قۇيرىق مايدىڭ پايداسى بار ما؟ نۋتريتسيولوگ جاۋاپ بەردى
دارىگەر باياعىدا ۇلكەن كىسىلەر قۇيرىق مايدى ءجيى قولداناتىنىن ايتىپ، بالا كەزىن ەسكە ءتۇسىردى.
«بالا كەزدە سۋىقتاپ اۋىرساق، اپامىز قۇيرىق مايدى جىلىتىپ اشقارىنعا جەگىزىپ، سوڭىنان ىستىق ءسۇت ىشكىزىپ، مايمەن ارقامىزدى سىلايتىن ەدى. سودان كەيىن وڭەشىڭ جۇمساپ، جانىڭ راقاتتانىپ، ۇيىقتاپ كەتكەنىڭدى بايقاماي قالاسىڭ»، - دەپ جازدى ول.
ءبىراق قازىر كوپشىلىك ونى قولدانبايدى.
«ال قازىر قويدىڭ مايى حولەستەرين مولشەرىن جوعارىلاتىپ، جۇرەك-قان تامىرلار اۋرۋلارىنا ۇشىراتادى دەپ، سوناۋ اتا-بابامىزدان قانىمىزعا سىڭگەن ۇيرەنشىكتى استان باس تارتقىزىپ، اۆوكادو، رۋككولا، مايسىز ەت دەپ ءارتۇرلى ونىمدەردى ۇسىنىپ جاتىر. ولاردىڭ باعاسى دا قىمبات»، - دەدى مامان.
نۋتريتسيولوگ لاۋرا سەيىتبەك قۇيرىق مايدا پايدالى ماي قىشقىلدارى بار ەكەنىن جازدى.
«ال شىندىعىندا، قۇيرىق مايدىڭ پايداسى كوپ. ونىڭ قۇرامىندا اعزاعا پايدالى ماي قىشقىلدارى (لاۆر، ستەارين، ولەين، پالميت جانە ت. ب) بار»، - دەدى ول.
ماماننىڭ ايتۋىنشا، بۇل قىشقىلدار مىناداي قاسيەتتەرگە يە:
ولەين قىشقىلى - جۇرەك-قان تامىرلار اۋرۋلارىنىڭ الدىن الادى. ول جوعارى تەمپەراتۋراعا ءتوزىمدى ءارى ادام دەنساۋلىعىنا زياندى ماي قىشقىلدارىنا ىدىرامايدى.
ستەارين قىشقىلى - ەرلەردىڭ جىنىستىق بەلسەندىلىگىن ارتتىرىپ، قاۋىپتى ىسىكتىڭ الدىن الادى. ءارى بۇل قىشقىل ادام اعزاسىنا ۋلى ەمەس.
ودان بولەك وندا مىرىش، ماگني، سەلەن، فوسفور، ناتري سياقتى بالا اعزاسىنا اۋاداي قاجەت مينەرالدارعا باي.
ولاردىڭ مىناداي پايداسى بار:
اسقازان-ىشەك جولدارىنىڭ قىزمەتىن جاقسارتادى؛
ءوتتى سۇيىلتىپ، ءوت قىشقىلىنىڭ جاقسى بولىنۋىنە جاردەمدەسەدى؛
اعزادا جاڭا گورموندار تۇزەدى؛
دارىگەردىڭ ايتۋىنشا، قۇيرىق مايدى قايناتساڭىز دا، قاقتاساڭىز دا ءوز قۇرامىن بۇزباي، پايداسى ساقتالادى.
