ورتالىق ازياداعى قاۋىپسىزدىكتى قامتاماسىز ەتۋدە قازىر جاڭا تاسىلدەر تالاپ ەتىلەدى - پرەزيدەنت
قازاقستان پرەزيدەنتى قاسىم-جومارت توقايەۆ فورۋمعا قاتىسۋشىلارعا ارناعان قۇتتىقتاۋ بەينەۇندەۋىندە قازىرگى زامانعى ناقتى جاعدايدا ءبىزدىڭ ءوڭىر ءۇشىن ەڭ ماڭىزدى مىندەت - تۇراقتىلىقتى ساقتاۋ جانە قاۋىپسىزدىكتى نىعايتۋ ەكەنىن ايتتى. بۇل رەتتە قاۋىپ-قاتەردى ءتيىمدى بولجاۋ، الدىن الۋ شارالارىن جەدەل ازىرلەۋ جانە ساپالى جاڭا ينتەگراتسيالانعان تاسىلدەر تالاپ ەتىلەدى.
«قازىرگى زامانعى ناقتى جاعدايدا ءبىزدىڭ ءوڭىر ءۇشىن ەڭ ماڭىزدى مىندەت - تۇراقتىلىقتى ساقتاۋ جانە شەكارالاردىڭ بۇكىل پەريمەترى بويىنشا قاۋىپسىزدىكتى نىعايتۋ. ءبىز بۇل ماسەلەنى 2022-جىلدىڭ قازان ايىندا ەلوردادا ورتالىق ازيا جانە رەسەي فورماتىنداعى وتكەن مەملەكەت باسشىلارىنىڭ ءبىرىنشى كەزدەسۋىندە جان-جاقتى تالقىلادىق. قاۋىپسىزدىك ءبىزدىڭ ءوزارا ءىس-ارەكەتىمىزدىڭ شەشۋشى باعىتتارىنىڭ ءبىرى رەتىندە انىقتالدى. بۇل رەتتە قاۋىپ-قاتەردى ءتيىمدى بولجاۋ، ەرتە كەزەڭدە الدىن الۋ شارالارىن جەدەل ازىرلەۋ قارالادى»، - دەدى پرەزيدەنت.
پرەزيدەنت ورتالىق ازيا ەلدەرى مەن رەسەي قاۋىپسىزدىك كەڭەستەرى حاتشىلارى اراسىنداعى كەزدەسۋلەر وسى باعىتتاعى ناقتى تاسىلدەر مەن شەشىمدەردىڭ قالىپتاسۋىنا ىقپال ەتەتىنىن مالىمدەدى.
«گيبريدتى امالدار مەن اقپاراتتىق تەحنولوگيالاردى قولدانا وتىرىپ، وڭىردەگى جاعداي تۇراقتىلىعىن بۇزۋ ارەكەتتەرىنە جاۋاپ بەرۋدىڭ ناقتى مەحانيزمىن جاساقتاۋ قاجەت»، - دەدى پرەزيدەنت.
سونداي-اق، مەملەكەت باسشىسى حالىقارالىق لاڭكەستىك توپتارمەن، ترانسۇلتتىق ۇيىمداسقان قىلمىسپەن، ءدىني راديكالدارمەن تىعىز استاسىپ جاتقان ەسىرتكى بيزنەسىمەن كۇرەسكە ەرەكشە كوڭىل ءبولۋ كەرەكتىگىن ايتتى.
«بۇل رەتتە ورتالىق ازيا ءوڭىرى بويىنشا ەسىرتكى قۇرالدارىنىڭ زاڭسىز اينالىمىنا قارسى كۇرەس جونىندەگى اقپاراتتىق ۇيلەستىرۋ ورتالىعى سياقتى قۇرىلىمدار شەشۋشى ءرول اتقارۋى ءتيىس. بۇل ورتالىقتىڭ الەۋەتى ءالى تولىق اشىلعان جوق. ايماقتىق قاۋىپسىزدىكتىڭ اتالعان تاۋەكەلدەرى اۋعانستانداعى جاعدايمەن تىعىز بايلانىستى. بۇل ەلدىڭ الەۋمەتتىك-ەكونوميكالىق جاعدايىن جاقسارتۋ بويىنشا ءتيىستى قادامدار الماتىدا قۇرىلىپ جاتقان ب ۇ ۇ ايماقتىق حابىنىڭ قىزمەتى اياسىندا جۇزەگە اسىرىلۋى مۇمكىن. جالپى، قازىرگى كەزەڭدە اقپارات الماسۋدى كەڭەيتۋ جانە وڭىرلىك قاۋىپسىزدىكتى قامتاماسىز ەتۋ سالاسىنداعى ۇيلەستىرۋدى ارتتىرۋ بويىنشا جەكە شارالار جەتكىلىكسىز دەپ ويلايمىن. ۋاقىت ساپالى تۇردە ينتەگراتسيالانعان جاڭا تاسىلدەر قالىپتاستىرۋدى تالاپ ەتەدى. وسى كەزدەسۋ وعان جاقسى نەگىز بولاتىنىنا سەنىمدىمىن»، - دەدى قاسىم-جومارت توقايەۆ.
ءبىرىنشى كەزدەسۋ بارىسىندا قاۋىپسىزدىك كەڭەستەرىنىڭ حاتشىلارى قازىرگى حالىقارالىق جاعداي مەن ايماق ەلدەرىنىڭ ۇلتتىق مۇددەلەرىنە نەگىزدەلگەن ىنتىماقتاستىقتىڭ ناقتى باعىتتارىن قاراستىردى.
photo
پرەزيدەنتتىڭ كومەكشىسى - قر قاۋىپسىزدىك كەڭەسىنىڭ حاتشىسى عيزات نۇرداۋلەتوۆ ىنتىماقتاستىقتىڭ باسىم باعىتتارىن، ونىڭ ىشىندە اۋعانستانداعى جاعدايدى تۇراقتاندىرۋعا، كولىك جانە ازىق- تۇلىك قاۋىپسىزدىگىن قامتاماسىز ەتۋگە ىقپال ەتۋدى ۇسىندى. جالپى ەكوجۇيەنى، سونىڭ ىشىندە كليماتتىڭ وزگەرۋى جاعدايىندا ساقتاۋ قاجەتتىگىن ەسكەرە وتىرىپ، سۋ قاۋىپسىزدىگى ماسەلەلەرىنە ەرەكشە نازار اۋدارىلدى.
عيزات نۇرداۋلەتوۆ پەن رەسەي قاۋىپسىزدىك كەڭەسىنىڭ حاتشىسى نيكولاي پاترۋشيەۆتىڭ توراعالىعىمەن قازاقستان مەن رەسەي قاۋىپسىزدىك كەڭەستەرىنىڭ اپپاراتتارى اراسىندا جوسپارلى ەكىجاقتى كونسۋلتاتسيالار ءوتتى، وعان ءتيىستى ۆەدومستۆولاردىڭ باسشىلارى مەن قىزمەتكەرلەرى دە قاتىستى. تاراپتار ورتالىق ازياداعى تەرروريزم مەن ءدىني ەكسترەميزمگە قارسى ءىس- قيمىل سالاسىنداعى ىنتىماقتاستىقتى تالقىلادى، قازىرگى گەوساياسي جاعدايعا باعا بەردى.
