كوشپەندىلەر اۋەنى: قۇرمانعازى وركەسترى ريم قالاسىندا كۇي تارتتى
قۇرمانعازى وركەسترىنىڭ 90 جىلدىق مەرەيتويى اياسىندا ۇيىمداستىرىلعان گاسترولدىك كونسەرتتە ۇلتتىق وركەسترمەن قاتار، ق ر ەڭبەك سىڭىرگەن قايراتكەرى باتىرجان مىقتىبايەۆ، ءداستۇرلى ءانشى سەرجان مۇسايىن، حالىقارالىق كونكۋرستاردىڭ لاۋرەاتى اسەل راقىمجان، اقايشا جۇرباي، Raffaele Collienza، ريم قالاسىنداعى سانتا چەچيليا مۋزىكالىق كونسەرۆاتورياسىنىڭ تۇلەگى لاۋرا الي ونەر كورسەتتى.
«ۇلتتىق وركەستر بۇعان دەيىن الەمنىڭ 90 عا جۋىق مەملەكەتىندە ونەر كورسەتىپ، قازاقتىڭ ءتول مادەنيەتىن، ءتول مۋزىكاسىن، «قازاق» دەگەن ۇلى ەلدىڭ بار ەكەنىن ۇلتتىق مۋزىكالىق اسپاپتاردىڭ اۋەزدى ۇنىمەن تانىتىپ كەلەدى. ال، بيىل الەمدىك كلاسسيكانىڭ وتانىنا اينالعان يتاليا جەرىندە كەزەكتى گاسترولدىك كونسەرتىمىزدى وتكىزۋ بۇيىرىپتى. بۇل - بيىلعا شەتەلگە ۇيىمداستىرىلعان ەكىنشى گاسترولدىك ساپارىمىز. وسى گاسترولدىك ساپاردا قۇرمانعازى وركەسترىنىڭ مەرەيلى 90-ماۋسىمىنىڭ شىمىلدىعى ءتۇرىلدى. ءبىزدىڭ اۋقىمدى دەڭگەيدەگى كونسەرتىمىزگە قولداۋ بىلدىرگەن ق ر مادەنيەت جانە سپورت مينيسترلىگىنە جانە ق ر يتاليا رەسپۋبليكاسىنداعى توتەنشە جانە وكىلەتتى ەلشىسى ەربولات ناسەن ۇلىنا، ق ر سان-مارينو مەملەكەتىندەگى قۇرمەتتى كونسۋلى Pomponi Giovanni مىرزاعا قۇرمانعازى وركەسترىنىڭ ۇجىمى اتىنان العىسىمىزدى بىلدىرەمىز»، - دەدى وركەستردىڭ باس ديريجەرى ابىلاي تىلەپبەرگەن.
بۇل گاسترولدىك ساپار قۇرمانعازى وركەسترىنىڭ يتالياعا جاساعان العاشقى ساپارى ەمەس.
«بۇعان دەيىن 1976-جىلى كومپوزيتور عازيزا جۇبانوۆانىڭ باستاۋىمەن ريم، ميلان، نەاپول قالالارىمەن قاتار، ساردينيا، سيتسيليا ارالدارىندا قازاق ونەرىن ناسيحاتتادى. ال بيىلعى گاسترولدىك ساپاردى يتاليانىڭ استاناسى ريم قالاسىنان باستادىق. نەاپول، فلورەنتسيا قالالارىندا اۋقىمدى دەڭگەيدەگى ساپار جالعاسىن تابادى. ۇلتتىق مۋزىكالىق مۇرانى وسىلايشا كۇللى الەم حالىقتارىنا پاش ەتىپ، ۇلتتىق اسپاپتاردىڭ كومەيىنەن شىققان سازدى اۋەنمەن ۇلت مادەنيەتىن تانىتۋ - ۇلتتىق وركەستردىڭ باستى پارىزى»، - دەدى وركەستر ديرەكتورى مەدەت قۋانىشيەۆ.
كونسەرت سوڭىندا قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى مەدەت قۋانىشيەۆ ق ر يتاليا رەسپۋبليكاسىنداعى توتەنشە جانە وكىلەتتى ەلشىسى ەربولات ناسەن ۇلىنا، ق ر سان-مارينو مەملەكەتىندەگى قۇرمەتتى كونسۋلى Pomponi Giovanni مىرزاعا قازاقي داستۇرگە ساي شاپان جاۋىپ، شىعارماشىلىق قولداۋلارى ءۇشىن العىس ءبىلدىردى.
