برازيليا ەكس-پرەزيدەنتى جاير بولسونارۋدىڭ سوتى باستالدى

ول سايلاۋدا بۇرمالاۋ تۋرالى جالعان اقپارات تاراتقانى ءۇشىن ايىپتالۋدا. بۇل ءۇشىن بولسونارۋ تۇرمەگە قامالمايدى، ءبىراق سايلاۋعا تۇسۋگە تىيىم سالىنۋى مۇمكىن، دەپ حابارلايدى قازاقپارات BBC گە سىلتەمە جاساپ.

جاير بولسونارۋ جالعان اقپارات تاراتۋ ءۇشىن پرەزيدەنت بيلىگىن اسىرا پايدالاندى دەپ ايىپتالىپ جاتىر.

اتاپ ايتقاندا، بىلتىر شىلدەدە پرەزيدەنت سايلاۋى الدىندا ول شەتەلدىك ەلشىلەردى جيناپ، ولارعا برازيليادا پايدالانىلاتىن ەلەكتروندى داۋىس بەرۋ ماشينالاردى حاكەرلەر بۇزا الاتىنىن مالىمدەپ، قارسىلاستارى سايلاۋ ناتيجەلەرىن بۇرمالاي الاتىنىن ايتقان.

پرەزيدەنت سايلاۋى 2022-جىلدىڭ قازانىندا ءوتتى. ەكىنشى كەزەڭدە بولسونارۋ سولشىل برازيليالىق ساياساتكەر لۋيس يناسيۋ «لۋلا» دا سيلۆادان از عانا داۋىسپەن جەڭىلىپ قالدى.

جوعارى سايلاۋ سوتى قاراپ جاتقان ءىس - قىلمىستىق ءىس ەمەس، جاير بولسونارۋ ول ءۇشىن تۇرمەگە جابىلمايدى. ءبىراق، سوت كوللەگياسى 68 جاستاعى ەكس-پرەزيدەنتكە 8 جىل سايلاۋعا تۇسپەۋگە تىيىم سالۋعا قۇقىلى.

سونداي-اق، بولسونارۋ بىرنەشە قىلمىستىق ءىس بويىنشا تەرگەۋگە الىنعان، ولاردىڭ پروتسەسى ءالى باستالعان جوق.

بولسونارۋ سايلاۋدان كەيىن جانە ونىڭ جاقتاستارى ۇيىمداستىرعان تارتىپسىزدىكتەردەن كەيىن ا ق ش- قا، فلوريداعا ۇشىپ كەتىپ، قايتا وتانىنا ورالدى.

2026-جىلعى سايلاۋعا تۇسەتىنىن ايتقان جوق، تەك ءوزى قۇرمەتتى ءتوراعا بولىپ وتىرعان ليبەرالدىق پارتياعا كەلەسى جىلعى جەرگىلىكتى سايلاۋعا كومەكتەسۋگە ۋادە ەتتى.

ايىپتاپ وتىرعان تاراپ بولسونارۋدىڭ ەلشىلەر الدىندا 2022-جىلدىڭ 18- شىلدەدە سويلەگەن ءسوزى سايلاۋ تۋرالى زاڭدى بۇزدى دەپ ەسەپتەيدى. بۇرىنعى پرەزيدەنت شەتەلدىك ديپلوماتتارعا برازيلياداعى سايلاۋ جۇيەسى قالاي جۇمىس ىستەيتىنىن ءتۇسىندىردىم دەپ سەندىرەدى.

وڭشىل پوپۋليست بولسونارۋدى دونالد ترامپپەن ءجيى سالىستىرادى. برازيليا پرەزيدەنتىنىڭ مەن ونىڭ جاقتاستارىنىڭ سايلاۋدا جەڭىلگەننەن كەيىنگى ءىس-ارەكەتى ءبىر جىل بۇرىن ا ق ش- تا بولعان وقيعانى ەسكە سالادى.

30- قازاندا لۋلادان ەكىنشى تۋردا نەبارى %1,8 ايىرماشىلىقپەن جەڭىلگەننەن كەيىن، بولسونارۋ جەڭىلىسىن مويىنداۋدان باس تارتتى - دەگەنمەن ول بيلىكتى بەرۋگە دايىندىق باستاۋدى بۇيىردى. ەكى ايدان كەيىن، لۋلانىڭ يناۋگۋراتسياسىنىڭ الدىندا ول ا ق ش- قا ۇشىپ كەتتى.

ەسكە سالايىق، برازيليانىڭ بۇرىنعى پرەزيدەنتى جاير بولسونارۋدىڭ جۇزدەگەن جاقتاسى ەلدىڭ ۇلتتىق كونگرەسىنە باسا كوكتەپ كىرگەنىن جازعان ەدىك.

ولار سونداي-اق جوعارعى سوت عيماراتىنا جانە پرەزيدەنت سارايىنا كىرگەن. شابۋىل ءۇش ساعاتقا سوزىلدى، كەيىن ونىڭ قاتىسۋشىلارىن پوليتسيا ۇستاپ اكەتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى