ساراپشىلار قازاقستانداعى ينتەرنەت ساپاسى نەگە تومەندەپ بارا جاتقانىن ءتۇسىندىردى
«دەرەكتەردى بەرۋ ترافيگىنىڭ ۇدايى ءوسۋى بايلانىس وپەراتورلارىن قايتا- قايتا جەلى سىيىمدىلىعىن ارتتىرۋعا ماجبۇرلەپ وتىر. ول ءۇشىن بازالىق ستانسالاردىڭ سانىن ءوسىرىپ، سپەكترلەردىڭ تيىمدىلىگىن، رەسۋرستىڭ جيىلىگىن ارتتىرىپ وتىرۋ قاجەت. ال بازالىق ستانسالار سانىن ارتتىرۋ ءبىر جاعىنان وتە قىمبات بولسا، ەكىنشى جاعىنان جەلى سىيىمدىلىعىن ارتتىرۋدىڭ ەڭ ءبىر ءتيىمسىز ءتاسىلى سانالادى. وپەراتورلار جايشىلىقتا بۇل تاسىلگە جۇگىنبەۋگە تىرىسادى. ونىڭ ورنىنا كەڭجولاقتى جيىلىك دياپازوندارىن بەرۋ - سىيىمدىلىقتى ۇلعايتۋدىڭ نەگىزگى جولى دەلىنەدى. بۇكىل الەمدەگى سياقتى قازاقستاندا دا بەرىلەتىن دەرەكتەردىڭ كولەمىن ۇلعايتۋ ءۇشىن وپەراتورلارعا قوسىمشا ريديوجيىلىكتەر بەرۋ كەرەك. ءبىرىنشى كەزەكتە ارناسىنىڭ كەڭدىگى 100 م گ س بولاتىن 3,5 گگتس- تىك دياپازوندار قاجەت. قازاقستان بۇل تۇرعىدا جۇمىس ىستەپ جاتقانىمەن سپەكتر بولۋدە ءبىرقاتار پروبلەما بار»، - دەپ جازادى Ranking.kz.
قاۋىمداستىق ساراپشىلارى بازالىق ستانسا سالۋ ەرەجەسىن وڭايلاتۋ كەرەكتىگىن ايتقان.
انتەننالى ماچتا قۇرىلعىسىن ورناتىپ، ۇيالى بايلانىس جەلىسىن تارتۋ ءۇشىن وپەراتورلارعا وتە كوپ رۇقسات پەن ساراپتامالار راسىمدەۋ كەرەك.
ال بۇل كوپ ۋاقىت پەن وراسان شىعىندى تالاپ ەتەدى. وپەراتورلاردىڭ سوزىنشە، قازاقستاندا بۇل راسىمدەرگە جىلعا جۋىق ۋاقىت كەتەدى.
ساراپشىلار پاتەر يەلەرىنىڭ ينتەرنەت تارتۋعا رۇقسات الۋ پروتسەسى دە قيىن ەكەنىن اتاپ وتكەن.
«سانيتارلىق- ەپيدەميولوگيالىق قورىتىندى الۋعا تۇرعىندار اراسىنداعى راديوفوبيا كەدەرگى كەلتىرىپ وتىرسا كەرەك. مەملەكەتتىك نەمەسە مۋنيتسيپيالدىق مەنشىكتە تۇرعان ينفراقۇرىلىمعا قول جەتكىزۋدە دە قيىندىقتار بار. GSMA باعالاۋىنشا، قازاقستانداعى ۇيالى بايلانىستىڭ ءتاريفى كوپتەگەن ەلمەن سالىستىرعاندا ايتارلىقتاي تومەن. دەگەنمەن مۇنداي تومەن باعا سيفرلاندىرۋ سالاسىن دامىتۋعا كەدەرگى بولىپ وتىر. تاريفتەردى مەملەكەت دەڭگەيىندە رەتتەۋ نارىق زاڭدىلىقتارى مەن بايلانىس وپەراتورلارىنىڭ بيزنەس مودەلىن بۇزادى. بۇل جەلىلەر ينفراقۇرىلىمىنا ينۆەستيسيا تارتۋدى قيىنداتادى. وسىدان كەلىپ قىزمەت ساپاسى ناشارلايدى. حالىقارالىق تاجىريبەگە سۇيەنسەك، 4G جانە 5G جەلىلەرىن دامىتۋ ءۇشىن كوپتەگەن ەلدەردىڭ ۇكىمەتى وپەراتورلاردىڭ سالىق جۇكتەمەسىن ازايتىپ وتىر. ساراپشىلار ۇيالى بايلانىس ءتاريفى مەن ساپاسىن رەتتەۋدە مەملەكەتتىڭ قاتىسىن الىپ تاستاۋدى ۇسىنىپ وتىر. ولاردىڭ پايىمىنشا بۇل وپەراتورلاردىڭ سالاعا ينۆەستيسيا تارتۋىن قيىنداتادى»، - دەپ جازادى Ranking.kz.
