توقايەۆ پەن شتاينمايەر قازاق- نەمىس جوعارى وقۋ ورىندارى رەكتورلارىنىڭ فورۋمىنا قاتىستى
مەملەكەت باسشىسى استاناعا ارنايى كەلگەن گەرمانيا پرەزيدەنتىنە جانە نەمىس ۋنيۆەرسيتەتتەرىنىڭ وكىلدەرىنە العىس ايتتى.
قاسىم- جومارت توقايەۆ بۇل ساپار قازاق- نەمىس ىنتىماقتاستىعىن كەڭەيتۋگە مۇمكىندىك بەرەتىن ەلىمىزدىڭ ءبىلىم جانە عىلىم سالاسىنداعى ماڭىزدى وقيعا ەكەنىن اتاپ ءوتتى.
- عىلىم مەن تەحنولوگيانى قوسا العاندا، كوپتەگەن سالاداعى بايلانىستارىمىزدى نىعايتۋعا مول مۇمكىندىك بار. قازاقستاندى ەۋرازياداعى زەرتتەۋ حابىنا اينالدىرۋ - مەنىڭ ارمانىم. وسى ورايدا مەنىڭ ارمانىمنىڭ جۇزەگە اسۋىندا نەمىس ۋنيۆەرسيتەتتەرى ماڭىزدى ءرول اتقارادى. ال مۇمكىندىكتەر تۋرالى ايتاتىن بولساق، ارينە، ءبىز ەكونوميكالىق سەرىكتەستىگىمىزدى نىعايتۋعا باسا نازار اۋدارامىز. نەمىس ينۆەستورلارىنىڭ ءبىزدىڭ ەكونوميكامىزدىڭ دامۋىنا بەلسەندى اتسالىسۋىن جوعارى باعالايمىن. قازاقستان ۇكىمەتى بيزنەس- قوعامداستىقتىڭ ەلىمىزدەگى ۇزاق جانە قاۋىپسىز قىزمەتى ءۇشىن قولدان كەلگەننىڭ ءبارىن جاسايدى. سىزدەردىڭ بيزنەستەگى، ەكونوميكاداعى، سونداي- اق عىلىمي سالاداعى كاسىپتەرىڭىز تابىستى بولۋى ءۇشىن قازاقستان ۇكىمەتى قابىلدايتىن بارلىق شارانى تالقىلادىق، - دەدى قاسىم- جومارت توقايەۆ.
پرەزيدەنتتىڭ ايتۋىنشا، قازاقستان عىلىم مەن تەحنولوگيانى دامىتۋعا، قولداۋعا، سونداي- اق وتاندىق جوعارى وقۋ ورىندارىنىڭ الەۋەتىن كۇشەيتۋ ماسەلەلەرىنە باسا ءمان بەرەدى.
- مەن مەملەكەت باسشىسى رەتىندە بۇل ماسەلەگە ايرىقشا ءمان بەرەمىن. الدىمىزدا ۇزاق جول تۇر. دەگەنمەن جولىمىزداعى بارلىق كەدەرگىنى ءساتتى ەڭسەرەتىنىمىزگە سەنىمدىمىن. سوندىقتان ءبىزدىڭ بۇل باعىتتاعى مىندەتتەرىمىز ايقىن. وسى ماقساتقا قول جەتكىزۋ ءۇشىن عىلىم جانە جوعارى ءبىلىم مينيسترلىگىنە اناعۇرلىم بەلسەندى بولۋدى جانە بيزنەسكە باعدارلانۋدى تاپسىردىم. مەن جوعارى تەحنولوگياعا باسىمدىق بەرۋ قاجەت ەكەنىن ۇنەمى ايتىپ جۇرەمىن. ەلىمىزدە ساپالى ءبىلىم بەرەتىن ۋنيۆەرسيتەتتەر جەتكىلىكتى. الايدا بىزگە سىزدەردىڭ تاجىريبەلەرىڭىز كەرەك. گەرمانيا كوپتەگەن ەلدىڭ تەحنولوگيالىق دامۋىن ىلگەرىلەتۋگە سەپتىگىن تيگىزەتىن تەحنولوگيا سالاسىنداعى ءبىلىم بەرۋ ىسىندە جەتەكشى ەل سانالادى، - دەدى پرەزيدەنت.
