الاكول مەن بۋرابايدا قوناق ءۇي جالداۋ باعاسى قانداي

«جازعى دەمالىستىڭ ەڭ تانىمال باعىتتارى شۋچينسك- بۋراباي ايماعى، كاسپي جاعالاۋى مەن الاكول بولىپ تۇر»، - دەپ جازىلعان ساراپتامادا.

بيىل ەلدەگى كۋرورتتاردا دەمالۋ قازاقستاندىقتارعا قىمباتقا تۇسەتىن ءتۇرى بار.

قوناق ۇيلەر مەن تۋريستىك بازالاردا، دەمالىس ۇيلەرى مەن كۋرورتتىق ايماقتارداعى باسپانا جالداۋ اقىسى ءبىر جىلدا 30 پايىزعا جۋىق وسكەن.

قاڭتار-ناۋرىز ارالىعىنىڭ وزىندە ءبىر توسەك جالداۋ اقىسى ورتا ەسەپپەن 14,4 مىڭ تەڭگە بولدى. ءبىر جىل بۇرىن دۇل شاما 11,3 مىڭ تەڭگە بولاتىن.

«ۇلتتىق ستاتيستيكا بيۋروسى جاتىن ورىندارىن التى ساناتقا ءبولىپ، باعا كورسەتكىشتەرىن جاريالادى. ەشقانداي «جۇلدىزى جوق» قاراپايىم قوناق ۇيلەردىڭ بۇل نارىقتاعى ۇلەسى - 64,5 پايىز. بۇل جەردە كەلۋشىلەردىڭ سانى ەمەس، بەرىلگەن بولمەلەردىڭ سانى ەسەپكە الىنعان. بۇدان كەيىنگى ساناتتاعى قوناق ۇيلەردىڭ باعاسى ءبىر جىلدا 28,7 پايىز قىمباتتاعان.

تۋريستىك بازالار مەن جازعى ۇيلەردە ءبىر اپتا دەمالۋ باعاسى 69,3 مىڭ تەڭگەگە شىعۋى مۇمكىن. ءبىراق ونىڭ ىشىندە تاماق پەن ويىن-ساۋىق، ەم شارالارى كىرمەيدى. مۇنداي ۇيلەردە تۇتاس وتباسىمەن دەمالۋ ءتيىمدى. ويتكەنى بالانىڭ جاسىنا قاراي جەڭىلدىكتەر كوزدەلگەن»، - دەلىنگەن ساراپتامادا.

«جۇلدىزى بار» قوناق ۇيلەردە باعا تىپتەن قىمباتتاعان.

«مىسالى، بەسجۇلدىزدى قوناق ۇيلەرىڭ باعاسى ءبىر جىلدىڭ ىشىندە 40,3 پايىز قىمباتتاپ وتىر. ءبىر ادام ءبىر تاۋلىك ءۇشىن ورتا ەسەپپەن 55,8 مىڭ تەڭگە تولەيدى. وسىلايشا، ەلدەگى ۇزدىك قوناق ۇيلەردە ءبىر اپتا تۇرۋ قۇنى ماۋسىم ايىنا دەيىن 390,8 مىڭ تەڭگە بولعان.

ماۋسىم ايىندا ەڭ قىمبات باعالار شۋچينسك- بۋراباي جانە قاپشاعاي سۋ قويماسىنىڭ جاعاسىنداعى دەمالىس ايماعىندا تىركەلگەن. قاپشاعاي سۋ قويماسىنىڭ جاعالاۋىندا ستاندارتتى قوناق ءۇيدىڭ ءبىر بولمەسىن جالداۋ ءۇشىن 20 مىڭ تەڭگەدەن 50 مىڭ تەڭگەگە دەيىن تولەۋ كەرەك. ال ليۋكس-نومەردىڭ باعاسى تاۋلىگىنە 119 مىڭ تەڭگەگە دەيىن بارادى. ال بۋرابايدا بۇل اقشانىڭ ىشىنە سكۋىقتىرۋ شارالارى كىرمەيدى، تەك تۇرۋ اقىسى عانا وسىنداي.

قىمبات قوناق ۇيلەردىڭ ىشىنە كاسپي جاعالاۋىنداعى نىساندار دا كىرەدى. شەتەلدىك ينۆەستور اقتاۋ قالاسىندا بەسجۇلدىزدى قوناق ءۇي سالعاننان بەرى ماڭعىستاۋ وبلىسىنا شەتەلدەن ۇشىپ كەلەتىن چارتەرلىك رەيستەر سانى ارتقان. مىسالى، بىلتىر باشقۇرتستان استاناسى ۋفا قالاسىنان، بيىل تەگەران، ماسكەۋ، قازان، ەكاتەرينبۋرگ قالاسىنان چەرتەرلىك رەيسپەن كەلۋشىلەر كوبەيگەن. مۇنداعى ەڭ تومەنگى باعا تاۋلىگىنە 32-36 مىڭ تەڭگە، ەڭ جوعارى باعا تاۋلىگىنە 42- 48 مىڭ تەڭگە بولعان. ءبىراق بۇل باعانىڭ سوڭعى شەگى ەمەس»، - دەپ جازادى Energyprom.kz.

ال الاكولدە ەكى ادامدىق ستاندارتتى نومەر باعاسى تاۋلىگىنە 15- 42 مىڭ تەڭگە اراسىندا، جارتىلاي ليۋكس نومەرلەر باعاسى 17- 64 مىڭ تەڭگە اراسىندا، ليۋكس نومەرلەر باعاسى 82 مىڭ تەڭگەگە دەيىن.

جىلدىڭ ءبىرىنىشى توقسانىندا عانا ەلدەگى دەمالىس بازالارى مەن شيپاجايلاردىڭ، مەيمانحانالاردىڭ قىزمەتىن 703 مىڭ ادام تۇتىنعان.

بۇل بىلتىرعىدان 31,8 پايىز ارتىق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى