مۇقتاج جاندار قۇرباندىق ەتىن الۋعا ءوتىنىش بەرە الادى – ق م د ب
بۇل تۋرالى قازاقستان مۇسىلماندارى ءدىني باسقارماسىنىڭ ۋاعىز- ناسيحات ءبولىمىنىڭ مەڭگەرۋشىسى باتىرجان مانسۇروۆ ءمالىم ەتتى، دەپ حابارلايدى قازاقپارات ءتىلشىسى.
«قۇربان ايت مەرەكەسىنە وراي قۇربان شالۋ راسىمدەرىن وتكىزۋ ءۇشىن ءبىزدىڭ باسقارما «QURBAN-2023» جوباسى ازىرلەندى. «QURBAN-2023» جوباسى ونلاين جانە وفلاين فورماتتا ىسكە اسىرىلىپ جاتىر. رەسپۋبليكا بويىنشا وكىلدىكتەردە قۇربان شالۋ راسىمدەرى ونلاين جانە وفلاين فورماتتا دا وتكىزىلۋدە. ال، مەدرەسەلەر مەن قايىرىمدىلىق مەكەمەلەر قۇربان شالۋ بويىنشا تاپسىرىستاردى جانە قۇرباندىق ەتتەرىن تەك وفلاين فورماتتا قابىلداۋدا، - دەدى باتىرجان مانسۇروۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
سونداي- اق، ءدىني باسقارما وكىلى قۇربان ايتتا ونلاين فورماتتا قۇربان شالۋ جانە ونى مۇقتاجدارعا تاراتۋ راسىمدەرىن ءتۇسىندىرىپ ءوتتى.
«QURBAN-2023» جوباسى اياسىندا ونلاين فورماتتا قۇربان شالۋ راسىمدەرىن وتكىزۋ جانە ونى مۇقتاجدارعا تاراتۋ ءۇشىن 2023 -جىلى16-ماۋسىمنان باستاپ www.qurban2023.kz سايتى ىسكە قوسىلدى. اتالعان سايتقا قۇربان شالۋ ءۇشىن تاپسىرىس بەرۋشى ءتيىستى ءوتىنىش قالدىرا الادى. ول ءۇشىن سايتقا كىرىپ، كورسەتىلگەن نۇسقاۋلىقتاردى ورىنداۋ قاجەت. قۇرباندىق شالىنعاندىعى تۋرالى ەسەپ ۆيدەو رەتىندە تاپسىرىس بەرۋشىنىڭ Whats App نومىرىنە جولداناتىن بولادى. سونداي- اق، سايتقا مۇقتاج جاندار دا تىركەلىپ، شالىنعان قۇرباندىق ەتىن الۋ ءۇشىن ونلاين تۇردە ءوتىنىش تولتىرا الادى. ناتيجەسىندە شالىنعان قۇرباندىق ەتتەرىن ەرىكتىلەر ءوتىنىش قالدىرعان مۇقتاج جاننىڭ سايتتا كورسەتكەن مەكەنجايىنا ەتتى جەتكىزىپ بەرەدى»، - دەيدى ول.
