تۇركىستان وبلىسىنىڭ تۇرعىنى گازبەن جۇرەتىن شاعىن تراكتور قۇراستىردى
كەلەس اۋدانىنا قاراستى كوكبۇلاق اۋىلىنىڭ تۇرعىنى احمەد شۇكىر ۇلى قولدان شاعىن تراكتور قۇراستىرىپ شىقتى. ءبىر ەرەكشەلىگى ونەرتاپقىش اۋلانىڭ ءار بۇرىشىندا جاتقان جارامسىز تەحنيكا بولشەكتەرىن جيناپ، كادەگە اسىرعان. ماسەلەن، تراكتوردىڭ ماتورى ۆاز-2106 كولىگىنەن الىنعان. ال، قوزعالتقىشى گاز-52 گە تيەسەلى. سونداي-اق، ارتقى موست گاز-53 كولىگىنىكى. جۇرگىزۋشى وتىراتىن كابينانى كادۋەلگى تەمىرمەن دانەكەرلەپ، توبەسىن ماتامەن جاپقان. جالپى اۋىل تۇرعىنى ءۇش جىل ىشىندە گازبەن جۇرەتىن شاعىن تراكتوردى قولدانىسقا ەندىردى.
«اۋىلىمىزدىڭ تۇرعىندارى اۋىل شارۋاشىلىعى سالاسىندا ەڭبەكتەنەدى. تراكتور الۋعا ەكىنىڭ ءبىرىنىڭ قولى جەتە بەرمەيدى. سودان بوس ۋاقىتىمدا كەرەكسىز تەحنيكالاردىڭ باسىن قوسىپ، تراكتور قۇرىستىرۋعا كىرىستىم. الداعى ۋاقىتتا تراكتوردى جەتىلدىرەمىن. پلاستيكتەن تەرەزەلەر ورناتىپ، ەسىك قويامىن»، - دەيدى ول.
بۇگىنگى كۇنى احمەد شۇكىر ۇلىنىڭ قولدان جاساعان تراكتورى اۋىلداعى جەر جىرتۋ، ءشوپ جيناۋ، ەگىندى تىرمالاۋ، جۇيەك تارتۋ جۇمىستارىنا جاراپ تۇر. اۋىل تۇرعىندارى ارنايى اقىسىن بەرىپ، قاجەتتى جۇمىستارىن جاساتۋدا. ونەرتاپقىشتا بۇل باعىتتاعى جۇمىستارىن جالعاستىرا بەرمەك.
