سيريا بويىنشا استانا پروتسەسى رەسمي اياقتالدى

كەلىسسوز قورىتىندىسىنا وراي كەپىلگەر ەلدەردىڭ بىرلەسكەن مالىمدەمەسىن ق ر سىرتقى ىستەر ءمينيسترىنىڭ ورىنباسارى قانات تۋمىش جاريا ەتتى، دەپ حابارلايدى قازاقپارات ءتىلشىسى.

«سيريانىڭ بىرتىندەپ وقشاۋلانۋ ايماعىنان شىعۋى استانا پروتسەسىنىڭ ءوز مىندەتىن ابىرويمەن اتقارعانىنىڭ بەلگىسى دەپ تانۋعا بولادى. سيريانىڭ اراب ەلدەرى قاتارىنا ورالىپ كەلە جاتقانىن ەسكەرە وتىرىپ، استانا پروتسەسى اياسىندا سيريا بويىنشا 20-وتىرىستى رەسمي سوڭعى دەپ جاريالاۋدى ۇسىنامىز»، - دەپ مالىمدەمە جاسادى سىرتقى ىستەر ءمينيسترىنىڭ ورىنباسارى قانات تۋمىش.

ايتا كەتەيىك، ەلوردادا 20-21 م-اۋسىم ارالىعىندا سيريا بويىنشا 20-حالىقارالىق كەزدەسۋ ءوتتى. وعان كەپىلگەر ەلدەردىڭ - رەسەي، تۇركيا جانە يراننىڭ دەلەگاتتارى مەن سيريا ۇكىمەتى جانە وپپوزيتسياسىنىڭ وكىلدەرى، سونداي-اق باقىلاۋشىلار قاتىسادى.

كۇن تارتىبىنە سيريا توڭىرەگىندەگى وڭىرلىك احۋالدى وزگەرتۋ، تەرروريزمگە قارسى كۇرەس، سەنىم شارالارى، ونىڭ ىشىندە كەپىلگە الىنعانداردى بوساتۋ جانە حابار-وشارسىز كەتكەندەردى ىزدەۋ ماسەلەلەرى تالقىلاندى.

ەسكە سالا كەتەيىك، استانا الاڭى سيرياداعى قارسىلاس تاراپتار اراسىنداعى قاقىتىعىستاردى توقتاتۋ بويىنشا كەلىسسوزدەر جۇرگىزۋ ءۇشىن ۇسىنىلعان. سيريالىق رەتتەۋ بويىنشا حالىقارالىق كەزدەسۋلەر ەلوردادا 2017-جىلدان بەرى وتكىزىلىپ كەلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى