انتيكور ءبىلىم سالاسىنداعى قارجى جىمقىرۋدىڭ قىلمىستىق تاسىلدەرىن اشكەرەلەدى
بۇگىن وتكەن ۆەدومستۆوارالىق كەڭەستە تالداۋ قورىتىندىسى شىعارىلدى. وعان پرەزيدەنت اكىمشىلىگىنىڭ، ۇلتتىق بانكتىڭ، جوعارى اۋديتورلىق پالاتانىڭ وكىلدەرى، پارلامەنت ءماجىلىسىنىڭ دەپۋتاتتارى، ءبىلىم جانە سيفرلىق دامۋ مينيسترلەرى، قارجى، دەنساۋلىق ساقتاۋ، ەڭبەك جانە الەۋمەتتىك قورعاۋ ۆيتسە-مينيسترلەرى جانە قوعام قايراتكەرلەرى قاتىستى.
«سوڭعى ءۇش جىلدا مەملەكەت ءبىلىم بەرۋ سالاسىن دامىتۋعا 12,1 تريلليون تەڭگە باعىتتاعان، بۇل 2021-2023-جىلدارعا ارنالعان مەملەكەتتىك بيۋجەتتىڭ بارلىق شىعىستارىنىڭ %28 قۇرايدى.
«پەداگوگ مارتەبەسى تۋرالى» زاڭ قابىلدانىپ، مۇعالىمدەردىڭ جالاقىسى ەكى ەسەگە، ال عىلىمي دارەجەسى مەن ساباقتان تىس ساباقتارى بولعان جاعدايدا - ءۇش ەسەگە ارتتىرۋعا مۇمكىندىك بەرىلدى. الەۋمەتتىك قولداۋ شارالارىنا قاراماستان، ءبىلىم بەرۋ سالاسى ەڭ كوپ جەمقورلارلانعان سالالاردىڭ ءبىرى بولىپ قالۋدا. 2020-جىلدان باستاپ وسى سالاداعى قىلمىستىق ىستەر بويىنشا 143 ادام سوتتالدى. مەملەكەتكە كەلتىرىلگەن زالال شامامەن 11 ميلليارد تەڭگەنى قۇرادى، ونىڭ 5,2 ميلليارد تەڭگەسى وتەلدى» - دەپ جازدى انتيكوردان.
ونداعى دەرەكتەرگە قاراعاندا، تەك جەتىسۋ وبلىسىندا قالالىق ءبىلىم ءبولىمىنىڭ قىزمەتكەرلەرى 2,5 جىل ىشىندە 4,4 ميلليارد تەڭگەنى ۇرلاعان. قىلمىستىق توپقا باسشى جانە ەكى ءبىلىم بەرۋ بۋحگالتەرى، سونداي-اق 13 مەكتەپ بۋحگالتەرلەرى كىردى. مۇنداي قىلمىستىق سحەمالار ەلدىڭ بارلىق اۋماعىندا انىقتالدى. الماتى، شىمكەنت قالالارىندا، قىزىلوردا، اقتوبە جانە الماتى وبلىستارىندا ەڭ ءىرى جىمقىرۋ فاكتىسى تىركەلدى.
«ماسەلەن، جەمقورلىق تاۋەكەلدەرىنە سىرتقى تالداۋ ناتيجەلەرى بويىنشا بيۋجەت اقشاسىن جىمقىرۋدىڭ تۇراقتى تاسىلدەرى اشىلدى:
1. قىزمەتكەردىڭ جالاقىسىنا ونىڭ لاۋازىمىنا قاراعاندا الدەقايدا كوپ اقشا اۋدارعان؛
2. جالاقى مەكتەپتە مۇلدەم جۇمىس ىستەمەيتىن ادامدارعا اۋدارىلعان؛
3. قىزمەتكەردىڭ كارت-شوتتارىنا جالاقى ەسەپتەلىپ، ال تولەمدەردە باسقا تۇلعانىڭ تەگى كورسەتىلگەن؛
4. ءبىر ادامعا اقشا اۋدارىمدارىن بىرنەشە رەت اۋدارعان؛
5. ولار اقشانى «ءولى جاندارعا» - تۋىستارى مەن جاقىندارىنا اۋدارعان.
جوعارىدا اتالعان بارلىق جىمقىرۋ ادىستەرى ءبىر سحەما ارقىلى جۇزەگە اسىرىلادى. الدىمەن بۋحگالتەر تولەم قۇجاتتارىن ۆەدومستۆولىق ەسەپ جۇيەلەرىنەن تۇسىرەدى. ءارى قاراي، قاجەتتى تۇزەتۋلەر قولمەن ەنگىزىلىپ، بۇرمالانعان مالىمەتتەرى بار قۇجاتتار كەيىن تولەمگە جىبەرىلەدى»، - دەپ جازدى ۆەدومستۆودان.
مۇنداي مانيپۋلياتسيالار مەكتەپتىڭ اتالعان بۋحگالتەرلىك ەسەپ جۇيەلەرى، ۇلتتىق ءبىلىم بەرۋ بازاسى جانە قازىناشىلىق-كليەنت بازاسى اراسىنداعى ينتەگراتسيانىڭ بولماۋىنا بايلانىستى جۇزەگە اسقان.
وسىنداي فاكتىلەردى بولدىرماۋ ماقساتىندا كەڭەس قورىتىندىسى بويىنشا ۋاكىلەتتى ورگاندار اراسىندا ءبىلىم بەرۋ سالاسىنداعى سىبايلاس جەمقورلىق تاۋەكەلدەرىن جويۋ جونىندەگى «جول كارتاسىنا» قول قويىلدى.
