بالانى تەلەفونعا تاۋەلدىلىكتەن قالاي ارىلتامىز؟

باستاپقىدا اتا-انا بالاسىنىڭ قۇرىلعىنى قالاي جاقسى قولداناتىنىنا جانە تەز ۇيرەنىپ الاتىنىنا تاڭعالىپ قۋانادى. ءبىراق ۋاقىت وتە ولار بالاسىن ۆيرتۋالدى الەمنەن شىعارعىسى كەلەدى.

گادجەتتەردىڭ بالالارعا زيانى قانداي؟

پسيحولوگتار مەن دارىگەرلەردىڭ كوپشىلىگى بالالاردىڭ گادجەتتەردە كوپ وتىرۋى ولارعا جاعىمسىز اسەر ەتەتىنىن ايتادى.

مىسالى، ەرتەگىلەر، شىعارمالار، اڭگىمەلەر بالانىڭ قيالىن دامىتۋعا كومەكتەسەدى. ال قاراپايىم ۆيزۋالدى اقپاراتتى الۋ بالا قيالىنىڭ ناشار دامۋىنا اكەلەدى. سۋرەتتەرى كوپ نارسەگە بىردەڭە قوسۋدىڭ نە قاجەتى بار؟ ياعني، قيالدى ىسكە قوسۋدىڭ ەش قاجەتتىلىگى جوق.

سونداي-اق بالا ءوزىنىڭ ەموتسيالارىمەن كۇرەسە الماسا، ءوزىن-ءوزى تىنىشتاندىرۋ ءۇشىن الەۋمەتتىك جەلىلەرگە كىرە باستايدى. وسىلايشا، تىنىشتىقتى وزىنەن ەمەس، گادجەتتەردەن ىزدەۋ تاۋەلدىلىگى پايدا بولادى. بۇل جالعاسا بەرسە، باسقا دا تاۋەلدىلىكتەرگە اكەلۋى مۇمكىن. سوندىقتان اتا- انا بالاسىن باقىلاۋى كەرەك: بالا رەنجىگەن كەزدە گادجەتكە ۇمتىلسا، بۇل ونىڭ ەموتسياسىن شىعارماي، ونى ويىن ويناۋ ارقىلى نەمەسە الەۋمەتتىك جەلىدە شىعاراتىنىن ءبىلدىرۋى مۇمكىن.

گادجەتپەن ءوزارا ارەكەتتەسۋ - بۇل جاساندى وبەكتپەن ۇزدىكسىز بايلانىس. بالا ونىمەن ءوز سەزىمدەرىمەن جانە قاجەتتىلىكتەرىمەن بولىسەدى. مۇنداي «بايلانىس» بالانىڭ كوممۋنيكاتسيالىق داعدىلارىن بۇزادى.

بالا كىشكەنتاي كەزىندە تەلەفونعا نەمەسە پلانشەتكە جىلدام ۇيرەنەدى. مەكتەپ جاسىنا جاقىنداعاندا گادجەتتەرگە دەگەن تاۋەلدىلىك قالىپتاسادى. بالا ۇنەمى گادجەتتەردە وتىرسا، ول اشۋلانشاق بولىپ كەتەدى.

. گادجەتتەردى ۇزاق پايدالانۋ فيزيكالىق دەڭگەيدە دە اسەر ەتەدى:

. كورۋى مەن ۇيقىسى ناشارلايدى؛

. يممۋنيتەت السىرەيدى؛

. ءتىلى كەش شىعادى جانە موتوريكاسى كەش داميدى؛

. ومىرتقاسى قيسايۋى مۇمكىن.

بالا مەن گادجەت اراسىن قالاي الىستاتۋعا بولادى؟

بالانىڭ جاۋى بولماڭىز

اتا- انا بالاسىن گادجەتتەرگە تاۋەلدىلىكتەن ارىلتۋ ءۇشىن قاتاڭ ارەكەت ەتىپ باستايدى. ياعني، بىردەن گادجەتتەردى تارتىپ الادى، ايقايلايدى. بۇل بالادا نەگاتيۆ ەموتسيالار تۋدىرادى، سوندىقتان ول اتا- اناسىنا قارسى شىعادى. بالامەن قارىم-قاتىناستى بۇزىپ الماس ءۇشىن، ونىڭ سەنىمىن جوعالتىپ الماس ءۇشىن ونى گادجەتتەردەن بىرتىندەپ الىستاتقان ءجون.

تەحنولوگيانى جوققا شىعارماڭىز

بالانىڭ كوزىنشە سمارتفونداردى، عالامتوردى جانە بارلىق زاماناۋي تەحنيكانى جامانداۋدىڭ قاجەتى جوق. بۇل بالانى ۆيرتۋالدى الەمنەن شىعارۋعا كومەكتەسپەيدى. گادجەتتەرگە باسقا كوزقاراسپەن قاراۋعا تىرىسىڭىز. مىسالى، ولار ارقىلى بالانى مەكتەپكە دايىنداۋعا بولادى، عالامتوردا وتە پايدالى اقپارات كوپ، سونداي-اق دامىتاتىن جانە ءبىلىم بەرەتىن باعدارلامالار جەتەرلىك.

الايدا 2 جاسقا دەيىنگى بالاعا گادجەتتەردى مۇلدەم بەرمەگەن ءجون. ءتىپتى، ونداعى دامىتۋشى ويىنداردىڭ بۇل جاستا ەش پايداسى جوق. ەگەر بالاعا سماترفوننان بىردەڭە كورسەتەتىن بولساڭىز، ەكرانداعى ءار ارەكەتتى بالاعا ءتۇسىندىرىپ وتىرۋ كەرەكسىز.

ۇلگى بولىڭىز

بالا اتا-اناسىنان ۇلگى الادى. ەگەر ءسىز تەلەفوندا ۇزاق وتىراتىن بولساڭىز، بالا ءۇشىن بۇل قالىپتى نارسە بولىپ كەتەدى. بالامەن بىرگە ۋاقىت وتكىزۋ ءۇشىن گادجەتتەرسىز كۇن ۇيىمداستىرىپ تۇرىڭىز.

بالامەن بىرگە كوبىرەك ۋاقىت وتكىزىڭىز

اتا- انا مەن بالا ءبىر- ءبىرىن جاقسى ءتۇسىنۋ ءۇشىن جانە گادجەتتەردەن الاڭداۋ ءۇشىن بىرگە كوبىرەك ۋاقىت وتكىزۋ كەرەك. بالامەن بىرگە ويىندار ويناڭىز، سەرۋەندەڭىز، اڭگىمە ايتىڭىز جانە وتباسى مۇشەلەرىن بىرىكتىرەتىن باسقا دا شارالار ۇيىمداستىرىڭىز. سونداي-اق تۇرمىستىق ىستەردى دە بىرگە جاساۋعا تىرىسىڭىز. مىسالى، تاماق پىسىرگەن كەزدە بالانىڭ كومەكتەسۋىن سۇراڭىز، ونى ءۇي جانۋارلارىن نەمەسە بولمە وسىمدىكتەرىن كۇتۋگە ارالاستىرىڭىز جانە ت. ب.

ماقتاڭىز

بالاڭىزدىڭ ورتاق وتباسىلىق ىستەرگە تيگىزگەن ۇلەسىن ەلەپ، باعالاڭىز. «ول ونى ىستەۋگە مىندەتتى» دەگەن ويدان ارىلىڭىز. وعان قوسا، بالا ءسىز ايتپاي-اق ۇيدەگى ماڭىزدى جۇمىستاردى جاساپ قويسا، مىندەتتى تۇردە ەلەپ، ونى ماقتاڭىز. سول كەزدە بالا اتا-اناسى ونى باعالايتىنىن تۇسىنەدى.

بالاما ءىس ۇسىنىڭىز

بالانى گادجەتتەرگە تاۋەلدىلىگىنەن ارىلتقىڭىز كەلسە، ونىڭ كومپيۋتەرلىك ويىندار ويناۋىن جانە الەۋمەتتىك جەلىلەردە وتىرۋىن ازايتۋ ءۇشىن وعان بالاما نارسە ۇسىنۋىڭىز كەرەك. سونداي-اق ول ءارتۇرلى جانە ادامدارمەن ءوزارا ارەكەتتەسەتىن بولۋى كەرەك. مىسالى: شىعارماشىلىق جانە سپورتتىق ۇيىرمەلەر. باستىسى، بالا قىزىعۋشىلىعىن ەسكەرىڭىز.

ءۇي جانۋارىن الىپ بەرىڭىز

بۇل قادامعا ءار اتا-انا بارا بەرمەيدى. بۇل جەردە بالانىڭ جانۋارلارعا دەگەن ماحابباتىن ەسكەرۋ قاجەت. سونداي- اق جانۋار - ادەمى ويىنشىق قانا ەمەس، ۇلكەن جاۋاپكەرشىلىك ەكەنىن ءتۇسىنۋ ماڭىزدى. ەگەر بالا جانۋارلاردى جاقسى كورەتىن بولسا جانە ۇيدە جانۋار ۇستاۋعا مۇمكىندىك بار بولسا، وعان ءۇي جانۋارىن الىپ بەرۋگە بولادى. سودان سوڭ كۇتىمنىڭ ءبىر بولىگىن بالانىڭ موينىنا ءىلىڭىز. مىسالى، ونى تاماقتاندىرۋ مەن سەرۋەندەتۋ - بالانىڭ مىندەتى بولسىن.

بالانىڭ گادجەتتە وتىرۋ ۋاقىتىن شەكتەڭىز

بالادان گادجەتتى مۇلدەم تارتىپ الماي، ونىڭ ودا وتىرۋ ۋاقىتىن شەكتەڭىز. بالانىڭ گادجەت قولدانۋىنا ۋاقىت ءليميتىن ورناتىڭىز. سونداي- اق سەرۋەندەگەندە، تاماق ىشكەندە جانە قوناق كەلگەندە گادجەت ۇستاۋىنا رۇقسات بەرمەڭىز. بالانى قوناقتارمەن سويلەسۋگە ۇيرەتىڭىز. گادجەتتەرگە اتا- انا باقىلاۋىن ورناتىپ قويىڭىز. ول جاقتا ۋاقىت شەكتەپ قويساڭىز، ۋاقىت اياقتالعان كەزدە سمارتفونداعى بارلىق قوسىمشالار بۇعاتتالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى