مينيستر جەڭىلدەتىلگەن اۆتوكولىك نەسيەسى تۋرالى سۇراققا جاۋاپ بەردى

اقوردادا جۋرناليستەر يندۋستريا جانە ينفراقۇرىلىمدىق دامۋ مينيسترىنەن جەڭىلدەتىلگەن اۆتونەسيە قاشان باستالاتىنىن سۇرادى. مينيستر مارات قارابايەۆ بولىنگەن قاراجات قوعامدىق كولىكتى جەڭىلدەتىلگەن نەسيەلەندىرۋگە باعىتتالاتىنىن اتاپ ءوتتى.

«قازىر اينالىم قاراجاتى جينالدى. جەڭىلدىكتى اۆتونەسيەدەن تۇسكەن قاراجاتتى مەملەكەتتىك كولىكتەردى نەسيەلەندىرۋگە قايتا باعىتتاۋ مۇمكىندىگى قاراستىرىلىپ جاتىر. ءبىز ءبىرقاتار وبلىستاردا بولدىق، اكىمدىك وكىلدەرى اۆتوپاركتى نەسيەلەندىرۋ ماسەلەسىن كوتەرىپ جاتىر»، - دەدى مارات قارابايەۆ.

ءمينيستردىڭ ايتۋىنشا، قوستانايدا قوعامدىق كولىكتەردىڭ 90 پايىزى، تالدىقورعان مەن ورالدا 70 پايىزى ەسكىرگەن.

«قولدا بار قاراجاتتى بارىنشا ءتيىمدى پايدالانۋ مىندەتى تۇر. وسىعان بايلانىستى ءبىز قاراجاتتى جەڭىلدەتىلگەن اۆتونەسيەلەرگە - قوعامدىق كولىكتى نەسيەلەندىرۋگە باعىتتاۋ مۇمكىندىگىن قاراستىرىپ جاتىرمىز. ونى كۇندەلىكتى 9,3 ميلليون قازاقستاندىق پايدالانادى. ءبىز ءۇشىن ولاردىڭ قاجەتتىلىكتەرىن قاناعاتتاندىرۋعا باسىمدىق بەرىلەدى. قارجى قوعامدىق كولىكتى قارجىلاندىرۋعا باعىتتالادى»، - دەدى مينيستر.

«مەن جاقسى ءتۇسىنىپ وتىرمىن، ەندى قازاقستاندىقتار جەڭىلدەتىلگەن اۆتونەسيە باعدارلاماسى بويىنشا كولىك الا الماي ما؟» - دەپ سۇرادى جۋرناليست.

«ەندى قاراجات قوعامدىق كولىكتى قارجىلاندىرۋعا بولىنەتىن بولادى»، - دەپ تۇيىندەدى قارابايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى