سوتتار كەيبىر بالا اسىراپ الۋشىلاردىڭ ءوتىنىشىن كونستيتۋتسياعا قايشى نورماعا سۇيەنىپ، قاراۋسىز قالدىرعان
بۇل تۋرالى كونستيتۋتسيالىق سوت ءتوراعاسى ەلۆيرا ءازىموۆا پارلامەنتتىڭ بىرلەسكەن وتىرىسىندا ءمالىم ەتتى، دەپ حابارلايدى قازاقپارات ءتىلشىسى.
«قۇقىق قولدانۋ پراكتيكاسى كورسەتىپ وتىرعانداي، بەكىتىلگەن تەتىكتەر وسى كونستيتۋتسيالىق قۇقىقتى ءاردايىم تولىققاندى ىسكە اسىرۋعا مۇمكىندىك بەرمەيدى»، - دەگەن كونستيتۋتسيالىق سوت ءتوراعاسى ناقتى مىسالدار كەلتىردى.
«اتاپ ايتقاندا، كونستيتۋتسيالىق سوت ازامات سوتقا جۇگىنگەن كەزدە مەملەكەتتىك باج مولشەرى اقىلعا قونىمدى، نەگىزدەلگەن جانە مولشەرلەس بولۋعا ءتيىس دەپ اتاپ ءوتتى. سونداي-اق، وڭايلاتىلعان تارتىپپەن بالا اسىراپ الۋ تۋرالى سوتقا ارىز بەرگەن كەزدە مولەكۋليارلىق- گەنەتيكالىق ساراپتاما قورىتىندىسى بولۋ مىندەتتىلىگى تۋرالى قوسىمشا يمپەراتيۆتىك تالاپ كونستيتۋتسيالىق ەمەس دەپ تانىلدى. سوتتار ءۇشىن مۇنداي قورىتىندىنىڭ بولماۋى ازاماتتىڭ ارىزىن قاراۋسىز قالدىرۋعا نەگىز بولعان. ءراسىم مەملەكەتتىك ورگاندار مەن سوتتاردىڭ بالا مۇددەلەرىن بارىنشا قامتاماسىز ەتۋ مىندەتىنە سايكەس كەلمەيدى. بۇل - قازاقستان راتيفيكاتسيالاعان بىرىككەن ۇلتتار ۇيىمىنىڭ بالا قۇقىقتارى تۋرالى كونۆەنتسياسىنىڭ تالابى»، - دەدى ول.
