پارلامەنت ۇكىمەت پەن جوعارى اۋديتورلىق پالاتانىڭ بيۋجەت تۋرالى ەسەبىن بەكىتتى
«2022-جىلعى رەسپۋبليكالىق بيۋجەت تۋرالى ۇكىمەت ەسەبى ءماجىلىس پەن سەناتتا جەتە تالقىلانىپ، قاراستىرىلدى. بىلتىر پاندەميادان كەيىن ەكونوميكانىڭ جاندانۋى بايقالدى. جالپى ىشكى ءونىم 3,3 پايىز ءوستى. كوپتەگەن نەگىزگى سالالاردا وڭ ناتيجەگە قول جەتكىزىلدى. ماسەلەن، وڭدەۋ ونەركاسىبى 3,4 پايىز، قۇرىلىس سالاسى 9,4 پايىز، كولىك 3,9 پايىز، اۋىل شارۋاشىلىق 9,1 پايىز، ساۋدا 5 پايىز ءوستى. نەگىزگى كاپيتالعا سالىنعان ينۆەستيتسيالار كولەمى 7,9 پايىز ۇلعايدى. رەسپۋبليكالىق بيۋجەتتىڭ نەگىزگى پارامەترلەرى اتقارىلدى. تۇسىمدەر 102,1 پايىز اتقارىلىپ، 16,1 تريلليون تەڭگە بولدى. شىعىستار 98,6 پايىز يگەرىلدى جانە 18,5 تريلليون تەڭگەنى قۇرادى»، - دەدى ە. جاماۋبايەۆ.
ونىڭ ايتۋىنشا، بيۋجەت تاپشىلىعى جالپى ىشكى ونىمگە شاققاندا 2,3 پايىز قۇرادى.
«جالپى العاندا، مەملەكەت ءوزىنىڭ الەۋمەتتىك جانە باسقا دا مىندەتتەمەلەرىن تولىق كولەمدە ورىندادى»، - دەدى مينيستر.
سونىمەن قاتار مينيستر ۇلتتىق قوردىڭ قاراجاتىن ۇنەمدەۋ ساياساتىن جالعاستىرۋ ماقساتىندا رەسپۋبليكالىق بيۋجەتكە بەرىلەتىن ترانسفەرتتەر قاراجاتىن بىرتىندەپ ازايتۋ جالعاساتىنىن ايتتى.
«سونداي-اق، ۇلتتىق بانكپەن بىرلەسىپ، قوردىڭ ينۆەستيتسيالىق كىرىستەرىن ارتتىرۋعا قاتىستى شارا قابىلدانىپ جاتىر. بۇل مەملەكەت باسشىسىنىڭ ۇلتتىق قوردىڭ قاراجاتىن 2030-جىلعا قاراي 100 ميلليارد دوللارعا دەيىن جەتكىزۋ جونىندەگى تاپسىرماسىن ورىنداۋعا مۇمكىندىك بەرەدى»، - دەدى ە. جاماۋبايەۆ.
بۇدان بولەك، جوعارى اۋديتورلىق پالاتانىڭ ۇسىنىمدارىنا سايكەس، بيۋجەتتىڭ اتقارىلۋ مونيتورينگى دۇرىستالادى جانە ناتيجەلەرگە قول جەتكىزۋ، اسىرەسە ينۆەستيتسيالىق جوبالار بويىنشا باقىلاۋ كۇشەيتىلەدى.
مەملەكەتتىك قارىز جالپى ىشكى ونىمگە شاققاندا 25 پايىزدان تومەن دەڭگەيدە.
ءوز كەزەگىندە جوعارى اۋديتورلىق پالاتا ءتوراعاسى ناتاليا گودۋنوۆا مەملەكەتتىك ورگاندارعا سىرتتان ءتيىمسىز قارىز تارتقانى ءۇشىن سالىناتىن ايىپپۇل مولشەرىن ارتتىرۋدى ۇسىندى.
«2021-جىلعى رەسپۋبليكالىق بيۋجەتتى ورىنداۋ تۋرالى ەسەپتىڭ قورىتىندىسى بويىنشا 33 ۇسىنىم بەرىلدى. ۇكىمەت بيۋدجەت تاۋەكەلدەرىن ايقىنداپ، 2050-جىلعا دەيىنگى مەملەكەتتىك قارجىنىڭ ۇزاق مەرزىمدى تۇراقتىلىعىنا تالداۋ جاسادى. قارىز ساياساتىندا بىرتىندەپ ءتارتىپ پايدا بولىپ كەلە جاتىر. سىرتقى قارىزداردى ءتيىمسىز تارتقانى جانە ولاردى ۋاقىتىلى يگەرمەگەنى ءۇشىن لاۋازىمدى تۇلعالاردىڭ دەربەس اكىمشىلىك جاۋاپكەرشىلىگى ەنگىزىلدى. مۇنداعى 100 ا ە ك مولشەرىندەگى ايىپپۇل سوماسىن كوبەيتۋ كەرەك دەپ سانايمىز»، - دەدى ناتاليا گودۋنوۆا.
