نەلىكتەن جاڭبىرلى كۇنى ۇيقىڭىز كەلەدى؟
كۇن جارىعىنىڭ جەتىسپەۋى
جاڭبىرلى كۇندەردەگى بۇلتتى اتموسفەرا شارشاڭقىلىققا جانە ۇيقىشىلدىققا اكەلەدى. سونداي-اق ول كوڭىل كۇيدىڭ وزگەرۋىنە اسەر بەرەدى. سەبەبى كۇن كوزىنىڭ جەتكىلىكتى بولماۋى سەروتونين گورمونىنىڭ ازىراق بولىنۋىنە اكەلەدى. ال بۇل گورمون جاقسى كوڭىل كۇيگە جاۋاپ بەرەدى. سول ءۇشىن كوپشىلىك ادام ءوزىن شارشاڭقى جانە ابىرجىعان سەزىنەدى.
سونداي-اق بۇل كەزدە مەلاتونين گورمونى بەلسەندى بولىنەدى. بۇل ۇيقىنى رەتتەۋگە جانە اعزانىڭ تسيركادتى ىرعاعىن رەتتەۋگە قاجەتتى گورمون. ونىڭ ءبولىنۋى ۋاقىتىندا توقتاۋ ءۇشىن كۇننىڭ كوزى كەرەك.
جاڭبىر دىبىسى القىزىل شۋعا جاتادى
شۋ تۇستەرى دەپ اتالاتىن تەرميندەر جۇيەسىنە سايكەس، فونداعى دىبىستار ادامدارعا قانداي دا ءبىر اسەر بەرەدى. ولار قۋاتتىلىعى، جيىلىگى جانە تىعىزدىعى بويىنشا بولىنەدى.
ال قىزىل شۋ - جيىلىگى 40-60 گ ت س بولاتىن، ال قۋاتتىلىعى 4000 گ ت س- تەن 6000 گ ت س- كە دەيىنگى دىبىستار. مۇنداي شۋعا جۇرەك سوعىسى، جەل مەن تولقىن شۋى، عارىشتىق دەنەلەردىڭ ەلەكتروماگنيتتىك ساۋلەلەنۋى جانە جاڭبىر دىبىسى جاتادى. ال قىزىل شۋ ۇيقىنى ساپالى ءارى تەرەڭ ەتەتىنىن دالەلدەيتىن زەرتتەۋلەر بولعان. كوپشىلىك جاڭبىر جاۋىپ تۇرعان كەزدە جىلدام جانە قاتتى ۇيىقتاپ كەتەتىنىن ايتادى.
قىسىمنىڭ وزگەرۋى
جاڭبىرلى اۋا رايىندا اتموسفەرالىق قىسىم مەن اۋاداعى وتتەك كەنتسەنتراتسياسى ءتۇسىپ كەتەدى. سوندىقتان ادامنىڭ ارتەريالىق قىسىمى ءتۇسىپ كەتۋى مۇمكىن. ال ودان قانداعى وتتەك كونتسەنتراتسياسى ازايىپ، ميدىڭ جۇيكە ءتىنى بەلسەندىلىگى ازايادى. سونىڭ سالدارىنان ادامدار جاڭبىرلى كۇنى وزدەرىن شارشاڭقى سەزىنەدى جانە ۇيقىلارى كەلۋى مۇمكىن.
پەتريكور
جاڭبىر جاۋعان كەزدە شىعاتىن جەردىڭ ءيىسىن پەتريكور دەپ اتايدى. كەي عالىمداردىڭ ايتۋىنشا، پەتريكور كوپشىلىك ادامعا تىنىشتاندىرۋشى جانە بوساڭسىتۋشى اسەر بەرەدى.
فيزيكالىق بەلسەندىلىكتىڭ بولماۋى
جاڭبىرلى كۇندەرى كوپشىلىك سەرۋەندەۋگە شىقپايدى. ادام بەلسەندى بولماسا، ەنەرگيا دەڭگەيى ءتۇسىپ كەتەدى. ارتەريالىق قىسىم تومەندەگەندىكتەن جانە سەروتونين جەتىسپەگەندىكتەن، ءتىپتى، قاراپايىم تۇرمىستىق ىستەردىڭ ءوزى كەيىنگە قالادى. ادامدار جاڭبىرلى كۇنى جاتقاندى، تەلەديدار قاراعاندى، قولونەرمەن اينالىسقاندى جاقسى كورەدى. بۇل ۇيقىشىلدىققا اكەلەدى. سوندىقتان ەگەر جاڭبىرلى كۇنى سەرگەك جۇرگىڭىز كەلسە، قوزعالىڭىز.
massaget.kz
