الماتىدا بالالار اراسىندا قىزىلشامەن اۋرۋشاڭدىق دەڭگەيى وسكەن
بۇل تۋرالى الماتى قالاسى سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى، دەپ حابارلايدى قازاقپارات ءتىلشىسى.
دارىگەردىڭ ايتۋىنشا، مەگاپوليستە ناۋرىز ايىنان بەرى قىزىلشانىڭ 651 زەرتحانالىق راستالعان جاعدايى تىركەلدى، ونىڭ ىشىندە 14 جاسقا دەيىنگى بالالار اراسىندا 543 جاعداي، بۇل %83,4 قۇرايدى.
«بالالار اراسىنداعى اۋرۋشاڭدىق نەگىزىنەن ۆاكسيناتسيادان باس تارتۋ سەبەبىنەن بولعان، سونداي- اق، ۆاكسيناتسيادان مەديتسينالىق بوساتۋ جانە ەگۋ جاسىنا جەتپەۋ سالدارىنان تىركەلەدى. پروفيلاكتيكالىق جانە ەپيدەمياعا قارسى ءىس- شارالار جۇرگىزۋدىڭ ناتيجەسىندە 9784 قارىم- قاتىناستا بولعان تۇلعا انىقتالدى، قىزىلشاعا قارسى 277 ادام ەگىلدى. بارلىق بايلانىسقا تۇسكەن ادامدار مەديتسينالىق باقىلاۋعا الىندى، وشاقتاردا قىزىلشانىڭ الدىن الۋ بويىنشا سانيتاريالىق جۇمىستار جۇرگىزىلدى»، - دەدى اسەل قالىقوۆا.
ونىڭ سوزىنشە، قىزىلشانى جۇقتىرۋدان، ونىڭ اسقىنۋىنان ساقتانۋدىڭ جالعىز جولى - ۆاكسيناتسيا.
«قىزىلشاعا قارسى ۆاكتسيناتسيا 1 جاستا جانە 6 جاستا ەكى رەت جاسالادى، بۇل ادامداردا ءومىر بويى بولاتىن يممۋنيتەتتى دامىتۋعا مۇمكىندىك بەرەدى. قىزىلشاعا قارسى ۆاكسينانىڭ ءاربىر الىنعان دوزاسى بالانىڭ يممۋنيتەتىن كۇشەيتەدى. ەكپەلەردى سالۋ ءۇشىن دۇنيەجۇزىلىك دەنساۋلىق ساقتاۋ ۇيىمى سەرتيفيكاتتاعان جانە قازاقستاندا تىركەلگەن ۆاكتسينا قولدانىلادى. ۆاكتسيناتسيا تۇرعىلىقتى جەرى بويىنشا قالانىڭ ەمحانالارىنىڭ بارلىق ەگۋ كابينەتتەرىندە تەگىن جۇرگىزىلەدى. ايتا كەتەيىن، 8-ماۋسىمدا الماتى قالاسى قوعامدىق دەنساۋلىق ساقتاۋ باسقارماسىنىڭ ۆاكسينا قويماسىنا د د ۇ سەرتيفيكاتتاعان جانە قازاقستاندا تىركەلگەن 37200 دوزا مولشەرىندە قىزىلشاعا، قىزامىققا، ەپيدەميالىق پاروتيتكە (قكپ) قارسى ۆاكتسينا اكەلىندى»، - دەدى دارىگەر.
ونىڭ سوزىنشە، بالالاردى جوسپارلى ۆاكتسيناتسيالاۋ تۇرعىلىقتى جەرى بويىنشا قالانىڭ ەمحانالارىنىڭ بارلىق ەگۋ كابينەتتەرىندە تەگىن جۇرگىزىلەدى. قالعان تۇرعىندار اقىلى نەگىزدە جەكە ەگۋ كابينەتتەرىندە ەكپە الا الادى.
