اقتاۋدا قازاق- نەمىس تۇراقتى ينجەنەريا ينستيتۋتى اشىلدى
بۇگىن ش. ەسەنوۆ اتىنداعى كاسپيي تەحنولوگيالار جانە ينجينيرينگ ۋنيۆەرسيتەتى مەن جانە قازاقستان- نەمىس ۋنيۆەرسيتەتىنىڭ بىرلەسكەن باستاماسىمەن اقتاۋ قالاسىندا قازاق- نەمىس تۇراقتى ينجەنەريا ينستيتۋتى اشىلدى.
سالتاناتتى راسىمدە جاڭا ينستيتۋت عيماراتى بوي كوتەرەتىن ورىنعا ەسكەرتكىش كاپسۋلانى گەرمانيا فەدەراتيۆتىك رەسپۋبليكاسىنىڭ پرەزيدەنتى فرانك- ۆالتەر شتاينمايەر مەن ق ر پرەمەر- ءمينيسترى ءاليحان سمايىلوۆ سالدى.
سونداي- اق، ق ر عىلىم جانە جوعارى ءبىلىم ءمينيسترى ساياسات نۇربەك، ماڭعىستاۋ وبلىسىنىڭ اكىمى نۇرلان نوعايەۆ، قازاقستان- نەمىس ۋنيۆەرسيتەتىنىڭ پرەزيدەنتى ۆولراد روممەل مەن Yessenov University پرەزيدەنتى بەرىك احمەتوۆ راسىمگە قاتىستى.
نەمىس ۋنيۆەرسيتەتتەر كونسورتسيۋمى اياسىندا اشىلعان جاڭا ينستيتۋت ماڭعىستاۋ وڭىرىندە تەحنيكالىق ونەركاسىپتىڭ ءارتۇرلى سالالارىندا جۇمىس ىستەيتىن مامانداردى دايىنداۋعا مۇمكىندىك بەرەدى دەپ كۇتىلىپ وتىر.
«قازاق- نەمىس تۇراقتى ينجەنەريا ينستيتۋتىن قۇرۋ ماڭعىستاۋدا ەنەرگەتيكا، لوگيستيكا، مۇناي- حيميا، ەكولوگيا، اقپاراتتىق تەحنولوگيالاردى دامىتۋ جانە ءوڭىردىڭ ينفراقۇرىلىمىن جاقسارتۋ ءۇشىن كادرلار دايارلاۋدى قامتاماسىز ەتۋگە مۇمكىندىك بەرەدى. بۇل جوبا ماڭعىستاۋ جاستارىنا جاڭا ماماندىقتاردى يگەرۋگە جانە زاماناۋي يندۋستريا تالاپتارىنا سايكەس ساپالى ءبىلىم الۋعا جول اشادى. گەرمانيا مەن قازاقستان اراسىنداعى سەرىكتەستىك ولارعا ەكونوميكالىق ءتيىمدى، الەۋمەتتىك ءادىل جانە ەكولوگيالىق تۇراقتى جۇيە قۇرۋ ءۇشىن تاجىريبە مەن ءبىلىم الماسۋعا مۇمكىندىككە جول باستايدى» ، - دەدى ءا. سمايىلوۆ.
قازاق- نەمىس تۇراقتى ينجەنەريا ينستيتۋتىن قۇرۋ قارساڭىندا بەرلين تەحنيكالىق ۋنيۆەرسيتەتى، ۆيلداۋ تەحنيكالىق ۋنيۆەرسيتەتى، گامبۋرگ تەحنيكالىق ۋنيۆەرسيتەتى، انحالت قولدانبالى عىلىمدار ۋنيۆەرسيتەتى جانە دارمشتادت تەحنيكالىق ۋنيۆەرسيتەتى سياقتى گەرمانيانىڭ جەتەكشى جوعارى وقۋ ورىندارىمەن 8 باكالاۆريات جانە 6 ماگيستراتۋرا بويىنشا قوس ديپلوم مەن ءۇش ديپلومدى ءبىلىم باعدارلامالارىن ىسكە اسىرۋدى جوسپارلاپ وتىر.
«كەشە اقوردادا قازاقستان- نەمىس ۋنيۆەرسيتەتى (DKU) مەن ەسەنوۆ ۋنيۆەرسيتەتى (YU) باسشىلارى بولىپ، اقتاۋ قالاسىندا قازاق- نەمىس تۇراقتى ينجەنەريا ينستيتۋتىن قۇرۋ تۋرالى قورىتىندى قۇجاتقا قول قويدىق. سودان سوڭ استانادا وتكەن قازاقستان مەن گەرمانيا ۋنيۆەرسيتەتتەرى رەكتورلارىنىڭ سيمپوزيۋمىندا ءوزارا ىنتىماقتاستىق تۋرالى مەموراندۋمدار جاساستىق. ونىڭ ىشىندە بەرلين تەحنيكالىق ۋنيۆەرسيتەتى، قازاقستان- نەمىس ۋنيۆەرسيتەتى جانە ەسەنوۆ ۋنيۆەرسيتەتى اراسىنداعى كەلىسىمگە قول قويىلسا، ەكى ديپلوم الۋ جونىندە ۆيلداۋ تەحنيكالىق ۋنيۆەرسيتەتى، قازاقستان- نەمىس ۋنيۆەرسيتەتى جانە ەسەنوۆ ۋنيۆەرسيتەتى اراسىندا كەلىسىم جاسالدى. سونداي- اق، انحالت قولدانبالى عىلىمدار ۋنيۆەرسيتەتى، قازاقستان- نەمىس ۋنيۆەرسيتەتى، ەسەنوۆ ۋنيۆەرسيتەتى اراسىنداعى كەلىسىمگە قول قويدىق» ، - دەدى Yessenov University پرەزيدەنتى بەرىك احمەتوۆ.
