ۇلتتىق قوردىڭ قاراجاتىن ۇنەمدەۋ: بيۋجەتكە بەرىلەتىن ترانسفەرتتەر بىرتىندەپ ازايادى
بۇل تۋرالى پارلامەنت پالاتالارىنىڭ بىرلەسكەن وتىرىسىندا ۇكىمەتتىڭ جانە جوعارى اۋديتورلىق پالاتانىڭ 2022-جىلعى رەسپۋبليكالىق بيۋجەتتىڭ اتقارىلۋى تۋرالى ەسەپتەرىن قاراستىرۋ كەزىندە پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«ۇلتتىق قوردىڭ قاراجاتىن ۇنەمدەۋ ساياساتىن جالعاستىرۋ ماقساتىندا رەسپۋبليكالىق بيۋجەتكە بەرىلەتىن ترانسفەرتتەر قاراجاتىن بىرتىندەپ ازايتۋ جالعاساتىن بولادى. سونداي-اق، ۇلتتىق بانكپەن بىرلەسىپ، قوردىڭ ينۆەستيتسيالىق كىرىستەرىن ارتتىرۋعا قاتىستى شارا قابىلدانىپ جاتىر. بۇل مەملەكەت باسشىسىنىڭ ۇلتتىق قوردىڭ قاراجاتىن 2030-جىلعا قاراي 100 ميلليارد دوللارعا دەيىن جەتكىزۋ جونىندەگى تاپسىرماسىن ورىنداۋعا مۇمكىندىك بەرەدى»، - دەدى ە. جاماۋبايەۆ.
بۇدان بولەك ول ۇلتتىق جوبالارعا جەكە توقتالدى.
«قازىرگى كەزدە قولدانىستاعى 10 ۇلتتىق جوبانىڭ ءىس-شارالارىن مەملەكەتتىك جوسپارلاۋ جۇيەسىنە جانە وزگە دە قۇجاتتارعا ينتەگراتسيالاۋ بويىنشا جۇمىس اياقتالىپ كەلەدى. ناقتى سالالاردى دامىتۋعا باعىتتالعان 2029-جىلعا دەيىنگى 15 تۇجىرىمداما بەكىتىلدى. ولار پرەزيدەنتتىڭ سايلاۋالدى باعدارلاماسىن ىسكە اسىرۋ جوسپارىمەن ۇيلەستىرىلگەن. سونداي-اق، جاڭا فورماتتاعى «جايلى مەكتەپ»، «اۋىلداعى دەنساۋلىق ساقتاۋدى جاڭعىرتۋ» ۇلتتىق جوبالارى بەكىتىلدى.
بۇدان بولەك، «قولجەتىمدى ينتەرنەت» جوباسى ازىرلەندى. ءسويتىپ، ناقتى پروبلەمالاردى شەشۋگە باعىتتالعان قىسقا ءارى نۇسقا قۇجاتتار فورماتىنا كوشۋ جۇزەگە اسىرىلىپ جاتىر»، - دەدى قارجى ءمينيسترى.
