قاجەت بولسا سيريا بويىنشا استانا پروتسەسىن قايتا باستاۋعا دايىنبىز – س ءى م
وندا س ءى م قازاقستاننىڭ استانا فورماتىنداعى سيريا بويىنشا جوعارى دەڭگەيدەگى 20-حالىقارالىق كەزدەسۋدى نەلىكتەن ءوز اۋماعىنداعى كەلىسسوز پروتسەسىنىڭ مارەسى دەپ جاريالاعانىن تۇسىندىرەدى.
«بۇل فورماتتىڭ جەنيەۆا پروتسەسىنە قوسىمشا كەلىسسوز الاڭى رەتىندە قۇرىلعانى جانە قاقتىعىستى توقتاتۋ ءۇشىن ناقتى پراكتيكالىق مىندەتتەردى شەشۋگە ارنالعانى ءمالىم. وسى تۇرعىدا قازىرگى ۋاقىتتا ونىڭ دەەسكالاتسيا ايماقتارىن قۇرۋ، جانجالداسۋشى تاراپتار اراسىنداعى قانتوگىستى توقتاتۋ جانە اۋقىمدى گۋمانيتارلىق داعدارىستىڭ الدىن الۋى ءتارىزدى باستاپقى ماقساتتارى ورىندالدى» دەيدى ۆەدومسۆو.
بۇگىنگى تاڭدا تاياۋ شىعىس ايماعىنداعى ساياسي احۋال تۇبەگەيلى وزگەرىپ جاتىر.
اراب مەملەكەتتەرىنىڭ داماسكىمەن قارىم-قاتىناسىن قالپىنا كەلتىرۋگە ۇمتىلىسى بايقالادى.
سيريانىڭ اراب مەملەكەتتەرىنىڭ ليگاسىنداعى مۇشەلىگى قايتارىلدى.
باۋىرلاس تۇركيا رەسپۋبليكاسى دوستاس سيريامەن ءوز قارىم-قاتىناسىن وڭالتۋعا نيەتتى.
«وسىعان بايلانىستى سيريانىڭ ايماقتاعى وقشاۋلاۋدان بىرتىندەپ شىعۋىن سيريا بويىنشا استانا پروتسەسى اياسىندا جۇمسالعان كۇش- جىگەردىڭ زور ناتيجەسى دەپ سەنىممەن ايتۋعا بولادى. دەگەنمەن، ەگەر استانا فورماتىنداعى سيريا بويىنشا حالىقارالىق كەزدەسۋگە قاتىسۋشىلار تاراپىنان استانا قالاسىندا كەلىسسوزدى جالعاستىرۋ جونىندە ورتاق ءوتىنىش تۇسسە، قازاقستان باسقا الاڭدارداعى كەلىسسوزدىڭ بارىسىن جانە جالپى سيرياداعى جاعدايدى ەسكەرە وتىرىپ، بۇل پروتسەستى ىزگى نيەت ارەكەتى رەتىندە قايتا باستاۋ مۇمكىندىگىن قاراستىرۋعا دايىن» دەلىنگەن مالىمدەمەدە.
ەسكە سالا كەتەيىك، كەشە سيريا بويىنشا استانا پروتسەسى رەسمي اياقتالعانىن حابارلاعان ەدىك.
