جوعالعان سۇڭگۋىر قايىق ىشىندە ۇلىمەن بىرگە پاكىستاننىڭ ەڭ باي ادامدارىنىڭ ءبىرى بولعان
ءبىر كۇن بۇرىن OceanGate Expeditions تۋريستەردى تيتانيك جولاۋشىلار لاينەرى باتىپ كەتكەن جەرگە جەتكىزۋگە ارنالعان ەكيپاجى بار قايىقتىڭ جوعالعانىن راستادى. «تيتان» جەكسەنبى كۇنى تاڭەرتەڭ كەمە سۋعا باتقاننان كەيىن شامامەن ءبىر ساعات 45 مينۋتتان سوڭ Polar Prince زەرتتەۋ كەمەسىمەن بايلانىسىن ۇزگەن.
سونداي- اق بورتتا بريتاندىق ميللياردەر جانە زەرتتەۋشى حاميش حاردينگ، فرانسۋز سۇڭگۋىر جۇرگىزۋشىسى پول- گەنري نارگولەت، OceanGate Expeditions كومپانياسىنىڭ باس ديرەكتورى جانە نەگىزىن قالاۋشى ستوكتون راش بار.
قازىر وقيعا ايماعىندا ا ق ش جاعالاۋ كۇزەتى باستاعان اسكەري ۇشاقتاردىڭ قاتىسۋىمەن ىزدەستىرۋ- قۇتقارۋ وپەراتسياسى جۇرگىزىلىپ جاتىر. وعان كانادانىڭ جاعالاۋ كۇزەتى مەن كانادا كۇشتەرى ىزدەۋگە قوسىلدى. اتاپ ايتقاندا، كانادالىقتار س-130 ۇشاعىن جانە ر-8 سۇڭگۋىر قايىعىن ىسكە قوسقان.
اتاپ وتىلگەندەي، قۇتقارۋ جۇمىستارى سۇڭگۋىردىڭ وتە تەرەڭگە كەتۋىمەن قيىنداپ جاتىر. OceanGate مالىمەتتەرى بويىنشا، «تيتان» سۇڭگۋىر اپپاراتى «قاۋىپسىزدىكتىڭ قولايلى شەگىمەن» ءتورت شاقىرىمعا دەيىنگى تەرەڭدىككە سۇڭگۋگە قابىلەتتى.
پورتتارعا ءوز كۇشىمەن كىرىپ- شىعا الاتىن سۇڭگۋىر قايىققا قاراعاندا، ۇزىندىعى 6 م، سالماعى 9 توننا «تيتان» - باتيسكافتىڭ ءبىر ءتۇرى بولعاندىقتان، ول ونى سۋاستىنداعى ورىنعا تاسىمالدايتىن سۋ ۇستىندەگى كومەكشى كەمەگە تاۋەلدى. ول بەكىتىلگەن پلاتفورماسىنان تولقىننىڭ اسەر ەتۋ تەرەڭدىگىنەن ارىرەك، ياعني شامامەن 9 مەترگە تومەندەپ، كەيىن باللاستى پايدالانىپ 4000 مەتردەي تەرەڭدىككە تۇسەدى. سۋ تۇبىندە «تيتان» ءتورت ەلەكتر قوزعالتقىشىنىڭ كومەگىمەن جۇزەدى. قايتار جولدا قۇرىلعى باللاستى اجىراتىپ، پلاتفورماعا قالقىپ بارادى دا كومەكشى كەمەگە كوتەرىلەدى.
بريتاندىق Daily Mail گازەتى 48 جاستاعى داۋدتى پاكىستانداعى ەڭ باي ادامداردىڭ ءبىرى دەپ اتايدى. ول شتاب- پاتەرى كاراچيدە ورنالاسقان، تىڭايتقىشتار، ازىق- تۇلىك، حيميا سالالارىن قامتيتىن كونگلومەرات ەنگرو كورپوراتسياسىنىڭ ۆيتسە- پرەزيدەنتى. تابلويدتىڭ حابارلاۋىنشا، ول سونىمەن بىرگە 1976 -جىلى ۇلى بريتانيانىڭ قازىرگى كورولى چارلز III نەگىزىن قالاعان Prince's Trust قايىرىمدىلىق ۇيىمىنىڭ باسشىلىق قۇرامىندا بار.
تۋريستەردى 3,8 مىڭ مەتر تەرەڭدىكتەگى «تيتانيك» قيراندىسىنا جەتكىزۋمەن OceanGate ەكسپەديتسياسى اينالىسادى. باعاسى 250000 دوللار تۇرادى.
ەكيپاجدا توتەنشە جاعدايلار ءۇشىن 96 ساعاتتىق وتتەگى بار. بيلىكتىڭ باعالاۋى بويىنشا، سارسەنبى كۇنى تاڭەرتەڭ كەمەدە شامامەن 30 ساعاتتىق وتتەگى قالعان.
داۋدتىڭ وتباسى دوستارى مەن ادامدارعا الاڭداۋشىلىق بىلدىرگەنى ءۇشىن العىس ايتىپ، ولاردىڭ قاۋىپسىزدىگى ءۇشىن دۇعا ەتۋگە شاقىردى.
«تيتانيك» لاينەرى 1912 -جىلى ساۋىردە ايسبەرگپەن سوقتىعىسىپ، سولتۇستىك اتلانت مۇحيتىندا 3750 مەتر تەرەڭدىكتە باتىپ كەتتى. اپات بولعان جەر نيۋفاۋندلەند (كانادا) ارالىنان شامامەن 600 شاقىرىم جەردە ورنالاسقان.
ايتا كەتەيىك، بۇعان دەيىن «تيتان» سۇڭگۋىر قايىعىنىڭ جوعالىپ كەتكەنىن حابارلاعان ەدىك.
اقپارات دەرەككوزى: https://massaget.kz
