاداعى № 90 وكىمىنە مىناداي تولىقتىرۋ ەنگىزىلسىن: جوعارىدا اتالعان وكىمگە 3-قوسىمشادا: «دوستىق» (درۋجبا) وردەنىنىڭ سيپاتتاماسىنان كەيىن وسى وكىمنىڭ قوسىمشاسىنا سايكەس «ەل بىرلىگى» (ەدينستۆو نارودا) وردەنىنىڭ سيپاتتاماسى تولىقتىرىلسىن»، - دەلىنگەن اشىق ن ق ا پورتالىندا جاريالانعان قۇجاتتا.
ۇكىمەتتىڭ بۇل وكىم- جوباسىن مەملەكەت باسشىسىنىڭ قازاقستان حالقى اسسامبلەياسىنىڭ XXXII سەسسياسىندا بەرگەن تاپسىرماسىنا ساي اقپارات جانە قوعامدىق دامۋ مينيسترلىگى ازىرلەگەن.
ەندى اتالعان قۇجات پرەزيدەنتتىڭ قاراۋىنا ەنگىزىلىپ، جارلىقپەن بەكىتىلمەك.
«وكىم جوباسى ازاماتتاردىڭ ۇلت بىرلىگىن نىعايتۋعا سىڭىرگەن ەڭبەگىن تانۋعا باعىتتالعان. جوبانى ىسكە اسىرۋ مەملەكەتتىك بيۋدجەتتەن قوسىمشا قارجىلىق شىعىنداردى تالاپ ەتپەيدى، سونداي- اق تەرىس الەۋمەتتىك- ەكونوميكالىق جانە قۇقىقتىق سالدارعا اكەپ سوقپايدى»، - دەپ تۇسىندىرمە بەرىلگەن وكىم جوباسىنا.
قۇجات 12-شىلدەگە دەيىن كوپشىلىك تالقىسىندا بولادى. كەيىن پرەمەر- مينيستر قول قويىپ، مەملەكەت باسشىسىنا جولدانادى.
