مەملەكەت قارىزى قاۋىپسىز دەڭگەيدە بولادى - ءاليحان سمايىلوۆ
بىرلەسكەن وتىرىستا دەپۋتاتتار مەملەكەتتىك قارىزدى ازايتۋ ءۇشىن قانداي قادامدار جاسالىپ جاتقانىن سۇرادى.
پرەمەر-مينيستر مەملەكەتتىك بورىشتى ازايتۋ ماسەلەسى ۇكىمەتتىڭ تۇراقتى نازارىندا تۇرعانىن ايتتى.
«قارىز سوماسى قاۋىپسىز دەڭگەيدە تۇر. جالپى ىشكى ونىمگە شاققاندا 24,7 پايىزدى قۇرادى. مەملەكەتتىك قارىزدى ازايتۋ جانە سوعان قاتىستى بيۋجەت شىعىندارىن تومەندەتۋ ماسەلەسىن شەشۋ ءۇشىن ۇكىمەت ءبىرقاتار شارانى قابىلدادى. بىرىنشىدەن، رەسپۋبليكالىق بيۋجەتتىڭ تاپشىلىقتى كەزەڭ-كەزەڭ تومەندەتۋ ەسكەرىلگەن. بۇل ءوز كەزەگىندە جاڭا قارىزداردى الۋدى شەكتەيدى. ەكىنشىدەن، بيۋجەت كىرىسىن ۇلعايتۋعا ەكپىن قويىلعان. بۇل تۇرعىدا سالىق ءارى كەدەن سالاسىنداعى اكىمشىلەندىرۋ ارى قاراي جەتىلدىرىلمەك، ياعني سيفرلاندىرۋ جالعاسادى. ماسەلەن، بىلتىردىڭ قورىتىندىسى بويىنشا رەسپۋبليكالىق بيۋدجەتتىڭ كىرىسى 42 پايىزعا ءوستى. ال بيىل دا ءوسىم 40 پايىز شاماسىندا بولادى دەپ جوسپارلانعان»، - دەدى ءا. سمايىلوۆ دەپۋتاتتاردىڭ سۇراعىنا جاۋاپ بەرە وتىرىپ.
ونىڭ ايتۋىنشا، قارىزدى ىشكى نارىقتان تەڭگە ۆاليۋتاسىندا الۋعا ەكپىن قويىلىپ وتىر. بۇل ءوز كەزەگىندە ۆاليۋتا سالاسىنداعى تاۋەكەلدەردى ازايتۋعا مۇمكىندىك بەرەدى.
«جالپى، كەلەر 5 جىلدا مەملەكەتتىڭ قارىزى قاۋىپسىز دەڭگەيدە بولادى. جالپى ىشكى ونىمگە شاققاندا 25 پايىزدان شەگىنەن اسپايدى دەپ ەسەپتەيمىز»، - دەدى ۇكىمەت باسشىسى.
بۇدان بۇرىن حابارلانعانداي، پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ مەملەكەتتىك قارىز جالپى ىشكى ونىمگە شاققاندا 25 پايىزدان تومەن دەڭگەيدە تۇرعانىن ايتتى.
